Salmo 66:1-20
Guxü̃ma i ngẽma Tupana üxü̃ rü namexechi
66 Pa Duü̃xü̃gü i nhama i Naanewa Maxẽxü̃x ¡rü Tupanaca̱x taãxẽãcü pewiyaegü!
2 ¡Rü perü wiyaewa nüxü̃ pexu nax naxüünexü̃ i naéga! ¡Rü wiyaeãcüma nüxü̃ pecua̱xüxü̃gü!
3 66:3-4 ¡Rü Tupanamaxã nüxü̃ pexu rü nhapegügü: “Curü puracügü rü namexechi erü curü poramaxã cunaxü. Rü ngẽma cumaxã rüxuanügüxü̃ rü norü muü̃maxã cuxme̱xgu nügü nayixẽxẽ. Rü guxü̃ma i duü̃xü̃gü rü cuxü̃ nicua̱xüxü̃gü rü norü wiyaegümaxã cuxü̃ nataxẽẽgü”, nhapegügü!
4 Nüü̃ nadau 66:3
5 ¡Rü nua pexĩ nax nüxü̃ pedaugüxü̃ca̱x i ngẽma taxü̃ i mexü̃gü i duü̃xü̃güca̱x naxüxü̃ ya Tupana!
6 Rü nüma rü nayapachitamaxẽxẽ ga yema már nax tümacutümaxã yéma tichoü̃xü̃ca̱x ga tórü o̱xigü. Rü yemaca̱x poraãcü nataãxẽgü ga duü̃xü̃gü.
7 Rü nüma ya Tupana rü guxü̃guma norü poramaxã nhama i naanemaxã inacua̱x. Rü nüma rü nüxna nadau i guxü̃ma i nachixü̃anegü nax tama namaxã nanuexü̃ca̱x i ngẽma tama naga ĩnüexü̃.
8 Pa Guxü̃ma i Nachixü̃anecüã̱xgüx ¡mexü̃ i nachigaxü̃ pexugü ya tórü Tupana! ¡Rü perü wiyaegümaxã nüxü̃ pecua̱xüxü̃gü!
9 Erü nüma rü tüxna nadau rü tüxna nanaxã i maxü̃ nax tama iyuexü̃ca̱x.
10 Pa Tupanax, cuma rü poraãcü toxü̃ cuxü. Rü ngẽmaãcü toxü̃ cumexẽxẽ nhama diẽrumü üxüwa imexẽẽxü̃rüxü̃.
11 Rü cuma rü torü uanügüaxü̃́ cunatauxchaxẽxẽ nax toxü̃ ínayauxü̃xü̃ca̱x nax ngẽmaãcü poraãcü toxü̃ napuracüexẽẽxü̃ca̱x.
12 Rü cunatauxchaxẽxẽ nax ngexü̃rüüxü̃mare ga duü̃xü̃gü togu idauxcüraxü̃güxü̃. Rü toma rü guxchaxü̃gü ga ãũcümaxü̃chixü̃wa tachopetü, notürü düxwa nhaa naane i mexü̃wa toxü̃ cugagü.
13 66:13-14 Rü ngẽmaca̱x i nhu̱xmax rü cupatawa tá chaxũ rü ngẽ́ma tá cupe̱xewa chayagu i ãmaregü. Rü ngẽmaãcü tá chayanguxẽxẽ i ngẽma cumaxã ichaxunetaxü̃ ga yexguma ãũcümaxü̃wa chayexmagu.
14 Nüü̃ nadau 66:13
15 Rü ngẽma curü ãmarearü guchicaxü̃wa rü tá cuxca̱x chayagu i wocaxacügü i ngüexü̃, rü wocagü i yatüxü̃, rü bóyigü i yatüxü̃, rü carnérugü nax ngẽma naemamaxã cutaãxẽxü̃ca̱x.
16 Pa Duü̃xü̃gü i Tupanaga Ĩnüexü̃x ¡rü nua pexĩ rü iperüxĩnüe! Rü tá pemaxã nüxü̃ chixu i ngẽma mexü̃gü i Tupana cha̱u̱xca̱x üxü̃.
17 Rü nhaa chauã̱xmaxã nüxna chaca rü daa chorü conümaxã nüxü̃ chicua̱xüxü̃.
18 Rü ngẽxguma chi chixexü̃gu charüxĩnügu rü nüma ya Cori rü taxũchima choxü̃ nangãxü̃.
19 Notürü i nümax rü choxü̃ naxĩnü rü nanangãxü̃ i chorü yumüxẽ.
20 Rü namexechi ya Tupana, erü tama choxü̃́ nüxü̃ naxo̱x i ngẽma naxca̱x íchaca̱xü̃. Rü tama nüxü̃ narüchau nax choxü̃ nangechaü̃xü̃.
