Salmo 56:1-13
Tupanagu chayaxõ rü norü oremaxã chataãxẽ
56 Pa Chorü Tupanax ¡cuxü̃́ changechaxü̃tümüxü̃! Erü guxü̃guma nangexma i duü̃xü̃gü i chawe ingẽxü̃tanüxü̃ rü cha̱u̱xca̱x íyaxüãchixü̃ rü choxü̃ naxi̱xãchiãxẽgüxẽẽxü̃.
2 Rü ngẽma chamaxã rüxuanügüxü̃ rü guxü̃ i ngunexü̃gügu rü chawe ningẽxü̃tanü. Rü namu i ngẽma nügü rütagüxü̃ rü cha̱u̱xca̱x íyaxüãchixü̃.
3 Rü ngẽxguma chamuü̃gu rü cugu chayaxõ.
4 Rü chama rü Tupanagu chayaxõ rü norü oremaxã chataãxẽ. Rü ngẽma nax nagu chayaxõxü̃gagu rü taxuca̱xma chamuü̃. ¿Rü ta̱xacürü chixexü̃ tá chamaxã naxügüxü̃ i ngẽma chamaxã rüxuanüã̱xgüxü̃?
5 Rü ngẽma chamaxã rüxuanüã̱xgüxü̃, rü guxü̃ma i oragu rü norü dexamaxã ngúxü̃ choxü̃ ningexẽẽgü. Rü ngẽma nax chixexü̃gu choxü̃ nanguxẽẽgüxü̃xicatama nixĩ i nagu naxĩnüexü̃.
6 Rü ngextá íchaxũxü̃wa rü chawe ningẽxü̃tanü rü nuxica choxü̃ ínicu̱xẽxü̃gü. Rü ngẽmaãcü naxca̱x nadaugü nax choxü̃ yama̱xgüxü̃.
7 Rü nüma nagu naxĩnüegu rü tagutáma texé nüxü̃ tacua̱xama i ngẽma chixexü̃ i naxügüxü̃. Pa Chorü Tupanax ¡naétügu nanguxẽxẽ i curü nu, rü curü poxcumaxã yaxãneeãchitanüxẽxẽ i ngẽma duü̃xü̃gü!
8 Rü cuma rü meama nüxü̃ cucua̱x i nhuxree̱xpü̱xcüna naxcha̱xwa chinha. Rü cuma rü nuxü̃ cudau i nhuxree̱xpü̱xcüna ngúxü̃ chingexü̃ rü chaxaxuxü̃. Rü cuma rü curü poperagu cunaxümatü i guxü̃ma i ngẽma chorü guxchaxü̃gü.
9 Rü ngẽma chamaxã rüxuanüã̱xgüxü̃ rü tá cuxcha̱xwa nibuxmü i ngẽxguma curü ngü̃xẽẽca̱x cuxna chaca̱xgu. Pa Tupanax, chama rü meama nüxü̃ chacua̱x nax chauétüwa cuchogüxü̃.
10 Rü chama rü Tupanagu chayaxõ, rü norü oremaxã chataãxẽ. Rü Corigu chayaxõ rü norü oremaxã chataãxẽ.
11 Rü Tupanagu chayaxõ rü taxuca̱xma chamuü̃. ¿Rü ta̱xacürü chixexü̃ tá chamaxã naxüxü̃ i ngẽma chamaxã rüxuanüã́xü̃?
12 Pa Tupanax, cuxü̃ chicua̱xüxü̃ãcüma tá chayanguxẽxẽ i ngẽma chorü uneta i cumaxã nüxü̃ chixuxü̃.
13 Erü cuma rü yuwa choxü̃ ícunguxuchixẽxẽ rü choxü̃ ícupoxü̃ nax tama chayuxü̃ca̱x rü ngẽmaãcü cupe̱xewa chamaxü̃xü̃ca̱x.
