Salmo 52:1-9
Natüca̱xma nügü nicua̱xüxü̃ i ngẽma duü̃xü̃ i chixri maxü̃xü̃
52 Pa Yatü i Poraxü̃x ¿tü̱xcüü̃ cugü quicua̱xüxü̃ namaxã i ngẽma chixexü̃ i cuxüxü̃ nape̱xewa i ngẽma Tupanaarü duü̃xü̃gü i nüma guxü̃guma nüxü̃ nangechaxü̃xü̃?
2 Rü cuma rü chixexü̃arü üguxicatama curüxĩnü. Rü yimá curü conü rü naxãũcüma nhama wüxi i cüxchi i te̱xechixü̃rüxü̃.
3 Rü cuma rü chixexü̃guama curüxĩnü. Rü ngẽma mexü̃arü yexera cunaxwa̱xe i ngẽma chixexü̃. Rü ngẽma ore i aixcuma ixĩxü̃arü yexera curü me nixĩ i ngẽma dora.
4 Rü curü me nixĩ nax curü conümaxã to̱xguã̱xü̃ quixuxü̃ rü curü me nixĩ nax nüxü̃ quixuxü̃ i doramare i to̱xguã̱xchiga ixĩxü̃.
5 Notürü nüma ya Tupana rü ngẽmaca̱x tá cuxü̃ napoxcu, rü tagutáma ngẽmawa ícunguxuchi. Rü tá cupatawa cuxü̃ ínata̱xüchi, rü tá cuxna nanayaxu i curü maxü̃.
6 Rü ngẽma duü̃xü̃gü i Tupanaga ĩnüexü̃ rü ngẽxguma nüxü̃ nadaugügu i ngẽma, rü tá poraãcü namuü̃e. Rü tá cuxü̃ nacugüe rü nhanagürügü tá:
7 “¡Dücax, nüxü̃ peda̱u̱x i ngẽma duü̃xü̃ i tama Tupanaga ĩnüchaü̃xü̃ rü ngẽma norü ngẽmaxü̃gügu yaxõxü̃ rü chixexü̃guama maxü̃xü̃!” nhanagürügü tá.
8 Notürü i chama rü nhama wüxi i nanetü i oríwa i bacaxü̃ i Tupanapataa̱xtügu toxü̃rüxü̃ chixĩ. Rü ngẽmaca̱x guxü̃gutáma norü ngechaxü̃gu chayaxõ.
9 Pa Tupanax, chama rü guxü̃gutáma moxẽ cuxna chaxã naxca̱x i ngẽma cuxüxü̃. Rü nape̱xewa i ngẽma aixcuma cuga ĩnüexü̃ rü tá mea cuxü̃ íchanangu̱xẽxẽ, erü chamaxã cumecüma.
