Salmo 69:1-36
Aita Tupanaca̱x naxü erü taxü̃ i guxchaxü̃wa nangexma
69 ¡Choxü̃ namaxẽxẽ, Pa Chorü Tupanax! Erü ngẽmatama nagu changu i taxü̃ i guxchaxü̃.
2 Rü nhama wüxi i ngóxü̃charawa rü wáxü̃rüxü̃ chixĩ. Rü taxuguma chayachiãchiéga. Rü nhama mátamaxüchixü̃ i dexáwa ingaxgurüxü̃ chixĩ nax choxü̃ yachaxẽẽxü̃ i poraxü̃chixüxü̃.
3 Rü chama rü düxwa chipa nax curü ngü̃xẽẽca̱x íchaca̱xaxü̃. Rü marü düxwa changu̱xmanaxã. Rü düxwa chipaxetü nax cuxca̱x ichadawenüxü̃, Pa Chorü Tupanax.
4 Rü ngẽma natüxca̱xma chauxchi aiexü̃ rü chauyáexü̃ narümumae. Rü nimuetanü i ngẽma chamaxã rüxuanüã̱xgüxü̃. Rü nümagü rü naxca̱x nadaugü nax nhuxãcü choxü̃ yama̱xgüchaü̃xü̃. Rü choxü̃ nachixewegü nax chanatáeguxẽẽxü̃ca̱x i ngẽma tama naxca̱x changĩ̱xchiréxü̃.
5 Pa Chorü Tupanax, cuma nüxü̃ cucua̱x nax nhuxãcü tama chauãẽxü̃ chacuáxü̃. Rü ngẽmaca̱x taxucürüwama cupe̱xewa ichayacu̱xgü i chorü chixexü̃gü.
6 Pa Cori Pa Tupana ya Guxãétüwa Ngẽxmacüx, tama chanaxwa̱xe nax chaugagu ãne yangegüxü̃ i ngẽma chautanüxü̃ i cuxü̃́ yaxõgüxü̃. Pa Torü Tupanax, rü tama chanaxwa̱xe nax chaugagu cuxü̃ naxoexü̃ i chautanüxü̃gü i noxri norü ngúchaü̃maxã cuxca̱x daugüxü̃.
7 Rü cuxca̱x nixĩ ga yaxna namaxã chaxĩnüxü̃ rü ãne chingexü̃ ga yexguma cumaxã nachixegagügu i ngẽma cumaxã rüxuanüã̱xgüxü̃.
8 Rü chautanüxü̃güpe̱xewa rü nhama wüxi i to i nachixü̃anecüã̱xrüxü̃ chixĩ rü nhama tama choxü̃ nacua̱xgüxü̃rüü̃ãcü choxü̃ narüdaunü.
9 Rü chama rü ngúxü̃ chinge erü poraãcü chayanuxü̃ ya cupata nax taxúema chixexü̃ nawa üxü̃ca̱x. Rü chauxchaama chanangenagü i norü guxchigagü i ngẽma cumaxã rüxuanügüxü̃.
10 Rü ngẽxguma cuxca̱x chaxaxu̱xgu rü tama chachibüãcüma chayumüxẽgu rü nümagü rü choxü̃ nacugüe.
11 Rü ngẽxguma chorü ngechaxü̃chirugu chicu̱xgu rü guxü̃ma choxü̃ narücutanüxü̃.
12 Rü duü̃xü̃gü rü chauchiga nidexagü rü ngẽma ngãxẽxü̃ rü chagu nawiyaegü.
13 Notürü i chamax, Pa Corix, rü chorü yumüxẽwa rü cuxna chacaama. Rü ngẽmaca̱x, Pa Chorü Tupanax ¡choxü̃ rüngü̃xẽxẽ i nhu̱xmax! Rü ngẽma choxü̃ nax cungechaü̃xü̃gagu ¡rü choxü̃ nangãxü̃! Rü cuma nax guxü̃guma choxü̃ curüngü̃xẽẽxü̃, rü chanaxwa̱xe i chauétüwa cuchogü.
14 ¡Rü choxü̃ rüngü̃xẽxẽ nax tama nagu changuxü̃ca̱x i ngẽma chixexü̃gü, nhama wüxi i ãchixü̃anexü̃gu inguxgurüxü̃! ¡Rü naxme̱xwa choxü̃ ínanguxuchixẽxẽ i ngẽma chauxchi aiexü̃! ¡Rü nüxna choxü̃ ixũgachixẽxẽ i ngẽma chorü guxchaxü̃gü i nhama dexá i mátamaxü̃rüxü̃ ixĩxü̃!
15 Rü tama chanaxwa̱xe i ngẽma guxchaxü̃gü choxü̃ narüyexera nhama poraxü̃chiüxü̃ choxü̃ ichaxẽẽxü̃rüxü̃. Rü tama chanaxwa̱xe i nagu changu i ngẽma guxchaxü̃ i taxüchixü̃ nhama wüxi ya tupuyuca choxü̃ itúcuchigurüxü̃.
16 Pa Corix ¡choxü̃ nangãxü̃! Erü cuma rü chamaxã cumecüma rü poraãcü choxü̃ cungechaü̃. Rü ngẽma nax choxü̃ cungechaxü̃xü̃gagu ¡rü chagu rüxĩnü!
