Salmo 61:1-8
Tupanagu tayaxõ erü nüma tüxü̃ ínapoxü̃
61 Pa Chorü Tupanax ¡rü choxü̃́ nüxü̃ naxĩnü i chorü yumüxẽ nax cuxna chaca̱xü̃ nhu̱xmax nax poraãcü ngúxü̃ chingexü̃! ¡Rü choxü̃ nangãxü̃!
2 Rü nhu̱xmax nax chorü naanena chayáxü̃guxü̃ rü cuxna chaca nax choxü̃ curüngü̃xẽẽxü̃ca̱x, erü guxchaxü̃ choxü̃́ nangexma. Rü ngẽmaca̱x chanaxwa̱xe i choxü̃ ícupoxü̃. ¡Rü wüxi i nachica i ngextá taxucürüwa chorü uanügü nawa choxna nguxü̃gu choxü̃ namunagü!
3 Erü cuma nixĩ i chorü daruxü̃ quixĩxü̃. Rü cuma rü nhama wüxi i poxü̃chicaxü̃ i taxucürüwa ta̱xacürü uanü nawa ngugüxü̃rüxü̃ quixĩ.
4 Rü chanaxwa̱xe nax guxü̃gutáma cupatawa changexmaxü̃ nax ngẽ́ma cupe̱xátütüü̃gu chicúxü̃ca̱x.
5 Rü cumax, Pa Chorü Tupanax, rü marü nüxü̃ cuxĩnü i chorü unetagü i cumaxã nüxü̃ chixuxü̃. Rü cuma rü marü choxna cunaxã i ngẽma ãmare i ngẽma duü̃xü̃gü i cuxü̃ ngechaxü̃güxü̃ca̱x ixĩxü̃.
6 Rü chama nax ãẽ̱xgacü chixĩxü̃ rü chanaxwa̱xe i cunama̱xẽxẽ i chorü maxü̃ nax ngẽmaãcü mucü ya taunecü chamaxü̃xü̃ca̱x.
7 Rü chanaxwa̱xe i mexü̃ chamaxã cuxuegu nax ngẽmaãcü meama chorü duü̃xü̃gümaxã ichacuáxü̃ca̱x. Rü cumax, Pa Tupanax, rü quixaixcuma rü choxü̃ cungechaü̃. Rü ngẽmaca̱x meama choxna cudau.
8 Rü ngẽmaca̱x guxü̃gutáma cuxü̃ chicua̱xüxü̃. Rü wüxichigü i ngunexü̃gu tá cupe̱xewa chayanguxẽxẽ i ngẽma unetagü i cumaxã nüxü̃ chixuxü̃.
