Salmo 60:1-12
Yumüxẽ i nawa Tupanaarü ngü̃xẽẽca̱x íica̱xü̃
60 Pa Tupanax, cuma rü curü numaxã toxna quixũgachi rü toxü̃ cuwoone. Rü tanaxwa̱xe i wenaxarü toxca̱x cutáegu nax noxrirüxü̃ taporaexü̃ca̱x.
2 Cuma rü cunaxĩã̱xãchixẽxẽ ga nhaa naane rü yemaca̱x inangǘcuane. ¡Rü ẽcü nügüna naxĩxẽxẽ i ngẽma norü ngǘcuane nax tama nabuxü̃ca̱x!
3 Rü cuma rü taxü̃ i guxchaxü̃gü toxca̱x ícunguxẽxẽ. Rü nhama wüxi ya wíũ ya toxü̃ ãũxãẽxẽẽcürüxü̃ toxü̃ nixĩgüxẽxẽ i ngẽma guxchaxü̃gü.
4 Rü nhu̱xmax i toma nax cuga taxĩnüexü̃ rü tanaxwa̱xe i wüxi i cua̱xruxü̃ toxna cuxã nax ngẽmaãcü nüxna toxü̃ ícupoxü̃xü̃ca̱x ya yimá naxne i ngẽma torü uanügü.
5 ¡Rü toxü̃ nangãxü̃ rü curü poramaxã toxü̃ ínanguxü̃xẽxẽ i toma nax toxü̃ cungechaü̃güxü̃!
6 Rü cumax, Pa Tupanax, rü cupatawa quidexa rü nhacurügü: “Guxü̃ma i ngẽma naane i oéstewaama Chiquéü̃wa ixügüxü̃ rü nhu̱xmata léstewaama Sucóchiarü ngatexü̃wa nguxü̃ rü choxrü nixĩ.
7 Rü ngẽxgumarüxü̃ ta i Yiriáyiarü naane rü Manachéarü naane rü choxrü nixĩ. Rü ngẽma Efraĩ́arü naane i churaragü i poraxü̃ nawa ne ĩxü̃ rü choxrü nixĩ. Rü ngẽxgumarüxü̃ ta i ngẽma Yudáarü naane i Iraéutanüxü̃güarü ãẽ̱xgacügü nawa ne ĩxü̃ rü choxrü nixĩ.
8 Rü ngẽma Moábiane rü Edóü̃ane rü chautüü̃wa nangexmagü. Rü ngẽma Firitéutanüxü̃gü rü chama rü tá nüxü̃ charüporamae”, nhanagürü ya Tupana.
9 60:9-10 Pa Tupanax ¿Texé tá Edóü̃anewa choxü̃ taga? ¿Rü texé tá norü ĩane ya poranegu choxü̃ taxücuxẽxẽ i nhu̱xmax nax toxü̃ cuxoxü̃ rü marü tama torü churaragüxü̃ íquixümücüxü̃?
10 Nüü̃ nadau 60:9
11 ¡Rü torü uanügücha̱xwa toxü̃ rüngü̃xẽxẽ nax nüxü̃ tarüporamaegüxü̃ca̱x! Erü taxuwama toxü̃́ name i toxrüxü̃ i duü̃xü̃güarü ngü̃xẽẽ.
12 Notürü curü ngü̃xẽẽmaxã, Pa Tupanax, rü tá nüxü̃ tarüporamae i ngẽma torü uanügü, erü cuma rü tá cuyayitanüxẽxẽ.
