Salmo 57:1-11
Yumüxẽ i nawa Tupanaarü ngü̃xẽẽca̱x íica̱xü̃
57 ¡Cuxü̃́ changechaxü̃tümüxü̃, Pa Chorü Tupanax, cuxü̃́ changechaxü̃tümüxü̃! Erü cuxca̱x chinha nax choxü̃ ícupoxü̃xü̃ca̱x. Rü cupe̱xátütüü̃gu chaugü chicúxchaü̃ nhu̱xmatáta nangupetü i ngẽma ãũcümaxü̃.
2 Rü nhu̱xmax rü tá nüxna chaca ya yimá Tupana ya guxãétüwa ngẽxmacü, erü nüma rü guxü̃wama choxü̃ narüngü̃xẽẽ.
3 Rü nüma rü nixaixcuma rü poraãcü choxü̃ nangechaü̃. Rü ngẽmaca̱x dauxü̃wa tá cha̱u̱xca̱x ne nanamu i norü ngü̃xẽẽ nax naxme̱xwa choxü̃ ínanguxuchixẽẽxü̃ca̱x i ngẽma nuãcüma chawe ingẽxü̃tanüxü̃.
4 Rü ngẽxguma chapexgu rü nhama aitanüwa chapexü̃rüxü̃ chixĩ erü ãũcümaxü̃wa nangexma i chorü maxü̃. Rü ngẽma chamaxã rüxuanüã̱xgüxü̃ rü napüta rü nhama naxnegü i ãmaguxü̃rüxü̃ nixĩ rü norü conü rü nhama tara i meama waixmaguxü̃rüxü̃ nixĩ.
5 Pa Chorü Tupanax, cuma rü dauxü̃guxü̃ i naanemaxã icucua̱x rü curü üüne rü nhama i naane namaxã nanapá.
6 Ngẽma chamaxã rüxuanüã̱xgüxü̃ rü cha̱u̱xca̱x nanaxügü i wüxi i yaxruxü̃ nax ngẽmagu changuxü̃ca̱x. Rü chamaxü̃wa nanaxügü i ãxmaxü̃, notürü nümatama nagu nayi.
7 Pa Chorü Tupanax, nhu̱xmax rü chataãxẽ rü íchame nax chorü wiyaemaxã cuxü̃ chicua̱xüüxü̃.
8 Rü pa̱xmama tá ícharüda rü chorü paxetaruü̃gümaxã tá chapaxeta. Rü ngẽmaãcü tá naxca̱x ícharüda i ngẽma ngexwaca̱xü̃ i ngunexü̃.
9 Pa Cori Pa Tupanax, rü chorü wiyaegümaxã tá cuxü̃ chicua̱xüxü̃ nape̱xewa i guxü̃ma i nachixü̃anecüã̱x i duü̃xü̃gü.
10 Erü ngẽma curü ngechaü̃ rü dauxü̃guxü̃ i naanearü yexerawa nangu. Rü ngẽxgumarüxü̃ ta i curü aixcuma rü ya̱u̱xtüweanexü̃arü yexerawa nangu.
11 Pa Chorü Tupanax, cuma rü dauxü̃guxü̃ i naanemaxã icucua̱x rü curü üüne rü nhama i naane namaxã nanapá.