Salmo 41:1-13
Duü̃xü̃ i da̱xawexü̃arü yumüxẽ
41 Rü nüma ya Tupana rü tümamaxã nataãxẽ ya yíxema tümamücü ya ngearü ngẽmaxü̃ã́xexü̃ rüngü̃xẽxẽ́xe. Rü nüma ya Cori ya Tupana rü tá tüxü̃ ínanguxuchixẽxẽ ega ngẽxguma guxchaxü̃ tümaca̱x ínguxgu.
2 Rü nüma ya Cori ya Tupana rü tá tüxna nadau rü tá maxü̃ tüxna naxã rü tá tüxü̃ nataãxẽxẽxẽ i nhama i naanewa. Rü taxũtáma tümaarü uanügüarü ngúchaü̃wa tüxü̃ nata̱x.
3 Rü nüma ya Cori ya Tupana rü tá pora tüxna naxã ega ngúxü̃ tingegügu. Rü ngẽxguma tida̱xawegu rü tá tümaca̱x nayataanexẽxẽ.
4 Rü chama rü nhaãcü chayumüxẽ: “Pa Corix ¡cuxü̃́ changechaxü̃tümüxü̃ rü cha̱u̱xca̱x yataanexẽxẽ! Erü marü cumaxã nüxü̃ chixu i chorü chixexü̃gü”, nhachagürü.
5 Notürü ngẽma chorü uanügü rü nhanagürügü: “Chierüna paxa nayu̱xgux nax ngẽmaãcü ngẽxma yanaxoxü̃ca̱x”, nhanagürügü.
6 Rü ngẽxguma choxü̃ íyadaugügu i ngẽma nax chida̱xawexü̃ rü chamücüxü̃ nügü nixĩxẽẽnetagü. Notürü chauxchi naxaie rü nataãxẽgü i ngẽxguma nüxü̃ nadaugügu nax ngúxü̃ chingexü̃. Rü ngẽxguma choxna nawoegu̱xgu rü choxü̃ nacugüe.
7 Rü ngẽma chauxchi aiexü̃ rü naxĩtaque̱xe rü chauchiga nidexagü. Rü nagu narüxĩnüe nax chaugagutama ngúxü̃ chingexü̃.
8 Rü nhanagürügü: “Rü ngẽma nax yada̱xawexü̃ rü yuüxü̃ chixexü̃ namaxã naxü rü ngẽmaca̱x i nhu̱xmax rü marü tagutáma wena ínarüda”, nhanagürügü.
9 Rü woo ga yema mexü̃ ga chamücü ga nagu chayaxõxü̃ nax aixcuma choxü̃ nangechaü̃xü̃ rü wüxiwa chamaxã chibüchiréxü̃ rü nhu̱xmax rü chamaxã narüxuanü.
10 Notürü cumax, Pa Corix ¡rü cuxü̃́ changechaxü̃tümüxü̃! ¡Rü choxü̃ írüdaxẽxẽ nax ngẽmaãcü chanapoxcuexü̃ca̱x i ngẽma chamaxã rüxuanügüxü̃!
11 Rü aixcuma tá nüxü̃ chacua̱x nax cuxü̃ chataãxẽxẽẽxü̃ ega ngẽxguma ngẽma chorü uanügü rü taxũtáma nügü yaxuxgu nax choxü̃ naporamaexü̃.
12 Rü chamax nax mea chamaxü̃xü̃ rü taguma chixexü̃ chaxüxü̃ ¡rü choxna nadau nax ngẽmaãcü guxü̃guma cuxü̃tawa changexmaxü̃ca̱x!
13 Rü namexechi ya Cori ya Iraéutanüxü̃arü Tupana. Rü nhu̱xmax rü guxü̃gutáma rü ngẽmaãcüecha nixĩ.
