Salmo 51:1-19
Yumüxẽ nax Tupana pecáduxü̃ rüngümaxü̃ca̱x
51 Pa Tupana ya Choxü̃ Ngechaü̃wa̱xecü rü Mecümacüx ¡cuxü̃́ changechaxü̃tümüxü̃! ¡Rü curü ngechaü̃gagu rü choxü̃́ nüxü̃ irüngüma i chorü pecádugü!
2 ¡Rü choxü̃́ nayaxu i nhaa chorü ãũãchixü̃! ¡Rü choxü̃́ nüxü̃ irüngüma i chorü pecádugü!
3 Rü chamatama chaugü íchicua̱x nax aixcuma wüxi i ãne yixĩxü̃ i ngẽma chaxüxü̃. Rü ngẽma chorü pecádugagu rü ngunecü rü chütacü rü choxü̃ nachixeãxẽecha.
4 Rü cupe̱xewatama nixĩ i chanaxüxü̃ i ngẽma taxü̃ i chixexü̃ i nagagu choxü̃ cupoxcuxü̃. Rü ngẽmaca̱x i ngẽma poxcu i chamaxã cuxueguxü̃ rü aixcuma name rü taxucürüwa texé nüxü̃ tixu nax chixri choxü̃ cungugüxü̃.
5 Rü aixcuma nixĩ nax wüxi i chixexü̃ chixĩxü̃ ga noxritama chabuxgu rü woetama pecáduwa chayaxĩxĩchi ga chauéanüwa.
6 Cuma rü aixcuma nüxü̃ cungechaü̃ i ngẽma duü̃xü̃ i aixcuma cumaxã nüxü̃ ixuxü̃ i norü pecádugü. Rü ngẽmaca̱x chanaxwa̱xe i choxna cunaxã i cua̱x nax aixcumaxü̃ cumaxã chixuxü̃ca̱x.
7 ¡Rü ẽcü ngẽma maxcuruü̃maxã choxü̃ namaxcuxü̃ne nax iyanaxoxü̃ca̱x i chorü chixexü̃! Rü ngẽmaãcü wena cupe̱xewa tá chame rü ngẽma caixanexü̃ i cómüxü̃arü yexera tá nacómüxü̃ i chorü maxü̃.
8 Rü woo choxü̃ nax cupoxcuchiréxü̃ naxca̱x i chorü chixexü̃, notürü i nhu̱xmax rü chanaxwa̱xe i wena cha̱u̱xca̱x cunatáeguxẽxẽ i chorü taãxẽ.
9 ¡Rü ẽcü choxü̃́ nüxü̃ irüngüma i chorü pecádugü rü tauxü̃́ i nüxü̃ cudawenüxü̃!
10 Pa Tupanax ¡ĩnü i mexü̃ chauãẽwa nanguxẽxẽ! ¡Rü choxna naxã i wüxi i naãxẽ i ngexwaca̱xü̃xü̃ i cumaxã ixaixcumaxü̃!
11 ¡Rü tauxü̃́ i choxü̃ cuxoxü̃! ¡Rü tauxü̃́ i choxna cuyaxũgachixẽxẽxü̃ i Cuãxẽ i Üünexü̃!
12 51:12-13 ¡Ẽcü wena cha̱u̱xca̱x natáeguxẽxẽ i ngẽma taãxẽ ga noxri choxü̃́ yexmaxü̃ nagagu nax choxü̃ cumaxẽẽxü̃! ¡Rü choxü̃ naporaxẽxẽ nax nhu̱xmawena rü aixcuma cuga chaxĩnüxü̃ca̱x rü ngẽmaãcü chanangúexẽẽxü̃ca̱x i ngẽma chauxrüxü̃ pecádu ügüxü̃ nax nümagü rü ta nüxü̃ naxoexü̃ca̱x i norü chixexü̃ rü cuxca̱x nawoeguxü̃ca̱x!
13 Nüü̃ nadau 51:12
14 Pa Tupana ya Chorü Maxẽẽruxü̃x ¡choxü̃ ínanguxuchixẽxẽ nawa i ngẽma nax chamáxwa̱xexü̃! Rü wiyaeãcü tá nüxü̃ chixu nax cuma rü aixcumacü quixĩxü̃.
15 Pa Corix ¡ẽcü choxü̃ ichoxẽxẽ nax cuxca̱x chawiyaexü̃ca̱x rü ngẽmaãcü cuxü̃ chicua̱xüüxü̃ca̱x!
16 Erü cuma rü tama cunaxwa̱xe nax ta̱xacürü ãmare cuxca̱x iguxü̃. Rü chama rü chi cuxna chanaxã, notürü tama ngẽma nixĩ i namaxã cutaãxẽxü̃.
17 Rü ngẽma cuma cunaxwa̱xexü̃, Pa Tupanax, nixĩ i wüxi i duü̃xü̃ i aixcuma norü maxü̃wa nüxü̃ rüxoxü̃ i chixexü̃. Rü cumax, Pa Tupanax, rü tama nüxü̃ cuxo i ngẽma duü̃xü̃ i nügümaxã nangechaü̃ãcüma cumaxã nügü ixuxü̃ nax nachixexü̃.
18 Pa Cori Pa Tupanax ¡cuxü̃́ nangechaxü̃tümüxü̃ ya yima cupata ya Chiã́ũwa ngexmane erü nüxü̃ cungechaü̃! ¡Rü curü duü̃xü̃güxü̃ rüngü̃xẽxẽ rü ínapoxü̃ ya Yerucharéü̃!
19 Rü ngẽxguma marü cupe̱xewa chamexgux, rü ngẽxguma rü tá choxü̃́ cunayaxu i ngẽma ãmaregü i wocagü i tá cuxca̱x chadaixü̃ rü íchaguxü̃. Rü nhu̱xũchi i duü̃xü̃gü rü tá curü ãmarearü guchicaxü̃wa cuxca̱x nayagugü i wocaxacügü.
