Salmo 59:1-17
Nüma ya Cori ya Tupana nixĩ ya tórü poxü̃ruxü̃ ixĩcü
59 Pa chorü Tupanax ¡choxü̃ ínanguxuchixẽxẽ naxme̱xwa i ngẽma chamaxã rüxuanüã̱xgüxü̃! ¡Rü nüxna choxü̃ ínapoxü̃ i ngẽma cha̱u̱xca̱x íyaxüãchixü̃!
2 ¡Rü nüxna choxü̃ ínanguxuchixẽxẽ i ngẽma duü̃xü̃gü i chixexü̃ ügüxü̃! ¡Rü choxü̃ ínapoxü̃ nüxna i ngẽma máetagüxü̃!
3 Erü nangexma i yatügü i máxwa̱xegüxü̃ i naxca̱x daugüxü̃ nax nhuxãcü choxü̃ yama̱xgüxü̃.
4 Pa Cori Pa Tupanax, taguma nhuxgu cumaxã chanu rü chixri cuga chaxĩnü rüe̱xna cupe̱xewa pecádu chaxü. Rü taxuxü̃ma i chixexü̃ chaxü. Notürü ngẽma chorü uanügü rü nanhuxãẽgü nax cha̱u̱xca̱x íyaxüãchixü̃. ¡Rü paxa nua naxũ, rü choxü̃ yarüngü̃xẽxẽ!
5 Pa Cori ya Guxãétüwa Ngẽxmacü ya Torü Tupana Ixĩcüx ¡rü paxa napoxcue i ngẽma tama cuxü̃́ yaxõgüxü̃! Rü tama chanaxwa̱xe i cuxü̃́ nangechaü̃tümüxü̃gü i ngẽma chixexü̃ ügüxü̃ rü taechitawa̱xegüxü̃.
6 Nümagü rü chütacü nanaxĩane rü ĩanemaxü̃güwa naxãũgatanü nhama airugü i nügü daixü̃rüxü̃.
7 Rü chixexü̃ i dexamaxã nanacaetanüane rü cumaxã naguchigagü rü nhanagürügü: “Rü nataxuma i ta̱xacü i tüxü̃ ĩnüxü̃”, nhanagürügü.
8 Notürü i cumax, Pa Corix, rü nüxü̃ cuxĩnü rü nüxü̃ cucugü rü cunaxãneexẽxẽ i ngẽma duü̃xü̃gü i tama cuxü̃́ yaxõgüxü̃.
9 Rü cumax, Pa Chorü Tupanax, tá nixĩ i choxna cudauxü̃ erü cuma nixĩ i chorü poxü̃ruxü̃ rü chorü daruxü̃ quixĩxü̃.
10 Rü nüma ya Tupana ya choxü̃ ngechaü̃cü rü tá choxü̃ ínayadau. Rü tá choxü̃ nüxü̃ nadauxẽxẽ nax nhuxãcü nüxü̃ naporamaexü̃ i ngẽma chamaxã rüxuanüã̱xgüxü̃.
11 ¡Rü tauxü̃́ i noxtacüma cunadaixü̃ notürü curü poramaxã namaxã nawoone rü naxãneexẽxẽ nax ngẽmaãcü i chautanüxü̃gü tama paxa nüxü̃ iyanangümaexü̃ca̱x i curü poxcu! Erü cumax, Pa Corix, rü torü daruxü̃ quixĩ.
12 Rü ngẽma duü̃xü̃gü i chixexü̃ rü guxü̃ma i norü dexawa nidora. ¡Rü ngẽma nügü nax yacua̱xüü̃gagu rü nax inaxunetanetaxü̃gagu rü napoxcu!
13 ¡Rü curü numaxã yanaxoxẽxẽ i ngẽma duü̃xü̃gü! ¡Rü noxtacüma nayuexẽxẽ nax ngẽmaãcü nüxü̃ nacua̱xgüxü̃ca̱x i duü̃xü̃gü nax cuma aixcuma Iraéutanüwa rü guxü̃ i nhama i naanewa ãẽ̱xgacü quixĩxü̃!
14 59:14-15 Rü ngẽma duü̃xü̃gü i chixexü̃ rü ngẽxguma chütacü nhama airugürüxü̃ naxãũgatanü rü ĩanegu ínayachoegu nax nawemüca̱x nadaugüxü̃ca̱x, rü tá naxauxe erü tama nüxü̃́ inguxü̃ i nawemüxü̃ i inayangaugü.
15 Nüü̃ nadau 59:14
16 Notürü i chama rü pa̱xmama tá cuxca̱x chawiyae. Rü ngẽma chorü wiyaewa rü tá nüxü̃ chixu nax cuporaxü̃ rü cuxü̃́ tangechaü̃tümüxü̃güxü̃. Erü cuma rü chorü daruxü̃ quixĩ rü cuxü̃tagu nixĩ i chaugü charücúxü̃ i ngẽxguma ãũcümaxü̃wa changexmagu.
17 Rü ngẽmaãcü tá cuxca̱x chawiyae, Pa Tupanax, erü cuma nixĩ i chorü poxü̃ruxü̃ quixĩxü̃ rü cuma nixĩ i choxna cudauxü̃. Rü aixcuma cuma nixĩ i chorü Tupana i choxü̃ cungechaxü̃xü̃.
