Salmo 45:1-17
Ãẽ̱xgacüarü ngĩchixüguarü wiyae
45 Rü chauãxẽwa nangu i mexü̃ i dexagü, rü chorü conü rü nhama wüxi i ümatüxü̃ruü̃rüxü̃ nixĩ. Rü nhaa chorü ore i chaxümatüxü̃ rü ãẽ̱xgacüpe̱xewa tá nüxü̃ chixu.
2 Rü cumax, Pa Ãẽ̱xgacüx, rü guxü̃ i yatügüxü̃ curümemae. Rü ngẽma curü dexa i cua̱xwa íxũxũxü̃ rü namexechi. Rü ngẽmaca̱x ya Tupana rü guxü̃guma cuxü̃ narüngü̃xẽẽ.
3 Pa Poracüx ¡ẽcü cugücüwawa yanga̱xcuchi i ngẽma curü tara! Rü ngẽma nixĩ i curü meruxü̃ ixĩxü̃.
4 Rü cumax, Pa Ãẽ̱xgacüx, rü ngẽma curü poramaxã nüxü̃ curüyexera i guxü̃ma i tórü uanügü rü ícunapoxü̃ i ngẽma ore i aixcuma ixĩxü̃. Rü yíxema duẽxẽgü i tama tügü icua̱xüü̃güxe rü cuma rü tüxü̃ ícupoxü̃. Rü yima curü tügünechacüümaxã rü taxü̃ma i mexü̃gü cuxü.
5 Pa Ãẽ̱xgacüx, rü ngẽma togü i nachixü̃anecüã̱xgü rü cuxme̱xgu nayi. Rü yimá cuxnegü rü meama nixãmagu rü ngẽma curü uanügüarü maxü̃newa nayarüwa̱xgü.
6 Pa Tupanax, cuma rü guxü̃guma ãẽ̱xgacü quixĩ rü aixcuma mea guxü̃ma i duü̃xü̃gümaxã icucua̱x.
7 Rü cumax, Pa Ãẽ̱xgacüx, rü namaxã cutaãxẽ i ngẽma mexü̃ ixĩxü̃, notürü naxchi cuxai i ngẽma chixexü̃. Rü yemaca̱x nixĩ ga Tupana ga cuxü̃ naxunetaxü̃ rü cumücügüarü yexera taãxẽ cuxna naxãxü̃.
8 Rü guxü̃ma i cuxchirugü rü pumára i paacaxüchixü̃ i míra rü aroé rü canéramaxã napaxema. Rü paxetaruü̃gü i ãtü̱xüxü̃maxã cuxü̃ nataãxẽxẽẽgü nawa ya cupata ya nuta ya mexechicü ya marfílnaxca̱x ixĩxü̃ne.
9 Rü natanüwa i ngẽma ngexü̃gü i cupatawa ngẽxmagüxü̃ rü nangexmagü i to i nachixü̃anegüarü ãẽ̱xgacügüarü paxü̃gü. Rü curü tochicaxü̃arü tügünecüwawa ingexma i cuxma̱x i úiru i mexechixü̃maxã nga̱xãẽcü.
10 ¡Rü irüxĩnü, Pa Chauxacüx, rü mea nangugü i ngẽma tá cumaxã nüxü̃ chixuxü̃! ¡Rü nüxü̃ irüngüma i ngẽma cutanüxü̃gü rü ngẽma curü duü̃xü̃gü!
11 Erü nüma ya yimá ãẽ̱xgacü rü nüxü̃́ cungúchaü̃. Rü nüma nixĩ i curü cori yixĩxü̃ rü name nixĩ i naga cuxĩnü.
12 Pa Pacü i Tírucüã̱x, rü ngẽma duü̃xü̃gü i curü ĩanewa poraãcü diẽruã̱xü̃chigüxü̃ rü mexechixü̃ i ãmare tá cuxna naxãgü nax ngẽmamaxã cuxü̃ íyapuxẽẽgüxü̃ca̱x.
13 Rü nhu̱xmax rü iyaxücu i ngẽma pacü i meama nga̱xãẽcü. Rü ngẽma naxchiru rü úirumaxã naxãmatü.
14 Rü meama nga̱xãẽcü ãẽ̱xgacüpe̱xewa ngĩxü̃ nagagü. Rü ngẽma ngĩmücügü i pacügü rü ngĩwe nixãxü̃tanü.
15 Rü taãxẽãcüma iyaxĩ rü taãxẽãcü nagu ichocu ya yima ãẽ̱xgacüpata. Rü yimá cunegü i tá cuxü̃́ ngẽxmagücü, Pa Ãẽ̱xgacüx, rü nümagü tá nixĩ i cuchicüxü ãẽ̱xgacügü yixĩgüxü̃. Rü cuma rü naxme̱xwa tá cunangexmaxẽxẽ i nhaa nachixü̃ane nax nüma namaxã inacua̱xgüxü̃ca̱x.
16 Rü chama rü tagutáma ichayanaxoxẽxẽ i ngẽma cuéga nax ngẽmaãcü i guxü̃ma i ngẽma ngexwaca̱x i ngoetanüxü̃ i duü̃xü̃gü rü nüxna nacua̱xãchiexü̃ca̱x, rü guxü̃ma i nachixü̃anecüã̱xgü cuxü̃ icua̱xüü̃güxü̃ca̱x.
17 Rü chamax, Pa Ãẽ̱xgacüx, rü chanaxümatü i nhaa ore nax guxü̃ma i ngẽma duü̃xü̃gü i ngexwaca̱x tá ingóetanüxü̃ cuxna cua̱xãchiexü̃ca̱x rü guxü̃gutáma cuxü̃ yacua̱xüü̃güxü̃ca̱x i guxü̃ma i nachixü̃anecüã̱xgü.
