Salmo 5:1-12
Tupanamaxã itanaxügü i ngunexü̃
5 5:1-2 Pa Corix, Pa Chorü Ãẽ̱xgacüx, Pa Chorü Tupanax ¡choxü̃́ nüxü̃ naxĩnü i nhaa chorü dexa i cumaxã nüxü̃ chixuxü̃! ¡Rü choxü̃́ nayaxu i nhaa chorü yumüxẽ i auxãcüma cumaxã nüxü̃ chixuxü̃! ¡Rü nüxü̃ naxĩnü i ngẽma cuxna naxca̱x chaca̱xü̃! Erü cumaxã nixĩ i nüxü̃ chixuxü̃ i chorü yumüxẽwa.
2 Nüü̃ nadau 5:1
3 Rü exü̃wa noxri yangóonegu rü tá nüxü̃ cuxĩnü i chauga. Rü pa̱xmama tá cumaxã nüxü̃ chixu i ta̱xacü nixĩ i chanaxwa̱xexü̃. Rü íchanangu̱xẽxẽ nax choxü̃ cungãxü̃xü̃.
4 Rü nüxü̃ chacua̱x, Pa Tupanax, rü tama namaxã cutaãxẽ i ta̱xacürü chixexü̃. Rü ngẽma duü̃xü̃gü i chixri maxẽxü̃ rü taxucürüwama cuxü̃tawa nangexmagü.
5 Rü cupe̱xewa rü nangechica i ngẽma nügü icua̱xüü̃güxü̃. Rü cuma rü naxchi cuxai i ngẽma chixexü̃ ügüxü̃.
6 Rü ngẽma idorata̱a̱xgüxü̃ rü cunadai. Rü cuma rü nüxü̃ cuxo i ngẽma cuechitawa̱xegüxü̃ rü máetagüxü̃.
7 Notürü i chamax rü curü ngechaü̃gagu choxü̃́ natauxcha nax nagu chaxücuxü̃ ya yima cupata. Rü choxü̃́ natauxcha nax cuxü̃ changechaü̃ãcüma cuxü̃ chicua̱xüüxü̃ i ngẽxguma cupata ya üünene íngexmaxü̃guama chadawenügu.
8 Pa Corix ¡choxna nadau naxcha̱xwa i ngẽma chorü uanügü! ¡Rü curü namawaama choxü̃ naxũxẽxẽ nax tama ta̱xacüca̱x choxü̃ yaxugüexü̃ca̱x!
9 Erü ngẽma chorü uanügü rü taguma nhuxgu aixcumaxü̃ nixugü. Rü chixexü̃guxicatama narüxĩnüe. Rü ngẽma naã̱x rü nhama wüxi i yuetamaxü̃ i ngenaxü̃rüxü̃ nixĩ. Rü yimá norü conü rü nidorata̱a̱x.
10 Rü ngẽmaca̱x, Pa Chorü Tupanax ¡napoxcue i ngẽma duü̃xü̃gü! ¡Rü naxoxẽxẽ i ngẽma chixexü̃ i nagu naxĩnüexü̃! ¡Rü norü pecádugügagu nüxü̃ naxo, erü cumaxã nixĩ i nanuexü̃!
11 Notürü guxãma ya yíxema naxca̱x daugüxe i curü ngü̃xẽẽ rü tataãxẽgü. Rü guxü̃guma taãxẽãcüma tawiyaegü erü cuma rü tüxü̃ ícupoxü̃. Rü guxãma ya yíxema cuxü̃ ngechaü̃güxe rü cugagu tataãxẽgü.
12 Erü cuma rü mexü̃ tümamaxã cuxuegu ya yíxema aixcuma cuga ĩnüxe rü ngẽma curü ngechaü̃ rü tümaarü poxü̃ruxü̃ nixĩ.
