Salmo 62:1-12
Tupanaxicatama nixĩ ya poxü̃ruxü̃ ixĩcü
62 Rü Tupanaxicatama nixĩ ya aixcuma choxü̃ taãxẽxẽẽcü. Rü nüma nixĩ i choxna naxããxü̃ i maxü̃.
2 Rü nüma nixĩ i chorü daruxü̃ i choxna nadauxü̃. Rü ngẽmaca̱x tagutáma ichayangu erü nüma nixĩ i chorü poxü̃ruxü̃ yixĩxü̃.
3 ¿Rü nhuxguxüratáta nüxü̃ perüchau nax cha̱u̱xca̱x ípeyaxüãchixü̃ nax ngẽmaãcü ichayanguxü̃ca̱x nhama wüxi ya ĩxtapü̱x iwa̱xgüxü̃rüxü̃ rüe̱xna nhama wüxi ya poxeguxü̃ iwáxü̃rüxü̃?
4 Rü ngẽma duü̃xü̃gü i chixexü̃ rü ngẽma nagu naxĩnüexü̃xicatama nixĩ nax choxü̃ ínata̱xüchigüxü̃. Rü ngẽma guxü̃arü yexera namaxã nataãxẽgüxü̃ nixĩ i norü dora. Rü naã̱xmaxã choxü̃ nicua̱xüxü̃gü, notürü norü ĩnüwa rü chamaxã naguxchigagü.
5 Rü Tupanaxicatama nixĩ ya aixcuma choxü̃ taãxẽxẽẽcü. Erü nüma tá nixĩ i choxü̃ nangü̃xẽẽxü̃.
6 Rü nüma nixĩ i chorü daruxü̃ i choxna nadauxü̃. Rü ngẽmaca̱x tagutáma ichayangu, erü nüma nixĩ i chorü poxü̃ruxü̃ yixĩxü̃.
7 Rü naxme̱xwa nangexma i chorü maxü̃ rü guxü̃ma i chauchiga nax nhuxãcü chamaxü̃xü̃. Rü nüma nixĩ i chorü daruxü̃ rü chorü poxü̃ruxü̃.
8 Pa Chorü Duü̃xü̃güx ¡rü guxü̃guma nagu peyaxõgü! ¡Rü tauxü̃́ i nüxü̃ pemuü̃exü̃ nax perü yumüxẽwa namaxã nüxü̃ pexuxü̃ i perü guxchaxü̃gü! Erü nüma nixĩ i aixcuma tórü poxü̃ruxü̃ yixĩxü̃.
9 Rü Tupanape̱xewa rü ¿ta̱xacüwa name i ngẽma diẽruã̱xgüxü̃ rü ngẽma ngearü diẽruã̱xgüxü̃? Erü guxü̃ma rü nape̱xewa rü nawüxigumare. Rü nümagü rü ngẽxguma chi yaxü̃arü ngugüxü̃wa iyangugügu, rü taxuxü̃ma nügü narüyamaegü.
10 ¡Rü tauxü̃́ i máetagu rüe̱xna ngĩ̱xgu pegü pediẽruã̱xẽẽxü̃! Rü ngẽxguma pemuarü diẽruã̱xgu rü ¡tauxü̃́ i ngẽma perü diẽrugu peyaxõgüxü̃!
11 62:11-12 Rü chama rü marü taxree̱xpü̱xcüna nüxü̃ chaxĩnü i Tupanaarü ore i nhaxü̃: “Rü ngẽma pora rü ngẽma ngechaxü̃ rü Tupanaarü nixĩ. Rü ngẽma nhuxãcü nüxü̃́ tapuracüxü̃rüxü̃ tátama tüxü̃́ nanaxütanü ya wüxíechigü”, nhaxü̃.
12 Nüü̃ nadau 62:11
