Salmo 49:1-20
Tórü maxü̃ rü tama diẽrumaxã naxca̱x tataxe
49 ¡Dücax, rü mea iperüxĩnüe i nhaa ore, Pa Guxü̃ma i Duü̃xü̃gü i Nhama i Naanewa Maxẽxü̃x!
2 Rü guxãma i pema i diẽruã̱xgüxe, rü pema ya ingearü diẽruã̱xgüxe, rü pema i duü̃xü̃gümaxã icua̱xgüxe, rü pema i togüme̱xẽwa ngẽxmagüxe ¡rü mea iperüxĩnüe i nhaa ore!
3 Rü nhu̱xmax rü tá chidexa namaxã i ore i aixcuma cua̱x tüxna ãxü̃ rü tá nüxü̃ chixu i ngẽma ĩnü i aixcuma Tupanaarü cua̱xwa ne ũxü̃.
4 Rü mexü̃ i cua̱xãchixẽẽruü̃gügu tá charüxĩnü rü árpamaxã chapaxetaxãcü ore i ẽxü̃guxü̃chiga tá chawiyae.
5 ¿Rü ta̱xacüca̱x tá chamuü̃ i ngẽxguma ínangugügu i ngunexü̃gü i ãũcümaxü̃ rü ngẽxguma ngẽma chauxchi aiexü̃ i duü̃xü̃gü choxü̃ íchomaeguãchigu namaxã i norü chixexü̃gü?
6 Rü nümagü rü norü diẽruguama narüxĩnüe rü muxü̃ i norü ngẽmaxü̃gümaxã nügü nicua̱xüxü̃gü.
7 Notürü taxúema tüxü̃́ natauxcha nax tügütama tamaxẽẽxü̃ rüe̱xna Tupanaaxü̃́ tanaxütanüxü̃ nax tüxü̃ namaxẽẽxü̃ca̱x.
8 49:8-9 Rü taxuxü̃ma i diẽru ningu nax naxca̱x itaxexü̃ca̱x i wüxi i duü̃xü̃arü maxü̃ nax ngẽmaãcü nüxna ínanguxuchixü̃ca̱x i yu rü guxü̃guma namaxechaxü̃ca̱x.
9 Nüü̃ nadau 49:8
10 Rü nhu̱xmax rü nüxü̃ tadau nax guxü̃ma i duü̃xü̃gü yuexü̃ woo i ngẽma nüxü̃ cua̱xüchigüxü̃ rü nayue, rü woo i ngẽma naechitamare maxẽxü̃ rü nayue rü ngẽma norü ngẽmaxü̃gü rü togüca̱x ngẽ́ma nawogü.
11 Rü ngẽma diẽruã̱xgüxü̃ rü nügügu nanaxüéga i ngẽma norü naane nhama guxü̃gutáma noxrü yixĩxü̃rüxü̃. Notürü ngẽxguma nayu̱xgux rü ngẽma naxmaxü̃ tá nixĩ i napata ixĩxü̃ i guxü̃gutáma.
12 Rü wüxi ya yatü rü tama nixĩ i namaxechaxü̃ ega woo nadiẽruã̱xü̃chigux, erü nhama naexü̃gürüü̃tama nayu.
13 Rü ngẽmaãcü nixĩ i nayuexü̃ i ngẽma duü̃xü̃gü i nügügu yaxõgüxü̃, rü ngẽmaãcütama nayue i ngẽma duü̃xü̃gü i nügütama icua̱xüü̃güxü̃.
14 Rü yu nixĩ i namaxã icuáxü̃ i ngẽma duü̃xü̃gü erü naxmaxü̃wa nanagagü nhama carnérugü igagüxü̃rüxü̃. Notürü ngẽma ngunexü̃ i nagu yuwa ínadagüxü̃gu i duü̃xü̃gü rü ngẽma mea maxẽxü̃ rü tá ngẽma chixri maxẽxü̃maxã inacua̱xgü. Erü ngẽma chixri maxẽxü̃ i duü̃xü̃gü rü ngẽma nügü namaxã yacua̱xüü̃güxü̃, rü ngẽxma tá nayacua̱x i ngẽxguma nayuegu, erü taxucürüwa nayana i norü ngẽmaxü̃gü.
15 Notürü nüma ya Tupana tá nixĩ i yuwa choxü̃ ínanguxuchixẽẽxü̃, erü nügüxü̃tawa tá choxü̃ naga.
16 ¡Rü tauxü̃́ i naxca̱x quixa̱u̱xãchixü̃ ega texé muarü diẽruã̱xgu rü yamuxgu i norü meruü̃gü i napatawa!
17 Erü ngẽxguma nayu̱xgux rü taxucürüwatáma ta̱xacü ninge. Rü woo i ngẽma norü meruü̃gü rü taxũtáma naxmaxü̃wa namaxã naxũ.
18 49:18-19 Rü woo nhu̱xmax nax maxü̃gux rü nataãxẽ, rü duü̃xü̃gü rü nüxü̃ nicua̱xüxü̃gü naxca̱x i norü ngẽmaxü̃gü, notürü wüxi i ngunexü̃gu rü tá nayu rü marü tagutáma nhamaarü ngóonexü̃xü̃ nadau.
19 Nüü̃ nadau 49:18
20 Rü wüxi i duü̃xü̃ rü tama namaxecha ega woo namuarü ngẽmaxü̃ã̱xgux, rü nayuama nhama naexü̃gürüü̃tama.
