Salmo 68:1-35
Tupana rü norü uanüxü̃ narüporamaegü
68 Pa Tupanax ¡paxa nua naxũ rü ínawoxü̃ i ngẽma cumaxã rüxuanüã̱xgüxü̃! Rü ngẽmaãcü i ngẽma cuxchi aiexü̃ rü tá cuxcha̱xwa nibuxmü.
2 Rü nümagü rü nhama caixanexü̃rüxü̃ tá ngẽxma narütauxe. Rü nhama wera idexexü̃rüxü̃ tá inarüxo. Rü cupe̱xewa rü taxuwama name i ngẽma chixexü̃ ügüxü̃.
3 Notürü ngẽma mexü̃ ügüxü̃ rü tá nataãxẽgü. Rü cupe̱xewa, Pa Tupanax, rü taãxẽãcü tá cuxü̃ nicua̱xüxü̃gü.
4 Pa Duü̃xü̃güx ¡Tupanaca̱x pewiyaegü rü perü wiyaewa penataxẽxẽ! ¡Rü nüxü̃ pecua̱xüxü̃gü ya yimá caixanexü̃étügu ixũcü! ¡Rü namaxã petaãxẽgü ya yimá Cori rü nape̱xewa petaãxẽgü!
5 Rü yimá Tupana ya napata ya üünenewa ngẽxmacü rü ngẽma tacutagümaxã inacua̱x rü ngẽma yutegüxü̃arü poxü̃ruxü̃ nixĩ.
6 Rü ngẽma duü̃xü̃gü i nüxü̃́ nataxuxü̃ i natanüxü̃ rü nüma ya Tupana rü nüxü̃́ nanangexmaxẽxẽ ya nachiü̃. Rü nüma rü ínananguxü̃xẽxẽ i ngẽma poxcuexü̃ nax mexü̃wa nangexmagüxü̃ca̱x. Notürü ngẽma tama ixĩnüechaxü̃xü̃ rü naane i taxuxü̃ma nawa rüxüxü̃wa tá nanamaxẽxẽxẽ.
7 Pa Tupanax, rü yexguma Eyítuanewa ícunanguxü̃xẽẽgu ga curü duü̃xü̃gü rü chianexü̃gu cuyagagü.
8 Rü yexguma ga nhama ga naane rü naxĩã̱xãchi. Rü pucü narüxüe ga dauxü̃guxü̃ ga naanewa. Rü guma ma̱xpǘne ga Chinaí rü cunaxĩã̱xãchixẽxẽ, Pa Torü Tupanax.
9 Rü cuma rü cunapuechaxẽxẽ nax yemaacü cuyawaimüanexẽẽxü̃ca̱x ga yema curü naane ga ipaxü̃ nax nawa naxügüxü̃ca̱x ga nanetügü.
10 Rü yema curü duü̃xü̃gü rü yexma naxãchiü̃gü. Rü cumax, Pa Tupanax, rü namaxã cumecüma, rü yemaca̱x nüxna cunaxã ga norü õna ga nüxü̃́ taxuxü̃.
11 68:11-13 Rü yexguma Tupana idexagu rü yema uanügü rü nibuxmü. Rü yema ngexü̃gü ga ĩpatawachigü yexmagüxü̃ rü tagaãcü nüxü̃ nixugügü nax yabuxmüxü̃ ga yema norü uanügü ga norü daiwa yéma ĩxü̃. Rü nüma ga yema ngexü̃gü rü nanade ga yema norü uanügüarü yemaxü̃gü ga nüxna yéma yabuxmüxü̃ rü nügümaxã nayatoye. Rü norü uanügüarü nga̱xãẽruü̃gümaxã nügü ninga̱xãẽgü. Rü namaxã naxãxünegü rü nhama wüxi i muxtucu i naxpe̱xátümaxã tüxünexü̃rüxü̃ nixĩgü.
12 Nüü̃ nadau 68:11
13 Nüü̃ nadau 68:11
14 Rü yexguma Tupana ya guxãétüwa ngẽxmacü yabuxmüxẽẽgu ga tórü uanügü rü guma ma̱xpǘne ya Charumúca̱x nibuxmü, notürü gáuxü̃ yexma nayi.
15 Rü namáxchanexüchi ya yima ma̱xpǘne ya Bacháü̃. Rü nataxpe̱xegü rü nadauxü̃guxüchi.
16 Rü pemax, Pa Ma̱xpǘnegü ya Máchanexü̃chigünex ¿rü tü̱xcüü̃ auxãchiãcü nüxü̃ perüdaunü ya yima ma̱xpǘne ya Chiã́ũ ya Tupana nagu ãchiü̃chaxü̃ne? Rü nüma ya Cori ya Tupana rü ngẽ́ma tá nangexmaecha.
17 Rü nüma ya Tupana rü guxü̃nema ya nawexü̃maxã Chinaíarü ma̱xpǘnewa ínaxũxũ nax napata ya Chiã́ũwa ngexmanewa naxũxü̃ca̱x.
