Salmo 63:1-11
Tupana rü duü̃xü̃güarü taãxẽxẽẽruxü̃ nixĩ
63 Pa Chorü Tupanax, cuma nixĩ i aixcuma chorü Tupana quixĩxü̃. Rü guxü̃ma i chorü ngúchaü̃maxã cuxca̱x chadau erü poraãcüxüchi choxü̃́ cungúchaü̃. Rü chacuxwa̱xe erü nhaa chorü maxü̃ rü nhama wüxi i waixümü i paxü̃rüxü̃ nixĩ.
2 63:2-3 Rü ngẽmaca̱x chanaxwa̱xe i cupatawa cha̱u̱xca̱x cungo̱x nax ngẽmaãcü nüxü̃ chadauxü̃ca̱x nax nhuxãcü cuporaxü̃ rü cuxüünexü̃. Erü ngẽma curü ngechaü̃ rü maxü̃arü yexera name. Rü chauã̱xmaxã tá cuxü̃ chicua̱xüxü̃.
3 Nüü̃ nadau 63:2
4 Rü nhu̱xmax nax nhama i naanewa chamaxü̃xü̃gu rü tá cuxü̃ chixuchiga rü cuxca̱x chaxunagüme̱xẽãcüma tá chayumüxẽ.
5 Rü ngẽxguma rü tá poraãcü chataãxẽxü̃chi nhama wüxi i duü̃xü̃ i õna i taxü̃wa chibüxü̃rüxü̃. Rü taãxẽãcü chauã̱xmaxã tá cuxü̃ chicua̱xüxü̃.
6 Rü ngẽxguma chütacü i marü ichaca̱xgu rü cuxna chacua̱xãchi rü cugu charüxĩnü.
7 Erü cuma nixĩ i choxü̃ curüngü̃xẽẽxü̃. Rü chataãxẽ i cupe̱xátügütüü̃wa.
8 Rü nhaa chorü maxü̃ rü cuxna chanaxã. Rü yima curü tügüneme̱xẽ rü tama choxü̃ ninge̱x.
9 63:9-10 Rü ngẽma chorü uanügü i choxü̃ ima̱xgüchaü̃xü̃ rü nüxchama waixümügu nata̱xgü. Erü taramaxã tá nadai rü aigüwemüxü̃ tá nixĩgü.
10 Nüü̃ nadau 63:9
11 Notürü i chama nax ãe̱xgacü chixĩxü̃ rü tá Tupanamaxã chataãxẽ. Rü guxü̃ma i ngẽma nüxü̃́ yaxõgüxü̃ rü tá taãxẽãcü naxca̱x nawiyaegü rü nüxü̃ nicua̱xüxü̃gü. Notürü ngẽma idorata̱a̱xgüxü̃ rü Tupana rü tá inayanangea̱xẽẽgü.