Salmo 53:1-6
Duü̃xü̃güarü chixexü̃chiga
53 Rü ngẽma duü̃xü̃gü i naechita maxẽmarexü̃ rü nhanagürügü: “Nataxuma ya Tupana”, nhanagürügü. Rü guxü̃ma i duü̃xü̃gü rü chixexü̃gu narüxĩnüe rü chixexü̃ naxügü. Rü tataxuma ya texé ya mexü̃ üxe.
2 Rü nüma ya Tupana rü dauxü̃wa duü̃xü̃güxü̃ nadawenü nax nüxü̃ nacuáxü̃ca̱x rü tayíxema ya aixcuma tümaãẽxü̃ cuáxe rü naga ĩnüxe rü naxca̱x dáuxe.
3 Notürü guxü̃ma i duü̃xü̃gü rü Tupanana nixĩgachitanü rü guxü̃ma chixexü̃gu narüxĩnüe. Rü marü tataxuma ya texé ya mexü̃ üxe, rü bai ya wüxíe.
4 Rü ngẽma chixexü̃ ügüxü̃ rü nangeãxẽgümare rü paxama nanachixexẽxẽ i chorü duü̃xü̃gü. Rü ngẽma duü̃xü̃gü i tama Tupanaga ĩnüexü̃ rü chorü duü̃xü̃güxü̃ inarüxoxẽẽgü nhama poũ ingõ̱xgu rü iyanaxoxẽẽxü̃rüxü̃. Rü ngẽmaãcü nixĩgü i ngẽma duü̃xü̃gü i tama Tupanaxü̃ cua̱xgüxü̃.
5 Rü woo i nhu̱xmax rü taxuxü̃ma namuü̃e i nümagü, notürü wüxi i ngunexü̃ rü tá muü̃maxã nidu̱xrue. Erü nüma ya Tupana rü norü uanügüchina̱xãmaxã nanawoone. Rü ngẽmaãcü tá wüxi i cugüxü̃ nixĩgü erü nüma ya Tupana rü marü nüxü̃ naxo.
6 Chierü yima ma̱xpǘne ya Chiã́ũwa ne naxũxgu i Iraéutanüxü̃güarü maxẽxẽẽruxü̃. Rü ngẽxguma nümatama ya Tupana nügüca̱x nawoeguxẽẽgu i ngẽma norü duü̃xü̃gü rü ngẽxguma tá nixĩ i nawoeguxü̃ i guxü̃ma i chautanüxü̃ i Iraéutanüxü̃gü i Yacútaagü ixĩgüxü̃.