Salmo 7:1-17
Cori ya Tupana rü ãẽ̱xgacü ya mea duü̃xü̃gümaxã icuácü nixĩ
7 Rü cuxme̱xwa chaugü changexmaxẽxẽ, Pa Cori Pa Chorü Tupanax, nax ngẽmaãcü choxü̃ ícupoxü̃xü̃ca̱x nüxna i ngẽma chawe ingẽxü̃tanüxü̃.
2 ¡Rü naxme̱xwa choxü̃ ínanguxuchixẽxẽ! Erü nhama aigü i chagu wagüchaü̃güxü̃rüxü̃ nixĩgü. Rü tataxuma ya texé ya nüxna choxü̃ ípoxü̃xe.
3 Pa Corix, Pa Chorü Tupanax ¿rü ta̱xacürü chixexü̃ chaxü? ¿Rü ẽ̱xna chamáeta?
4 ¿Rü ẽ̱xna ngẽxguma chamücü mexü̃ chamaxã ü̱xguyane rü chixexü̃maxã tüxü̃́ chanatáeguxẽxẽ? ¿Rü ẽ̱xna wüxi i chorü uanü rü ngürümare chanapoxcux?
5 Rü ngẽxguma chi ngẽmaãcü chanaxü̱xgux, rü marü name nax chorü uanügü chawe yangẽxü̃tanüxü̃ rü waixümüanegu choxü̃ nanhagüxü̃ rü ãxte̱xeanexü̃gu napu̱xcuchigüaxü̃ i chorü maxü̃.
6 Pa Corix ¡curü numaxã chauétüwa nachogü rü nadai i ngẽma chorü uanügü i choxü̃ ima̱xgüchaü̃xü̃! Cuma rü cunaxuegu nax cunapoxcuexü̃ i ngẽma duü̃xü̃gü i chixexü̃ ügüxü̃. Rü nhu̱xmax rü chanaxwa̱xe nax chauétüwa cuchogüxü̃.
7 ¡Rü cugüpe̱xegu nangutaque̱xegüxẽxẽ i guxü̃ma i nachixü̃anecüã̱xgü i duü̃xü̃gü! ¡Rü guxü̃ma i ngẽma nachixü̃anecüã̱xgüarü ãẽ̱xgacügüétüwa cugü nangexmaxẽxẽ rü namaxã inacua̱x!
8 Rü cuma nax guxü̃ i nachixü̃anecüã̱xgümaxã icucuáxü̃, rü chanaxwa̱xe i duü̃xü̃güpe̱xewa nüxü̃ quixu nax aixcuma cupe̱xewa chamexü̃ rü chawa rü nataxuxü̃ma i ta̱xacürü chixexü̃.
9 Pa Cori Pa Tupana ya Ixaixcumacüx, cuma rü cunangugü i wüxichigü i duü̃xü̃güarü ĩnügü rü norü ngúchaü̃gü i naãxẽwa nagu naxĩnüexü̃. ¡Rü íyanaxoxẽxẽ i norü chixexü̃ i ngẽma chixri maxẽxü̃ i duü̃xü̃gü! Notürü ngẽma mea maxü̃xü̃ i duü̃xü̃ ¡rü nüxna nadau nax guxü̃guma cugu yaxõgüechaxü̃ca̱x!
10 Rü Tupana ya guxãétüwa ngẽxmacü rü chorü poxü̃ruxü̃ nixĩ. Rü nüma nixĩ i tüxü̃ namaxẽxẽẽxü̃ ya yíxema namaxã ixaixcumagüxe.
11 Rü Tupana rü ãẽ̱xgacü ya aixcuma we̱xgucü nixĩ, rü nüma rü guxü̃guma naxchi naxai i ngẽma chixexü̃.
12 Rü ngẽxgumachi taguma Tupanaca̱x natáegu̱xgu i wüxi i duü̃xü̃ rü nüma ya Tupana rü tá nanawaixmagu i norü tara rü tá tüxü̃ nadai. Rü yima norü würa rü marü ínaporamaã́xü̃.
13 Rü marü narütonümare ya norü chuxchigü ya iyauxramagugüne. Rü marü ínamemare ya naxnegü ya tüxü̃ imáxü̃ne.
14 ¡Rü dücax, nüxü̃ peda̱u̱x i ngẽma chixexü̃arü üruxü̃! Rü nhama wüxi i ngexü̃ i ixíraxacüchaü̃xü̃rüxü̃ nixĩ erü nanaxĩ̱xãchiãxẽ. Rü ngẽma chixexü̃ i nawa ngẽxmaxü̃ rü nawa tá ínanguxuchi i ngẽma dora.
15 Rü nüma rü togueca̱x nanaxü i ma̱xmaxü̃xü̃ i ãxmaxü̃ notürü nümatátama nagu ningucuchi i ngẽma.
16 Rü ngẽma chixexü̃ i togüca̱x naxüxü̃ rü ngẽma máeta i nagu naxĩnüxü̃, rü nagu tátama nangu.
17 Notürü i chamax rü Cori ya Tupanaxü̃ tá chicua̱xüxü̃ erü nüma rü aixcumacü nixĩ. Rü chama rü chorü wiyaemaxã tá chanataxẽxẽ ya yimá Tupana ya guxãétüwa ngẽxmacü.
