Salmo 55:1-23
Wüxi ya yatü ya nawe yangexü̃tanü̃cüarü yumüxẽ
55 Pa chorü Tupanax ¡nüxü̃ naxĩnü i chorü yumüxẽ rü tauxü̃́ i cugü iquicúxü̃ naxcha̱xwa i ngẽma cuxna naxca̱x chaca̱xü̃!
2 ¡Rü chauga naxĩnü erü ngúxü̃ chingeyane cuxna chaca!
3 Rü ngẽma naga i chorü uanügü i chixexü̃gü rü choxü̃ nidu̱xru̱xẽxẽ. Rü poraãcü choxü̃ nanaxĩ̱xãchiãẽxẽẽgü rü nuãcüma cha̱u̱xca̱x nibuxmü.
4 Rü chiyuxnearü maxü̃neã̱x erü poraãcü chamuü̃ nüxü̃ i ngẽma yu i choxna nguxü̃.
5 Rü poraãcüxüchi muü̃ choxna nangu rü ngẽmaca̱x ngẽma muü̃maxã chidu̱xru̱x.
6 Rü ngẽmaca̱x nhachagürü: “Chierü nhama muxtucurüxü̃ chaxãxpe̱xátügu rü ngẽxguma rü chi chigoe nax naxcha̱xwa chinhaxü̃ca̱x rü ngexta charüngü̃xü̃ca̱x.
7 55:7-8 Rü yáxü̃guxü̃ i chianexü̃wa chi chanha rü ngẽxma chi charüxã̱ũ̱x, rü paxa chi chanhaãchi nax chaugü ichayarücúxü̃ca̱x naxcha̱xwa i ngẽma guxchaxü̃gü i nhama buanecü ya poraxüchicürüxü̃ cha̱u̱xca̱x ngẽ́ma ne ũẽmaxü̃”, nhachagürü.
8 Nüü̃ nadau 55:7
9 Pa Corix ¡nadai i ngẽma chamaxã rüxuanügüxü̃! ¡Rü noxrütama dexagu ínatüexẽxẽ! Erü ngẽma nüxü̃ chadauxü̃ nixĩ nax nügü nadaixü̃ rü yapuraexü̃.
10 Rü chütacü rü ngunecü rü ĩanexü̃ ínayachoegu, rü ngẽmaãcü norü chixexü̃maxã nayapaxẽxẽ ya yima ĩane. Rü ngẽmaca̱x rü duü̃xü̃gü rü ãẽ̱xgacümaxã nanue rü ãẽ̱xgacüaxü̃́ nanaxütanü nax tama napoxcuexü̃ca̱x ega woo ta̱xacürü chixexü̃ naxüegu.
11 Rü yima ĩanearü ĩtamügü rü namaxã nanapá i máetagüxü̃ rü dorata̱a̱xgüxü̃.
12 Rü ngẽxguma wüxi i chorü uanü chamaxã nuxgu, rü chama rü chi yaxna namaxã chaxĩnü. Rü ngẽxguma chi ngẽma chauxchi aiexü̃ choxü̃ imáxchaü̃gu, rü chama rü chi naxcha̱xwa ichicu̱x.
13 55:13-14 Notürü cumatama, Pa Chomücüxüchichire̱x Ixĩxex, nixĩ i cuchauechitaexü̃ woo wüxigu Tupanapatawa nax ixĩxĩĩxü̃chiréxü̃ nax yigü ingechaü̃güãcüma yigümaxã idexagüxü̃ natanüwa ga yema muxü̃ma ga duü̃xü̃gü.
14 Nüü̃ nadau 55:13
15 ¡Rü ngẽma chorü uanügü rü noxtacüma yu naxca̱x íngu rü maxü̃ãcü naxmaxü̃gu nayicu! Erü ngẽma norü chixexü̃ rü nanachixexẽẽxü̃chi i norü maxü̃.
16 Notürü i chama rü Tupanana chacaama rü nüma ya Cori rü tá choxü̃ ínapoxü̃.
17 Rü exü̃wa rü tocuchigu rü chütacü rü Tupanaxü̃ chaca̱a̱xü̃ rü nüma rü tá choxü̃ naxĩnü rü tá choxü̃ nangãxü̃ga.
18 Rü ngẽxguma chorü uanügümaxã togü tadaixgux rü nüma ya Tupana rü tá choxü̃ narüporamaexẽxẽ nax tama choxü̃ yama̱xgüxü̃ca̱x woo namuxũchigu i ngẽma chorü uanügü.
19 Rü nüma ya Tupana ya guxü̃guma ãẽ̱xgacü ixĩcü rü tá choxü̃ naxĩnü rü ngẽmaãcü tá nayaxãneãchitanüxẽxẽ i ngẽma chamaxã rüxuanügüxü̃. Erü nümagü rü tama nüxü̃ narüxoechaü̃ i nacümagü i chixexü̃ rü tama Tupanaga naxĩnüechaü̃.
20 Rü tüxü̃ nima̱xgüama ya yíxema namücüchire̱x ixĩxe. Rü ngẽmaãcü tama aixcuma nayanguxẽxẽ i ngẽma uneta i namücümaxã nüxü̃ yaxuxü̃.
21 Rü ngẽxguma yadexagügu rü namexechi i norü dexa, notürü i norü ĩnüwa rü daigu narüxĩnüe. Rü mexechixü̃ i dexamaxã nidexagüchire̱x nax ngẽmaãcü tüxü̃ ínayapuxẽxẽ, notürü ngẽma dexagü rü nhama taragü i meama téxü̃rüxü̃ nixĩgü.
22 Notürü i cumax, Pa Chomücüx ¡rü Cori ya Tupaname̱xẽwa nange̱x i curü guxchaxü̃gü! Rü nüma rü tá cuxü̃ naporaxẽxẽ. Rü tagutáma chixexü̃gu nananguxẽxẽ ya yimá yatü ya naga ĩnücü.
23 Pa Chorü Tupanax, rü ngẽma máetagüxü̃ rü idorata̱a̱xgüxü̃ rü taxũtáma ngãxü̃ i norü maxü̃wa nangugü nax namaxẽxü̃. Rü cuma rü yumaxã tá cunapoxcue. Notürü i chama rü cugu chayaxõ.
