Salmo 6:1-10
Tupanana taca ega guxchaxü̃ taxca̱x ínguxgu
6 Pa Corix ¡tauxü̃́ i choxü̃ cuxüáxü̃ ega chaugagu cunuxgu! ¡Rü tauxü̃́ i curü nugagu choxü̃ cupoxcuxü̃!
2 Pa Corix ¡cuxü̃́ changechaü̃tümüxü̃ erü chama rü chatura! ¡Rü cha̱u̱xca̱x yataanexẽxẽ! Erü poraãcü chida̱xawe.
3 Rü nhu̱xmax rü chorü muü̃maxã chidu̱xrux. Rü cumax, Pa Cori Pa Tupanax ¿rü nhuxguxüratáta i choxü̃ curüngü̃xẽẽxü̃?
4 Pa Corix ¡nua naxũ rü cha̱u̱xca̱x yataanexẽxẽ! ¡Rü cuxü̃́ changechaü̃tümüxü̃gagu choxü̃ ínapoxü̃!
5 Erü yíxema yúxe rü marü taxucürüwa cuxna tacua̱xãchi. ¿Rü nhuxãcü tá cuxü̃ ticua̱xüxüxü̃ ya yíxema yuxe ya tümamaxü̃wa ngẽxmaxe?
6 Rü marü chipa nax chaxaxuxü̃. Rü guxü̃ i chütaxü̃gu rü poraãcü chaxaxu rü ngẽmaca̱x düxwa chauxgüxü̃etümaxã chayawaixẽxẽ i chorü cüxeruxü̃.
7 Rü ngẽma ngúxü̃ nax chingexü̃gagu rü daa chauxetügü rü marü nixogü. Rü ngẽma chorü uanügügagu rü chixogüxetü.
8 ¡Rü choxna pexĩgachi, Pa Chixexü̃arü Üruxü̃güx, erü nüma ya Cori ya Tupana rü marü nüxü̃ naxĩnü i chorü axu!
9 Rü nüma rü marü nüxü̃ naxĩnü nax nüxna chaca̱xaxü̃, rü marü choxü̃́ nanayaxu i chorü yumüxẽ.
10 Rü guxü̃ma i ngẽma chorü uanügü rü tá naba̱i̱xãchie rü namuü̃e, rü ngẽmaca̱x cugüruxü̃ tá nixĩgü. Rü ngẽmaãcü paxa norü ãnemaxã tá nibuxmü.
