Salmo 64:1-10
Yumüxẽ i nawa Tupanaarü ngü̃xẽẽca̱x íica̱xü̃
64 Pa Cori Pa Tupanax ¡choxü̃́ nüxü̃ naxĩnü nax cuxü̃tawa íchaxuaxü̃xü̃! ¡Rü choxna nadau naxcha̱xwa i ngẽma choxü̃ ima̱xgüchaxü̃xü̃!
2 ¡Rü naxcha̱xwa choxü̃ icu̱x i ngẽma máxwa̱xegüxü̃ i bexma nagu rüxĩnüexü̃ nax nhuxãcü choxü̃ yama̱xgüchaxü̃xü̃! ¡Rü nagu yanachixexẽxẽ i ngẽma nagu naxĩnüexü̃!
3 Erü norü conü rü nhama tararüxü̃ nate̱xechi nax doraxü̃ yaxuxü̃. Rü nhama naxnegürüxü̃ inananha i norü dexagü i poraãcü tüxü̃́ nangu̱xẽẽxü̃.
4 Rü ngẽma íyacu̱xgüxü̃wa rü ínanaxũxũxẽxẽ i chixexü̃ i ore tümaca̱x ya yíxema taxuxü̃ma guxchaxü̃ namaxã üxe. Rü tama namuü̃ãcüma ngürüãchi tümaechita ínanaxũxũxẽxẽ i ngẽma norü dexa i chixexü̃.
5 Rü nügüxü̃́ nanangúchaü̃xẽxẽ nax chixexü̃ naxügüxü̃. Rü nügümaxã nagu narüxĩnüe nax nhuxãcü bexma duü̃xü̃güxü̃ chixexü̃gu nayixẽẽchaü̃xü̃. Rü nüma nüxü̃ nacua̱xgügu rü taxúema nüxü̃ tadau.
6 Rü nagu narüxĩnüe nax taxúema bexma nangugügüxü̃ i ngẽma chixexü̃ i naxügüxü̃. Notürü yimá nüxü̃ cuácü i guxãarü ĩnü rü nüma tá nixĩ i bexma nangugüãxü̃.
7 Rü nüma rü ngürüãchi naxnemaxã tá nanapíexẽxẽ.
8 Rü ngẽmaãcü i ngẽma chixexü̃ i togüca̱x nagu naxĩnüexü̃ rü nümagütátama nagu nayi. Rü texé ya nüxü̃ daugüxe nax nümagütama nagu nayi̱xü̃, rü tá nüxü̃ tacugüe.
9 Rü ngẽxguma ngẽmaxü̃ nadaugügu i duü̃xü̃gü rü tá Tupanaxü̃ nicua̱xüxü̃gü. Rü ngẽma naxüxü̃chiga tá nixugügü rü tá nüxü̃ nicua̱xãchitanü nax ta̱xacüchiga yixĩxü̃.
10 Rü yimá yatü ya mea maxü̃cü rü Cori ya Tupanamaxã tá nataãxẽ rü tá naxca̱x nixũ nax ínapoxü̃ãxü̃ca̱x. Rü guxü̃ma i duü̃xü̃gü i mexü̃gu rüxĩnüexü̃ rü tá nataãxẽgü.
