Salmo 58:1-11
Tupanana naxca̱x naca nax ãẽ̱xgacügü mea duü̃xü̃gümaxã inacua̱xgüxü̃ca̱x
58 Rü pexna chaca, Pa Ãẽ̱xgacügüx ¿rü pexca̱x marü meama nüxna peca̱xü̃ i ngẽma duü̃xü̃gü i chixexü̃ ügüxü̃? ¿Rü pexca̱x rü marü aixcuma nawe̱xgux i ngẽma poxcu i namaxã pexueguxü̃?
2 Rü tama ngẽmaãcü nixĩ. Erü ngẽxguma texé tümaarü guxchaxü̃ pepe̱xewa mexẽẽchaü̃gux rü tama tüxü̃́ iperüxĩnüe, notürü naga pexĩnüe i ngẽma doramare pemaxã ixuxü̃ erü pexü̃́ nanaxütanü. Rü ngẽmaca̱x pegümaxã penanúexẽxẽ i duü̃xü̃gü i pechixü̃anewa.
3 Rü ngẽma chixri maxẽxü̃ i duü̃xü̃gü rü woetama naéanüwa nixĩ i chixexü̃ nüxna nguxü̃. Rü ngẽma idorata̱xáxü̃ rü woetama taxũta nabuxgu rü ngẽma dora namaxã inacua̱x.
4 58:4-5 Rü norü dexa rü nhama ãxtapeguchatarüxü̃ tüxü̃ nima̱x. Rü nacüma rü nhama ãxtape i düraxüchixü̃ i tama norü puxẽẽruü̃arü paxetaga ĩnüchaü̃xü̃rüxü̃ nixĩ.
5 Nüü̃ nadau 58:4
6 Pa Tupanax ¡rü napoxü̃püta i ngẽma chixexü̃ ügüxü̃! ¡Rü nabüü̃ ya yima norü cuainagü i ngẽma duü̃xü̃gü i aigürüxü̃ idüraexü̃!
7 ¡Rü noxtacüma yanaxoxẽxẽ nhama wüxi i dexá i yachexü̃rüxü̃! ¡Rü nüxna nayaxu i norü maxü̃ nhama wüxi ya maxẽ ya namawa yadaxüchicürüxü̃!
8 ¡Rü nhama wüxi i meru i yarüxoxü̃rüxü̃ rü nhama wüxi i buxü̃ i naéanügu yuxü̃ rü taguma ngóonexü̃xü̃ dauxü̃rüxü̃ yaxĩxẽxẽ!
9 Rü name nixĩ nax nayuexü̃ nhama chuchuxü̃gü i paxa ixaxü̃rüxü̃. Rü name nixĩ nax curü numaxã cunadaixü̃ nhama maxẽ i woxüxü̃rüxü̃.
10 Rü ngẽma duü̃xü̃gü i aixcuma Tupanaga ĩnüexü̃ rü tá nataãxẽgü i ngẽxguma nüxü̃ nadaugügu nax napoxcuexü̃ i ngẽma chixexü̃ ügüxü̃. Rü nümagü i ngẽma mea maxẽxü̃ rü ngẽma chixexü̃ ügüxü̃güwa tá nangagü.
11 Rü nhu̱xũchi ngẽma aixcuma Tupanaarü duü̃xü̃gü ixĩgüxü̃ rü nhanagürügü tá: “Aixcuma nangexma i natanü i mexü̃ ega mea Tupanape̱xewa imaxẽgu. Rü nüma ya Tupana rü aixcuma nanapoxcue i ngẽma chixexü̃ ügüxü̃”, nhanagürügü tá.