18 Pa Tupanax, rü ngẽxguma Chiã́ũ ya ma̱xpǘnegu cuxĩnagügu rü cugüwe cuyagagü i ngẽma ícuyauxü̃xü̃ i curü uanügü, rü natanüwa cunayaxu i diẽru. Rü woo i ngẽma tama cuga ĩnüechaxü̃xü̃ rü cuxme̱xwa nügü nangexmagüxẽxẽ.
19 Cumexechi, Pa Cori Pa Torü Tupana i Torü Maxẽxẽẽruxü̃x. Rü wüxichigü i ngunexü̃gu rü toxü̃ curüngü̃xẽẽ.
20 Rü nüma ya tórü Tupana rü tüxü̃ maxẽxẽẽcü nixĩ. Rü nüxü̃́ natauxcha nax yuwa tüxü̃ ínanguxü̃xẽẽ̱xü̃.
21 Rü nüma ya Tupana rü tá nanamateeru i ngẽma norü uanügü i tama nüxü̃ rüxoechaxü̃xü̃ i norü chixexü̃gü.
22 Rü nüma ya Tupana rü nhanagürü: “Pa Iraéutanüxü̃x, rü chama rü tá pexü̃ chamupetütanüamaxü̃ i Bacháü̃anewa nax nawa pengugüxü̃ca̱x i perü naane i már i mátamaxü̃cutüwa ngẽxmaxü̃.
23 Rü ngẽ́ma rü tá pegü piwaiecutüxẽxẽ nagümaxã i perü uanügü. Rü perü airugü rü tá yimá nagüwa naxaxegü”, nhanagürü.
24 Pa Tupanax, Pa Chorü Tupanax, Pa Chorü Ãẽ̱xgacüx, rü cupataã̱xtüwa nüxü̃ tadau i ngẽma curü duü̃xü̃gü i ngẽ́ma chocuchimüxü̃ rü cuxü̃ nicua̱xüxü̃gü erü nanaxüchigagü nax curü uanügüxü̃ curüporamaexü̃.
25 Rü ngẽma wiyaegüxü̃ rü nape̱xegu naxãgü, rü ngẽma paxetagüxü̃ rü ngẽmaweama naxãgü, rü ngẽma paxü̃gü i pãdéru pagüxü̃ rü ngãxü̃tanügu naxãgü.
26 Rü guxãma i pema i ngẽxma chocuxe ¡rü nüxü̃ pecua̱xüxü̃ ya Cori ya Tupana! Rü guxãma i pema i Iraéutanüxü̃ ¡rü nüxü̃ pecua̱xüxü̃gü!
27 Rü Bẽyamíchimüxü̃ rü nape̱xewaama naxü, rü ngẽmaweama naxü i Yudáchimüxü̃ norü ãẽ̱xgacügümaxã. Rü ngẽmaweama naxügü i Yeburóũchimüxü̃ rü Nataríchimüxü̃.
28 Pa Chorü Tupanax ¡inawe̱x i curü pora! ¡Rü wenaxarü toxca̱x naxü ga yema taxü̃ ga mexü̃gü ga nũxcüma curü poramaxã cuxüxü̃!
29 Rü yima cupata ya ma̱xpǘnewa ngexmane i Yerucharéü̃wa rü togü i nachixü̃anegüarü ãẽ̱xgacügü cuxca̱x ngẽ́ma nananagü i ãmaregü.
30 ¡Rü yima cupatawa yangagü i ngẽma cumaxã rüxuanügüxü̃ i nhama dexnenecücüã̱x i wocagü i düraexüchixü̃rüxü̃ ixĩgüxü̃! Rü nümagü rü nhama tuirugü i düraexü̃rüxü̃ nachixecüma, rü nhama wocaxacügürüxü̃ nimu. ¡Rü naxãneexẽxẽ i ngẽma duü̃xü̃gü i norü diẽruguama rüxĩnüexü̃! ¡Rü nawoone i ngẽma daigu rüxĩnüexü̃!
31 Rü ngẽma Eyítuanecüã̱xarü ãẽ̱xgacügü rü tá cupe̱xewa nangugü rü ngẽma Echiopíacüã̱xgü rü tá cuxü̃ nicua̱xüxü̃gü.
32 Pa Nhama i Naanewa Ngẽxmagüxü̃ i Nachixü̃anegüarü Ãẽ̱xgacügüx ¡rü nüxü̃ pecua̱xüxü̃gü ya Tupana! ¡Rü naxca̱x pewiyaegü ya Cori!
33 Rü nüma rü caixanexü̃gu nixũ i dauxü̃guxü̃ i naane i nũxcüma üxü̃wa. Rü ngẽ́ma rü tagaãcü nidexa.
34 ¡Rü nagu perüxĩnüe nax nhuxãcü naporaxüchixü̃ ya Tupana! Rü nüma rü guxü̃ma i Iraéutanüxü̃maxã inacua̱x. Rü norü pora rü ya̱u̱xtüweanexü̃wa nangu.
35 Rü nüma ya Tupana ya napatawa ngẽxmacü rü naxüüne. Rü nüma ya Iraéuarü Tupana rü nanaporaexẽxẽ i norü duü̃xü̃gü rü nüxü̃́ nanatauxchaxẽxẽ nax norü uanügüxü̃ naporamaegüxü̃ca̱x. ¡Rü namexechi ya Tupana!
