Salmo 70:1-5
Yumüxẽ i nawa Tupanaarü ngü̃xẽẽca̱x íica̱xü̃
70 Pa Chorü Tupanax ¡nua naxũ rü choxü̃ íyanguxuchixẽxẽ! Pa Corix ¡paxa nua naxũ nax choxü̃ curüngü̃xẽẽxü̃ca̱x!
2 ¡Rü naxãneexẽxẽ i ngẽma choxü̃ ima̱xgüchaü̃xü̃ nax ngẽmaãcü norü ãneemaxã yabuxmüxü̃ca̱x i ngẽma chixexü̃ chamaxã ügüchaü̃xü̃!
3 Rü ngẽma choxü̃ cugüexü̃, rü chanaxwa̱xe i cunaxãneexẽxẽ.
4 Notürü guxãma ya texé ya cuxca̱x daugüxe rü name nixĩ nax poraãcü tataãxẽgüxü̃. Rü yíxema naxwa̱xegüxe nax tümaétüwa cuchogüxü̃ rü name nixĩ i guxü̃guma nhatagürügü: “Namexechi ya Tupana”, nhatagürügü.
5 Notürü i chama nax changearü ngẽmaxü̃ã́xü̃ rü chanaxi̱xãchiãẽxü̃, rü chanaxwa̱xe i paxa nua cuxũ rü choxü̃ curüngü̃xẽẽ, Pa Tupanax. Erü cuma nixĩ i choxü̃ curüngü̃xẽẽxü̃ rü choxü̃ ícunguxuchixẽẽxü̃ nawa i guxchaxü̃gü. ¡Rü paxa choxü̃ rüngü̃xẽxẽ, Pa Corix!