17 Rü chama nax curü duü̃xü̃ chixĩxü̃ ¡rü tauxü̃́ i choxü̃ cuxoxü̃! ¡Rü paxa choxü̃ nangãxü̃! Erü ãũcümaxü̃wa changexma.
18 ¡Rü nua naxũ rü choxü̃ rüngü̃xẽxẽ! ¡Rü naxme̱xwa choxü̃ ínanguxuchixẽxẽ i ngẽma chamaxã rüxuanügüxü̃!
19 Cuma rü nüxü̃ cucua̱x nax nhuxãcü chamaxã nachixegagüxü̃ rü chamaxã naguxchigagüxü̃ rü ãne choxü̃ yangexẽẽgüxü̃. Rü cuma nüxü̃ cucua̱x nax ta̱xacügü yixĩxü̃ i ngẽma chamaxã rüxuanügüxü̃.
20 Rü ngẽma chamaxã nax nachixegagüxü̃ rü poraãcü choxü̃́ nangu̱x. Rü ngẽmaca̱x charümaãchi rü changearü poraã̱x. Rü notüca̱xma naxca̱x chadau nax texéaxü̃́ changechaü̃tümüxü̃xü̃ rü texé choxü̃ taãxẽxẽẽxü̃.
21 Rü ngẽma chauxchi aiexü̃ rü chawemügu nanaxǘgü i chãxü̃ruxü̃. Rü yexguma chita̱xawagu rü wíũ ya ngúchia̱xüchicü choxna naxãgü.
22 Notürü ngẽma norü õna i taxü̃gü i nügümaxã nangõ̱xgüxü̃ rü namaxã ínataãxẽgüxü̃ rü nhu̱xmax rü chanaxwa̱xe nax noxrütama chixexẽẽruxü̃ yanguxuchixü̃.
23 ¡Rü ẽcü yangexetüxẽxẽ rü guxü̃guma yadu̱xrueparagü!
24 ¡Rü ẽcü curü numaxã napoxcue nax ngẽmaarü poramaxã nayuexü̃ca̱x!
25 Rü chanaxwa̱xe i ngẽma ínaxãchiü̃güxü̃wa rü wüxi i nachica i chianexü̃xü̃ cunanguxuchixẽxẽ nax taxúema napatagüwa ngẽxmagüxü̃ca̱x.
26 Erü nümagü rü tümawe ningẽxü̃tanü ya yíxema cuma tüxü̃ cunaxi̱xãchiãẽxẽxẽ. Rü tüxü̃ nacugüe ya yíxema tüxü̃́ nangúe nagagu nax tüxü̃ cunapi̱xẽẽxü̃.
27 ¡Ẽcü poxcumaxã nüxü̃́ naxütanü naxca̱x i ngẽma chixexü̃ i naxügüxü̃! ¡Rü tauxü̃́ i nüxü̃́ nüxü̃ curüngümaxü̃ i ngẽma norü chixexü̃!
28 ¡Rü ínapiéga nawa i ngẽma curü popera i curü duü̃xü̃güéga nagu ümatüxü̃! Rü tama chanaxwa̱xe i ngẽma cuga ĩnüexü̃tanüwa cunango̱xégagüxẽxẽ.
29 Notürü i chama nax chida̱xawexü̃ rü chanaxi̱xãchiãẽxü̃ ¡rü choxü̃ írüdaxẽxẽ rü choxü̃ ínapoxü̃, Pa Chorü Tupanax!
30 Rü chama rü wiyaemaxã tá cuxü̃ chicua̱xüxü̃ rü moxẽ tá cuxna chaxã, Pa Tupanax.
31 Rü ngẽxguma wüxi i tuiru rüe̱xna wocaxacü cuxca̱x chiguxguarü yexera tá namaxã cutaãxẽ i ngẽxguma cuxü̃ chicua̱xüxü̃gu rü moxẽ cuxna chaxãxgu, Pa Corix.
32 Rü yíxema naxi̱xãchiãxẽgüxe rü tá tataãxẽgü i ngẽxguma nüxü̃ tadaugügu nax nhuxãcü Tupana chamaxã taãxẽxü̃. Rü yíxema Tupanaca̱x daugüxe rü tá yexera tüxü̃́ nangúchaü̃ nax nawe tarüxĩxü̃.
33 Erü nüma ya Cori ya Tupana rü tüxü̃ naxĩnü ya yíxema tüxü̃́ nataxúxe i tümaarü ngẽmaxü̃gü. Rü tama tüxü̃ naxo ya yíxema norü duẽxẽgü ya poxcuexe.
34 Pa Dauxü̃guxü̃ i Naane, rü Pa Nhama i Naane rü Pa Már, rü name nixĩ i Tupanaxü̃ pecua̱xüxü̃gü i pemax rü guxü̃ma i pewa maxẽxü̃.
35 69:35-36 Erü nüma rü tá naétüwa nachogü ya Chiã́ũ. Rü tá nüxü̃ narüngü̃xẽẽ i norü duü̃xü̃gü nax wena táxarü namexẽẽgüaxü̃ca̱x ya Yudátanüxü̃arü ĩanegü. Rü yima ĩane ya Yerucharéü̃ rü Tupanaarü duü̃xü̃güxacügüarü tá nixĩ. Rü ngẽ́ma tá namaxẽ rü tá namaxã inacua̱xgü. Rü guxü̃ma i ngẽma Tupanaga ĩnüexü̃ rü ngẽxma tá naxãchiü̃gü.
36 Nüü̃ nadau 69:35
