Salmo 71:1-24
71 Pa Cori Pa Tupanax, cuma nixĩ i chorü poxü̃ruxü̃ quixĩxü̃. ¡Rü tauxü̃́ i ãne choxna cuxãxü̃!
2 ¡Rü ẽcü chorü uanügüna choxü̃ ínapoxü̃! Erü cuma rü quixaixcuma. ¡Rü choxü̃́ nüxü̃ naxĩnü i chorü yumüxẽ rü choxü̃ ínanguxuchixẽxẽ!
3 Rü chanaxwa̱xe nax chorü tü̱xchipetaruxü̃ rü chorü cu̱xchicaxü̃ rü chorü poxü̃ruxü̃ quixĩxü̃. Rü ngẽmaãcü taxucürüwa choxü̃ nima̱xgü. Erü cuma nixĩ i chorü tü̱xchipetaruxü̃ rü chorü cu̱xchicaxü̃ quixĩxü̃.
4 Pa Chorü Tupanax ¡choxü̃ ínanguxuchixẽxẽ naxme̱xwa i ngẽma duü̃xü̃gü i chixexü̃gü i máetagüxü̃ rü nuxwa̱xegüxü̃!
5 Yerü yexguma changextü̱xügutama cuxü̃́ chayaxõ yerü cuma nixĩ ga aixcuma choxü̃ curüngü̃xẽẽxü̃ rü choxna cudauxü̃.
6 Rü yexguma chauéanüwa chayexmagu, rü cuma rü woetama marü choxü̃ curüngü̃xẽẽ rü choxü̃ cubuxẽxẽ. Rü ngẽmaca̱x i nhu̱xmax rü guxü̃gutáma cuxü̃ chicua̱xüxü̃.
7 Rü muxü̃ma i duü̃xü̃gü rü chamaxã naba̱i̱xãchiãxẽgü erü marü chaya. Notürü cuma nixĩ i chorü poxü̃ruxü̃ quixĩxü̃.
8 Rü guxü̃ma i ngunexü̃gügu rü cuxü̃ chicua̱xüxü̃echa, Pa Tupanax, naxca̱x i ngẽma mexü̃ i cha̱u̱xca̱x cuxüxü̃.
9 Notürü nhu̱xmax nax yaxguã̱x chixĩxü̃ rü changearü poraã́xü̃ ¡rü tauxü̃́ i choxü̃ cuxoxü̃, rü tauxü̃́ i choxü̃ ícutáxü̃!
10 Rü ngẽma chorü uanügü i choxü̃ ima̱xgüchaü̃xü̃ rü nügü narüngü̃xẽẽgü rü wüxigu nügümaxã nagu narüxĩnüe nax nhuxãcü choxü̃ yama̱xgüxü̃.
11 Rü nhanagürügü: “¡Nawe pengẽxü̃tanü rü peyayauxgü, erü ya Tupana rü marü nüxna nixũgachi rü taxúetáma ítanapoxü̃!” nhanagürügü.
12 Pa Tupanax ¡tauxü̃́ i choxna quixũgachixü̃! ¡Rü paxa nua naxũ rü choxü̃ yarüngü̃xẽxẽ!
13 ¡Rü naxãneexẽxẽ rü nadai i ngẽma chorü uanügü i choxü̃ ima̱xgüchaxü̃xü̃! ¡Rü duü̃xü̃güarü cugüruxü̃ yaxĩgüxẽxẽ i ngẽma nanaxwa̱xegüxü̃ nax chixexü̃gu changuxü̃!
14 Notürü i chama rü guxü̃guma íchanangu̱xẽxẽ nax choxü̃ curüngü̃xẽẽxü̃. Rü ngẽmaca̱x yexeraãcü tá cuxü̃ chicua̱xüxü̃.
15 Rü wüxichigü i ngunexü̃gu rü tá nüxü̃ chixu nax cuma quixĩxü̃ nax toxü̃ cumaxẽxẽẽxü̃ rü aixcuma toxü̃ curüngü̃xẽẽxü̃. Rü ngẽma nax namuxũchixü̃ i ngẽma mexü̃gü i cha̱u̱xca̱x cuxüxü̃, rü taxucürüwama guxü̃xü̃ chixu.
16 Pa Corix, guxü̃ma i duü̃xü̃gümaxã tá nüxü̃ chixu i ngẽma taxü̃gü i mexü̃gü i cuxüxü̃. Rü tá chanaxunagü nax cuxicatama yixĩxü̃ nax quixaixcumaxü̃.
17 Pa Chorü Tupanax, yexguma changextü̱xügutama choxü̃ cungu̱xẽxẽ i curü ore, rü nhu̱xmax rü ta nüxü̃ chixuchigüama ga yema mexü̃ ga taxü̃ ga cuxüxü̃.
18 Pa Chorü Tupanax ¡tauxü̃́ i choxna quixũgachixü̃ i nhu̱xmax nax marü chayaxü̃ rü chapuxeruxü̃! Rü nhu̱xmax rü ta curü porachigaxü̃ chixu namaxã i ngẽma nhu̱xmax maxẽxü̃ i duü̃xü̃gü nax nümagü rü ta ngẽma duü̃xü̃gü i tá ingóetanüxü̃maxã nüxü̃ yaxugüxü̃ca̱x.
19 Pa Tupanax, ngẽma curü porachiga rü curü mecümachiga rü guxü̃wama nangu nhu̱xmata dauxü̃guxü̃ i naanewa. Rü cuma rü cunaxü i taxü̃gü i mexü̃gü. Rü tataxuma ya texé ya cumaxã wüxiguxe.
20 Rü woo muxü̃ma ga guxchaxü̃gü rü i̱xãchiãẽgüwa choxü̃ cuxüpetüxẽxẽ, notürü wenatáxarü choxü̃ cutaãxẽxẽxẽ. Rü tá choxü̃ ícurüdaxẽxẽ nawa i chorü guxchaxü̃gü, nhama waixümütüü̃wa írüdaxgurüxü̃.
21 Rü noxriarü yexera tá chamaxã cutaãxẽ rü wena táxarü choxü̃ cuporaxẽxẽ.
22 Pa Chorü Tupana ya Guxü̃ma i Iraéuanecüã̱xgüarü Tupana ya Üünecüx, rü cuxca̱x tá chawiyae rü chorü árpamaxã rü chorü árpaxacümaxã tá cuxü̃ chicua̱xüxü̃. Erü aixcuma cuyanguxẽxẽ i guxü̃ma i ngẽma nüxü̃ quixuxü̃.
23 Rü ngẽmaãcü taãxẽãcüma chaua̱xmaxã tá cuxca̱x chawiyae, rü chauãxẽ i wena ícurüdaxẽẽxü̃maxã tá cuxü̃ chicua̱xüxü̃.
24 Rü chorü conü rü guxü̃ma i oragu tá nüxü̃ nixu nax cuma rü ixaixcumacü quixĩxü̃. Erü ngẽma duü̃xü̃gü i naxwa̱xegüxü̃ nax chixexü̃gu changuxü̃ rü nhu̱xmax rü ãne ningegü.
