Salmo 44:1-26
Yumüxẽ i nawa Tupanaarü ngü̃xẽẽca̱x íica̱xü̃
44 Pa Tupanax, tomatama nüxü̃ taxĩnüechiga ga yema taxü̃ ga mexü̃ ga nũxcüma cuxüxü̃. Yerü torü o̱xigü rü nüxü̃ tixugügü ga yema nũxcüma cuxüxü̃ ga yexguma tüma tamaxẽgu.
2 Rü cumatama nixĩ ga norü naanewa ícuwoxü̃xü̃ ga yema duü̃xü̃gü ga tama cuxü̃́ yaxõgüxü̃. Rü yemaacü cunapoxcue ga yema duü̃xü̃gü nax yema naanegu torü o̱xigüxü̃ cuxãchiü̃güxẽẽxü̃ca̱x.
3 Rü tama tümaarü poramaxã rü tümanegümaxã nixĩ ga tanayauxgüxü̃ ga yema naane. Notürü yema curü poragagu rü curü ngü̃xẽẽgagu nixĩ ga nawa tangugüxü̃ ga yema naane. Yerü cuma rü tüxü̃ cungechaü̃ rü yemaca̱x tümamaxã cumecüma.
4 Pa Chorü Ãẽ̱xgacüx, Pa Chorü Tupanax, cuma nixĩ i icunaporamaexẽẽxü̃ i curü duü̃xü̃gü.
5 Rü cugagu nixĩ i nüxü̃ tarüporamaegüxü̃ i torü uanügü. Rü ngẽxguma cuéga tanaxuxuchigu rü nüxü̃ tarüyexera i ngẽma toxü̃ daixchaü̃xü̃.
6 Rü chama rü tama chauxnegügu chayaxõ erü yimá chauxnegü rü tagutáma chorü uanügüxü̃ choxü̃ narüporamaexẽxẽ.
7 Rü cuma nixĩ ga torü uanüxü̃ toxü̃ curüporamaexẽẽxü̃ rü cuma nixĩ i cunaxãneexẽẽxü̃ i ngẽma toxchi aiexü̃.
8 Rü guxü̃guma cumaxã togü ticua̱xüxü̃gü, Pa Tupanax. Rü guxü̃gutáma nüxü̃ ticua̱xüxü̃ i cuéga.
9 Notürü i cumax rü toxü̃ cuxo rü toxü̃ cuxãneexẽxẽ. Rü marü tama ícuyaxümücü i torü churaragü.
10 Rü cuma rü nüxü̃́ cunatauxchaxẽxẽ i torü uanügü nax toxü̃ yabuxmüxẽẽxü̃ca̱x. Rü ngẽmaca̱x i ngẽma toxchi aiexü̃ rü toxü̃́ nangĩ̱xgü rü nayana i ngẽma nüma nanaxwa̱xegüxü̃.
11 Rü cuma rü nüxna toxü̃ cumugü nhama carnérugü i daiwa nagagüxü̃rüxü̃. Rü ngẽma duü̃xü̃gü i tama cuxü̃́ yaxõgüxü̃tanügu toxü̃ cuwoonexẽẽmare.
12 Rü ítanüxü̃gu tomaxã cutaxe rü taxuxü̃ma nawa cuyaxu nax tomaxã cutaxexü̃.
13 Rü ngẽma toxna ngaicamagüxü̃ i nachixü̃anecüã̱xgü rü toxü̃ nacugüe rü tomaxã naguxchigagü nagagu ga yema chixexü̃ ga toxca̱x ícunguxẽẽxü̃.
14 Rü ngẽmagagu i ngẽma duü̃xü̃gü i tama yaxõgüxü̃ rü toxü̃ nacugüe. Rü ngẽxguma toxü̃ nadaugügu rü nanexáerugüãcüma toxü̃ nacugüe.
15 Rü wüxichigü i ngunexü̃ rü ngẽma guxchaxü̃wa changexma. Rü ngẽmaca̱x chorü ãnemaxã tama chadaunagü.
16 Erü ngẽma chorü uanügü rü choxü̃ nima̱xgüchaü̃ rü chamaxã naguxchigagü rü chagu nidauxcüraxü̃gü.
17 Rü ngẽma nhu̱xmax toxü̃ ngupetüxü̃ rü tama ngẽma cuxü̃ nax itarüngümaexü̃gagu nixĩ rü tama nax ta̱xacürü chixexü̃ cupe̱xewa taxüxü̃gagu nixĩ.
18 Rü toma rü tama nagu tarüxĩnüe nax cuxü̃ ítatáxü̃ rü tama nagu tarüxĩnüe nax nüxü̃ itarüngümaexü̃ i curü ore.
19 Notürü i cuma rü toxü̃ cupoxcueama. Rü ngexta guxü̃ma i ngẽmaxü̃gü ítaxuxü̃wa toxü̃ cuwogü rü ngẽmaãcü yuwa toxü̃ cumugü.
20 44:20-21 Rü ngẽxguma chi cuxü̃ itarüngümaegux rü chi nüxü̃ ticua̱xüxü̃gux i tomare i tupana, rü cuma rü chi nüxü̃ cucua̱xama. Erü cuma rü meama nüxü̃ cucua̱x i guxü̃ma i ngẽma bexma toõxẽwa nagu tarüxĩnüexü̃.
21 Nüü̃ nadau 44:20
22 Notürü cugagu rü guxü̃guma ãũcümaxü̃ i yuwa tangexmagü. Rü ngẽma torü uanügü rü nhama carnérugü i daiwa nagagüxü̃rüxü̃ tomaxã nixĩgü.
23 Pa Corix ¿tü̱xcüü̃ tama ícuxuãxẽ? ¡Rü naba̱i̱xãchi, rü tauxü̃́ i toxü̃ ícuwogüxüchixü̃!
24 ¿Tü̱xcüü̃ toxcha̱xwa íquicu̱x? ¿Rü tü̱xcüü̃ toxü̃ icurüngüma i toma nax poraãcü ngúxü̃ tingegüechaxü̃?
25 Rü nhu̱xmax rü tipaexüchima rü ãne tingegü. Rü nhaxtüanegumare togü titúgü.
26 ¡Ẽcü inachi rü nua naxũ rü toxü̃ yarüngü̃xẽxẽ! ¡Rü taxü̃ i curü ngechaü̃maxã toxü̃ ínanguxü̃xẽxẽ!
