Salmo 46:1-11
Tórü poxü̃ruxü̃ ya Tupana rü tatanüwa nangexma
46 Rü nüma ya Tupana rü tórü poxü̃ruxü̃ nixĩ rü tórü poraxẽẽruxü̃ nixĩ. Rü nüma rü tüxü̃ narüngü̃xẽẽ ega guxchaxü̃ taxca̱x ínguxgux.
2 Rü ngẽmaca̱x taxuca̱xma tamuü̃e ega woo nhama i naane rü nangĩãchigu rü ma̱xpǘnegü rü márchiütamagu nayixgu.
3 Rü woo naxãũgachiügutama i ngẽma már rü poraãcü nayuapegu rü ngẽmaãcü ya yima ma̱xpǘnegü rü nidu̱xrue nagagu nax nanuxü̃ i ngẽma már, notürü i yixema rü taxuca̱xma tamuü̃e.
4 Rü wüxi i natü rü nachacüügümaxã nanataãxẽxẽxẽ ya yima Tupanaarü ĩane ya Yerucharéü̃. Rü yima ĩane rü naxüünexü̃chi rü yimawa nixĩ i nangexmaxü̃ ya Tupana ya guxãétüwa ngẽxmacü.
5 Rü nüma ya Tupana rü ngẽxma naxãchiü̃ rü namaxã napora. Rü nüma rü guxü̃ma i ngunexü̃ i noxri yangunegu rü nüxü̃ narüngü̃xẽẽ.
6 Rü ngẽma nachixü̃anegü rü nügümaxã nanue rü nügü naxãxũnegü. Notürü ngẽxguma Tupana idexagu rü ngẽma ãẽ̱xgacügü rü nidu̱xrue rü ngẽma waixümü rü nananguxmüãchiane.
7 Rü nüma ya Cori ya Tupana ya guxãétüwa ngẽxmacü rü tatanüwa nangexma. Rü yimá Yacúarü Tupana nixĩ ya tórü poxü̃ruxü̃ ixĩcü.
8 ¡Rü nua ípeyada̱u̱x i ngẽma taxü̃ i ãũcümaxü̃ i Cori ya Tupana nhama i naanewa üxü̃!
9 Erü guxü̃wama i nhama i naanewa rü marü inayanaxoxẽxẽ ga nügü nax nadaixü̃ i duü̃xü̃gü rü nüxü̃́ nayachixegüxẽxẽ ya norü würagü rü naigü ya naxnegü. Rü yima nawexü̃gü ya daiwa namaxã naxĩxü̃ne rü ínanagu.
10 Rü nüma ya Tupana rü nhanagürü: “Pa Nachixü̃anegüarü Ãẽ̱xgacügüx ¡rü choxü̃́ iperüxĩnüe! ¡Rü nagu perüxĩnüe nax chama rü Tupana chixĩxü̃! Rü chama nixĩ i namaxã ichacuáxü̃ i guxü̃ma i nachixü̃anegü. Rü chama nixĩ i guxü̃ma i nhama i naaneétüwa changexmaxü̃”, nhanagürü.
11 Rü Cori ya Tupana ya guxãétüwa ngẽxmacü rü tatanüwa nangexma. Rü nümatama nixĩ i Yacúarü Tupana yixĩxü̃. Rü nüma nixĩ i tórü poxü̃ruxü̃ yixĩxü̃.
