Salmo 42:1-11
Tupanaxü̃tawa ne naxũ i chorü ngü̃xẽẽ
42 Rü nhama wüxi i cowü i ta̱xawaxüchixü̃ i natüca̱x dauxü̃rüxü̃ chixĩ nax cuxca̱x chadauxü̃, Pa Chorü Tupanax.
2 Rü choxü̃́ nangúchaü̃ nax namaxã chaxãmücüxü̃ ya Tupana ya maxü̃arü yora. ¿Rü nhuxgu tá i wena napatawa chaxũxü̃ nax ngẽ́ma nüxü̃ chicua̱xüüxü̃ca̱x?
3 Ngunecü rü chütacü rü chaxaxu nax norü ngü̃xẽẽca̱x íchaca̱xaxü̃ca̱x. Rü yoxni i chorü uanügü rü choxü̃ nacugüe rü nhanagürügü: “¿Ngexcü nixĩ ya curü Tupana?” nhanagürügü. Rü ngẽmamaxã choxü̃ nacugüe.
4 Rü ngẽxguma ngẽmagu charüxĩnügu rü marü tama yaxna namaxã chaxĩnü i ngẽma choxü̃́ ngúxü̃. Rü nüxna chacua̱xãchi nax nhuxãcü taãxẽãcüma rü Tupanana moxẽ itaxããcüma napatawa chanagagüxü̃ ga yema muxü̃ma ga duü̃xü̃gü. Rü nhuxãcü tataãxẽgü ga yexguma.
5 ¿Rü nhu̱xmax rü ta̱xacüca̱x chi i nüxü̃ charüxoxü̃? ¿Rü ta̱xacüca̱x chi i naxca̱x chaxoégaãẽxü̃? Rü Tupanawaxicatama nüxü̃ ichayangau i chorü ngü̃xẽẽ, rü yimáxü̃ tá nixĩ i chicua̱xüüxü̃amaxü̃. Erü nüma nixĩ ya chorü Tupana ya chorü maxẽẽruxü̃.
6 Notürü i nhu̱xmax rü poraãcüxüchima íchayaxoõchi. Rü ngẽmaca̱x, Pa Tupanax, poraãcü cuxna chacua̱xãchi nawa i nhaa naane i natü i Yurdáũ nawa dapetüxü̃ rü yima ma̱xpǘnegü ya Ermóü̃ rü Michá nawa ngẽxmagüne.
7 Rü guxü̃ma i ngẽma guxchaxü̃gü rü ngúxü̃gü i cha̱u̱xca̱x ícunanguxẽẽxü̃ rü nhama wüxi ya yuape ya taxüchicürüxü̃ chauétüwa naxüpetü. Rü nhama dexá i dauxü̃wa nagoxü̃chiüxü̃rüxü̃ chauétü nangu.
8 Rü ngunecü rü nüma ya Cori rü choxü̃ nangechaü̃. Rü chütacü rü tama nüxü̃ charüchau nax chawiyaexü̃ rü chayumüxẽxü̃ naxca̱x ya Tupana ya chorü maxẽẽruxü̃.
9 Rü nhachagürü nüxü̃ ya Tupana ya chorü poxü̃ruxü̃: “¿Tü̱xcüü̃ choxü̃ curüngüma? ¿Rü ta̱xacüca̱x i nhu̱xmax rü ngechaü̃ãcü íchixũxü̃ rü choxü̃ nua nachixeãxẽgüxü̃ i chorü uanügü?” nhachagürü.
10 Rü woo ya chauxchina̱xãgü rü ta nangúe nagagu i ngẽma chorü uanügü i guxü̃guma choxü̃ cugüexü̃ rü nhagüxü̃: “¿Ngexcü nixĩ ya curü Tupana?” nhagüxü̃.
11 ¿Notürü ta̱xacüca̱x chi nüxü̃ charüxoxü̃? ¿Rü ta̱xacüca̱x chi ichaxoégaãẽxü̃? Erü Tupanagu nixĩ i chayaxõxü̃ rü yimáxü̃ tá nixĩ i chicua̱xüüxü̃amaxü̃. Erü nüma nixĩ i chorü Tupana ya chorü maxẽẽruxü̃ ixĩcü.