Salmo 50:1-23
Tupana tá nixĩ ya nüxna ca̱xcü i ngẽma mea maxẽxü̃ rü ngẽma chixri maxẽxü̃
50 Rü nüma ya Cori ya Tupana ya guxãétüwa ngẽxmacü rü nidexa rü naxca̱x nangema i guxü̃ma i duü̃xü̃gü i nhama i naanewa ngẽxmagüxü̃.
2 Rü nüma ya Tupana rü yima mexechine ya napata ya Chiã́ũwa ngexmanewa norü üünemaxã nanangóonexẽxẽ.
3 Rü nüma ya tórü Tupana rü nua naxũ. Notürü tama bexma ínangu erü nape̱xewa nangexma i wüxi i üxüema i tüxü̃ iguxü̃, rü nacüwawa nangexma ya buanecü ya tacü.
4 Rü dauxü̃wa rü Tupana naxca̱x nangema i ngẽma dauxü̃cüã̱x rü nhama i naanecüã̱x nax inadaunüxü̃ca̱x i ngẽxguma norü duü̃xü̃gü i Iraéutanüxü̃güxü̃ yacagügux.
5 Rü nhanagürü nüxü̃: “¡Penangutaque̱xexẽxẽ i ngẽma duü̃xü̃gü i norü ãmaregü i cha̱u̱xca̱x yaguxü̃maxã chamaxã ixunetagüxü̃ nax aixcuma chauga naxĩnüexü̃!” nhanagürü.
6 Rü ngẽma dauxü̃cüã̱xgü rü nüxü̃ nixugü nax nüma ya Tupana rü ãẽ̱xgacü ya aixcuma mecümacü nax yixĩxü̃ erü meama norü duü̃xü̃gümaxã inacua̱x.
7 Rü nüma ya Tupana rü nhanagürü: “Pa Chorü Duü̃xü̃gü i Iraéutanüxü̃güx ¡rü iperüxĩnüe! Rü nhu̱xmax rü tá pemaxã chanango̱xẽxẽ i ngẽma perü chixexü̃. Rü dücax, chaxicatama nixĩ i Tupana chixĩxü̃. Rü chamatama nixĩ i perü Tupana chixĩxü̃.
8 Rü nhu̱xmax rü tama pexü̃ chapoxcu naxca̱x i ngẽma ãmaregü i guxü̃guma cha̱u̱xca̱x pedaixü̃ rü cha̱u̱xca̱x ípeguxü̃.
9 Rü tama pexna naxca̱x chaca i ngẽma wocaxacü i yatüxü̃ rü carnéruxacü i yatüxü̃ i perü naxpǘü̃cüã̱x ixĩxü̃.
10 Erü choxrügü nixĩ i guxü̃ma i naexü̃gü i naixnecücüã̱x ixĩgüxü̃, rü ngẽxgumarüxü̃ ta i ngẽma wocagü i máxpü̱xanexü̃wa ngẽxmagüxü̃.
11 Rü choxrügü nixĩ i ngẽma werigü i ma̱xpǘneanecüã̱xgü, rü guxü̃ma i ngẽma nhama i naanewa aexü̃ rü naxüanexü̃.
12 Rü ngẽxguma chi chataiyaxgu i chama rü taxũchima pemaxã nüxü̃ chixu erü choxrü nixĩ i nhama i naane namaxã i guxü̃ma i ta̱xacü i nawa ngẽxmagüxü̃.
13 ¿Ẽ̱xna pema nüxü̃ pecua̱xgu rü wocamachimaxã chaxãwemüxü̃ rü namaxã chaxaxexü̃ã́xü̃ ya yimá nagü i wocaxacü i yatüxü̃?
14 Rü ngẽma ãmare i chanaxwa̱xexü̃ nixĩ nax moxẽ choxna pexãxü̃ rü aixcuma peyanguxẽẽxü̃ i ngẽma perü uneta.
15 ¡Rü cha̱u̱xca̱x peca ega ngẽxguma guxchaxü̃ pexü̃ ngupetü̱xgux! Rü chama rü tá pexü̃ íchapoxü̃ rü pema rü tá choxü̃ pecua̱xüxü̃gü”, nhanagürü ya Tupana.
16 50:16-17 Notürü ngẽma chixexü̃ ügüxü̃ rü Tupana rü nhanagürü nüxü̃: “¿Ta̱xacüwa i cuxü̃́ namexü̃ nax nüxü̃ cucua̱xmarexü̃ i ngẽma chorü mugü rü nüxü̃ quixumarexü̃ i ngẽma chorü uneta, notürü tama namaxã cutaãxẽgu i ngẽxguma cuxü̃ chaxucu̱xẽgu rü tama nüxü̃ cucuáxchaü̃gu i ngẽma chorü ore?
17 Nüü̃ nadau 50:16
18 Notürü taãxẽãcü cunayaxu i ngẽma ngĩ́ta̱a̱xgüxü̃ rü namaxã cuxãmücü i ngẽma duü̃xü̃gü i naxma̱xechita nai i ngemaxã maxẽxü̃.
19 Rü ngẽxguma quidexa̱xgu rü chixexü̃ i dexa ícuxuxü̃xẽxẽ, rü curü conü rü doraxü̃ nixu.
20 Rü ngẽxguma ícurüto̱xgu, rü chixri nachiga quidexa ya cuenexẽ. Rü yimá cuenexẽxü̃chi rü namaxã cuguxchiga.
21 Rü guxü̃ma i ngẽma nixĩ i ngẽma cuxüxü̃, rü chama rü ngẽ́ma changeã̱xmare. Rü cuma nagu curüxĩnügu rü marü nüxü̃ icharüngüma i ngẽma cuxüxü̃. Notürü i nhu̱xmax rü tá cupe̱xewa chanango̱xẽxẽ i ngẽma chixexü̃ icuxüxü̃ rü tá naxca̱x cuxna chaca.
22 ¡Dücax i pemax nax choxü̃ iperüngümaexü̃! ¡Rü cha̱u̱xca̱x pewoegu naxü̃pa nax pexü̃ chadaixü̃ rü taxúema pexü̃ ípoxü̃xü̃!
23 Rü choxü̃ ticua̱xüxü̃ ya yíxema moxẽ choxna ãxẽ. Rü chama rü tüxü̃ chamaxẽxẽ ya yíxema aixcuma chauga ĩnüxe”, nhanagürü ya Tupana.
