Salmo 48:1-14
Namexechi ya Tupanaarü ĩane ya Chiã́ũarü ma̱xpǘnewa ngexmane
48 Rü nüma ya Cori ya Tupana rü guxãétüwa nangexma rü nüxü̃ nacua̱xüchi. Rü ngẽmaca̱x name nax nüxü̃ icua̱xüü̃güxü̃ nawa ya yima norü ĩane ya norü ma̱xpǘne ya üünene ya Chiã́ũwa ngexmane.
2 Namexechi ya yima ma̱xpǘne ya Chiã́ũ i nórchiwaama ngexmane. Rü yima nixĩ ya namaxã nataãxẽgüne i guxü̃ma i duü̃xü̃gü i nhama i naanewa maxẽxü̃. Rü yimawa nixĩ i nangexmaxü̃ i norü ĩane ya yimá ãẽ̱xgacü ya guxãétüwa ngẽxmacü.
3 Rü Yerucharéü̃wa ngexmane ya ãẽ̱xgacüpatagüwa nixĩ i nangexmaxü̃ ya Tupana. Rü nüma ya Tupana rü nügü nango̱xẽxẽ nax yima ĩanearü poxü̃ruxü̃ ya aixcuma mecü yixĩxü̃.
4 Rü nhama i naanecüã̱x i nachixü̃anegüarü ãẽ̱xgacügü rü nügümaxã nangutaque̱xegü rü wüxigu yima ĩaneca̱x ínayachõõchi.
5 Notürü yexguma nüxü̃ nadaugügu rü poraãcü naba̱i̱xãchiãxẽgü rü nibuxmü.
6 Rü poraãcü namuü̃e. Rü nanaxĩ̱xãchiãẽgü nhama wüxi i nge i ixíxraxacüchaü̃cürüxü̃.
7 Rü nüma ya Tupana rü wüxi ya taxüchicü ya buanecü ya léstewaama ne namuãcümaxã inanayixẽxẽ ya yima Tárchiacüã̱xgüarü wapurugü ya tórü daiwa ĩxü̃ne.
8 Rü yima Tupanaarü ĩane ya Yerucharéü̃ rü namexechi yema tórü o̱xigüwa nüxü̃ taxĩnüechigaxü̃rüxü̃. Rü nhu̱xmax i yixema rü ta rü taxetümaxãxü̃chi nüxü̃ tadaugü i ngẽma. Rü nümatama ya Tupana ya guxãétüwa ngẽxmacü rü guxü̃gutáma yima ĩanexü̃ ínapoxü̃.
9 Pa Tupanax, rü nua cupatawa tangexmagügu rü nüxna tacua̱xãchie nax nhuxãcü poraãcü toxü̃ cungechaü̃xü̃ i cumax.
10 Pa Tupanax, guxü̃wama i nhama i naanewa rü cuxü̃ nicua̱xüxü̃gü, erü woetama ngẽmaãcü nixĩ i cuxna üxü̃. Rü ngẽma curü poramaxã nixĩ i mea tomaxã icucuáxü̃.
11 Rü name nixĩ i petaãxẽgüxü̃, Pa Yerucharéü̃cüã̱xgüx rü Guxãma i Pemax i Yudáanecüã̱xgüx. Erü nüma ya Tupana rü aixcuma mexü̃ pemaxã naxuegu.
12 ¡Rü ẽcü, nüxü̃ ípeyachoegu ya yima ĩane rü peyaxugü ya yima norü tórregü rü nhuxre yixĩxü̃!
13 ¡Rü mea penangugü i ngẽma norü poxeguxü̃tapü̱xügü rü yima ãẽ̱xgacüpatagü nax pexü̃́ natauxchaxü̃ca̱x nax namaxã nüxü̃ pexuchigaxü̃ i ngẽma petaagü!
14 Erü nüma ya Tupana rü guxü̃gutáma tórü Tupana nixĩ. Rü nüma rü guxü̃gutáma mea tamaxã inacua̱x.
