Salmo 72:1-20
Yumüxẽ i ãẽ̱xgacüca̱x ixĩxü̃
72 72:1-2 Pa Tupanax ¡nüxna naxã ya ãẽ̱xgacü i cua̱x nax cuxrüxü̃ mexü̃gu naxĩnüxü̃ca̱x rü aixcumacü nax yixĩxü̃ca̱x, nax ngẽmaãcü mea namaxã inacuáxü̃ca̱x i curü duü̃xü̃gü rü tüxü̃ nangü̃xẽẽxü̃ca̱x ya yíxema guxchaxü̃wa ngẽxmagüxe!
2 Nüü̃ nadau 72:1
3 Rü chanaxwa̱xe i cunabacaxẽxẽ i ngẽma nanetügü i ma̱xpǘneanewa ngẽxmagüxü̃ nax ngẽmaãcü nataãxẽgüxü̃ca̱x i duü̃xü̃gü rü mea namaxẽxü̃ca̱x.
4 Rü chanaxwa̱xe i nüma ya ãẽ̱xgacü rü mea tümamaxã inacua̱x ya yíxema ingearü ngẽmaxü̃ã̱xgüxe, rü tüxü̃ narüngü̃xẽẽ ya tümaxacügü ya yíxema tüxü̃́ nataxúxe, rü napoxcueã i ngẽma chixri norü puracütanüxü̃maxã icua̱xgüxü̃.
5 Rü ngẽmaãcü ya yimá ãẽ̱xgacü rü guxü̃gutáma cuxü̃ namuü̃ rü cuga naxĩnü ngẽxgumarüxü̃ ya üa̱xcü rü tauemacü rü guxü̃guma nangexmagüechaxü̃rüxü̃.
6 Rü chanaxwa̱xe nax yimá ãẽ̱xgacü rü meama guxü̃ma i norü duü̃xü̃güxü̃ nangü̃xẽẽxü̃ nhama pucü i guxü̃ma i nanetügü meama iwainecüxẽẽcürüxü̃.
7 Rü nüma ãẽ̱xgacü yixĩxü̃yane rü chanaxwa̱xe nax guxü̃ma mea ixũxü̃ rü guxü̃ i ngunexü̃gu nax nataxuxü̃ma i chixexü̃ rü nu.
8 Rü nüma rü name nixĩ i namaxã inacuáxü̃ i guxü̃ma i naane i léstearü taxtüwa inaxügü rü nhu̱xmata oéstearü márwa nangu. Rü ngẽmaãcü i norü naane rü taxtü ya Eufrátewa tá inaxügü rü naane íyacuáxü̃wa tá nangu.
9 Rü ngẽma ãẽ̱xgacüarü uanügü i chianexü̃gu ãchiü̃güxü̃ rü name nixĩ i yimá ãẽ̱xgacüpe̱xewa nügü nangexmagüxẽxẽ rü naga naxĩnüe.
10 Rü ngẽma Tárchiaanearü ãẽ̱xgacü, rü Capaxũgüarü ãẽ̱xgacü, rü Chabáanearü ãẽ̱xgacü, rü Chébaanearü ãẽ̱xgacü, rü name nixĩ i guxü̃ma i ngẽma ãẽ̱xgacügü rü torü ãẽ̱xgacüxü̃tawa nanana i norü ãmaregü rü diẽrugü.
11 Rü guxü̃ma i nachixü̃anegüarü ãẽ̱xgacügü, rü name nixĩ i torü ãẽ̱xgacüpe̱xegu nacaxã́pü̱xügü. Rü guxü̃ma i ngẽma nachixü̃anegüarü duü̃xü̃gü, rü name nixĩ i torü ãẽ̱xgacüme̱xẽwa nangexmagü.
12 Erü nüma ya yimá ãẽ̱xgacü rü tá tüxü̃ ínapoxü̃ ya yíxema ngearü ngẽmaxü̃ã́xe ya nüxna caxe. Rü yíxema taxúema tüxü̃ rüngü̃xẽxẽ́xe rü nüma tá tüxü̃ narüngü̃xẽẽ.
13 Rü yíxema tama tügü icua̱xüxü̃güxe, rü tá nüxü̃́ tangechaü̃tümüxü̃gü. Rü yíxema ngearü diẽruã̱xgüxe rü tá tüxü̃ ínapoxü̃.
14 Rü tá tüxü̃ ínanguxü̃xẽxẽ naxme̱xwa i ngẽma chixri tümamaxã icuáxü̃ rü tüxü̃ daixü̃. Erü ngẽma tümaarü maxü̃ rü naxca̱x rü namexechi.
15 ¡Namaxü̃ ya yimá ãẽ̱xgacü! ¡Rü nüxna penaxã i ngẽma Chabáanearü úiru! ¡Rü guxü̃guma Tupanape̱xewa naxca̱x peyumüxẽgü! ¡Rü name nixĩ i guxü̃guma mexü̃ nüxü̃ naxüpetü!
16 ¡Rü toxü̃ rüngü̃xẽxẽ, Pa Tupanax, nax toxü̃́ yaxoxochixü̃ca̱x i torü trígugü rü toxü̃́ nabacaxü̃ca̱x i torü trígunecügü i ma̱xpǘneanewa ngẽxmagüxü̃! ¡Rü namuxẽxẽ i norü o ngẽma Líbanuanewa ngẽxmagüxü̃ i nanetügürüxü̃! ¡Rü nhama maxẽ i naanegüwa rüxügüxü̃rüxü̃ yamuxẽxẽ i duü̃xü̃gü i torü ĩanegüwa!
17 Rü chanaxwa̱xe nax guxü̃guma mea yimá ãẽ̱xgacüchiga yadexagüxü̃ i duü̃xü̃gü. Rü name nixĩ i guxü̃guma duü̃xü̃gü nüxü̃ nacuáchiga nhama üa̱xcü guxü̃guma ibáxixü̃rüxü̃. Rü chanaxwa̱xe nax guxü̃ma i nachixü̃anecüã̱xgü i duü̃xü̃gü nayauxgüxü̃ i norü ngü̃xẽẽ rü ngẽmaãcü guxü̃ma i ngẽma nachixü̃anecüã̱xgü nüxü̃ icua̱xüxü̃güxü̃.
18 Namexechi ya Cori ya Tupana ya tórü Tupana ixĩcü. Rü nüxicatama nixĩ i naxüãxü̃ i ngẽma mexü̃gü i taxü̃gü i norü poramaxã naxüxü̃.
19 Rü name nixĩ i guxü̃guma nüxü̃ ticua̱xüxü̃gü erü namexechi. Rü tanaxwa̱xe nax guxü̃ma i nhaa naane rü namaxã napaxü̃ i norü üüne. Rü ngẽmaãcü yixĩ.
20 Rü nuxã nixĩ i yagúxü̃ i norü yumüxẽgü ya Dawí ya Yeché nane.
