Salmo 73:1-28
Tupanaarü mecümachiga
73 Rü Tupana rü namaxã namecüma i ngẽma Iraéutanüxü̃ i mexü̃gu rüxĩnüexü̃.
2 Rü chama rü chiwĩxĩchi rü wixgutaa̱x nagu changu ga yema chixexü̃.
3 Yerü chixauxãchi naxca̱x nax nhuxãcü namuarü ngẽmaxü̃ã̱xgüxü̃ i ngẽma duü̃xü̃gü i nügü icua̱xüxü̃güxü̃ rü chixexü̃ ügüxü̃.
4 Rü ngẽma duü̃xü̃gü rü tama nagu narüxĩnüe tá nax nayuexü̃ erü naporae rü taxuxü̃ma nüxü̃ naxüpetü.
5 Rü taguma ngúxü̃ ningegü rü taguma to̱xguã̱xgürüxü̃ nangearü diẽruã̱xgü.
6 Rü ngẽma nax nügü yacua̱xüü̃güxü̃ rü norü nga̱xãẽxü̃ruxü̃ nayaxĩxẽẽgü. Rü ngẽma dai nixĩ i guxü̃guma naãxẽwa ngẽxmaechaxü̃.
7 Rü norü ngümaxã naxetügü rü nanayigü, rü ngẽma norü chixexü̃ i nagu naxĩnüexü̃ rü nangupetüxüchiama.
8 Rü Tupanaxü̃ nacugüeãcüma chixexü̃ namaxã nixugüe. Rü chixexü̃maxã rü ma̱xmaxã duü̃xü̃güxü̃ naxãxũnegü. Rü nügü yacua̱xüü̃güãcüma nidexagü.
9 Rü chixri dauxü̃guxü̃ i naanechiga nidexagü rü ngextá ínaxĩxü̃wa rü norü ngẽmaxü̃gümaxã nügü nicua̱xüxü̃gü.
10 Rü ngẽmaca̱x i nümaxü̃ i Tupanaarü duü̃xü̃gü rü düxwa nawe narüxĩ rü naga naxĩnüe rü nanayauxgü i norü ore i nüxü̃ yaxugüexü̃.
11 Rü ngẽma duü̃xü̃gü i chixexü̃ rü nügümaxã nhanagürügü: “Nüma ya Tupana rü taxũtáma nüxü̃ nacua̱x i ngẽma ixügüxü̃. Rü yimá guxãétüwa ngẽxmacü rü taxũtáma nüxü̃ nacua̱xama”, nhanagürügü.
12 ¡Rü dücax i ngẽma duü̃xü̃gü i chixri maxẽxü̃ nax nhuxãcü taãxẽãcüma yamuxẽẽãxü̃ i norü ngẽmaxü̃gü!
13 Rü ngẽmaca̱x i chamax rü düxwa nagu charüxĩnü rü notüca̱xmamare nixĩ nax mea chamaxü̃xü̃ rü chaugüna chadauxü̃ nax tama chixexü̃ chaxüxü̃ca̱x.
14 Erü nhu̱xmax nax Tupanawe charüxũxü̃ rü taxuwama choxü̃́ name. Erü guxü̃ i ngunexü̃gu rü ngúxü̃ chinge rü guxchaxü̃gü choxü̃ nangupetü.
15 Notürü, Pa Tupanax, rü ngẽxguma chi ngẽma nüma nagu naxĩnüexü̃gu charüxĩnügu rü chama rü chi naechita chixri chamaxü̃ i curü duü̃xü̃gü.
16 Rü yexguma ga chama rü pora chaxü nax nüxü̃ chacuáxü̃ca̱x nax tü̱xcüü̃ i ngẽma chixri maxẽxü̃ rü poraãcü namuarü ngẽmaxü̃ã̱xgüxü̃ notürü ngẽma yaxõgüxü̃ rü ngúxü̃ yangegüxü̃. Notürü choxü̃́ naguxcha nax nüxü̃ chacúaxü̃.
17 Notürü yexguma cupatagu chaxücu̱xgu, Pa Tupanax, rü yexguma nixĩ ga nüxü̃ chicua̱xãchixü̃ nax ngextá tá naxĩxü̃ i ngẽma chixexü̃ ügüxü̃.
18 Rü cuma rü marü nüxü̃ quinge̱x nax ngẽmaãcü norü chixexü̃gu nayi̱xü̃ca̱x rü ngẽxma yanaxoxü̃ca̱x i norü guxü̃ma.
19 73:19-20 Rü ngürüãchimare tá narüxo. Rü norü muü̃maxã tá nayue. Rü ngẽxguma cumax, Pa Corix, ícurüdaxgu nhama wüxíe pewa írüdaxü̃rüxü̃, rü cuma rü tá nüxü̃ cuxo erü tama aixcuma mea cupe̱xewa namaxẽ.
20 Nüü̃ nadau 73:19
21 Rü noxri ga chama rü chixãũxãchi naxca̱x nax nhuxãcü namuarü ngẽmaxü̃ã̱xgüxü̃ i ngẽma chixexü̃ ügüxü̃, rü poraãcü chauãẽwa nangu̱x.
22 Yerü wüxi ga ngẽãẽmarexü̃ chixĩ ga yexguma rü tama chauãẽxü̃ chacua̱x. Rü cupe̱xewa, Pa Tupanax, rü nhama wüxi ga naeü̃rüü̃mare chixĩ.
23 Notürü i chama rü guxü̃guma cugu charüxĩnü. Rü chorü tügüneme̱xẽgu cuyayauxãchi.
24 Rü ngẽma curü ucu̱xẽmaxã choxü̃ icuyarüwe̱xãchixẽxẽ. Rü wüxi i ngunexü̃ rü taãxẽãcüma tá choxü̃ cuyaxu i dauxü̃guxü̃ i naanewa.
25 ¿Rü texé tixĩ ya chamücü i dauxü̃guxü̃ i naanewa? Rü cuma nixĩ, Pa Tupanax. Rü cuxicatama nixĩ i chacuxwa̱xexü̃ i nhama i naanewa rü taxuxü̃ma i to.
26 Rü nhama i naanewa rü guxü̃ma i nhaa chaxune rü inayarüxo, rü ngẽma chorü pora rü nhaxtüwa naxũ. Notürü i cumax, Pa Tupanax, rü guxü̃gutáma chorü Tupana quixĩ. Rü cuma nixĩ i choxü̃ cuporaxẽẽxü̃ i chorü maxü̃wa.
27 Rü ngẽma duü̃xü̃gü i cuxna ixĩgachixü̃ rü tá nayue. Rü tá icuyanaxoxẽxẽ i ngẽma tama aixcuma cuga ĩnüexü̃.
28 Notürü i chamax rü yexeraãcü tá cuxna changaixcama. Erü ngẽma nixĩ i cha̱u̱xca̱x rümemaexü̃. Rü cumax, Pa Cori Pa Tupanax, rü chorü poxü̃ruxü̃ quixĩ. Rü ngẽmaca̱x tá nüxü̃ chixuchiga i guxü̃ma i ngẽma cha̱u̱xca̱x cuxüxü̃.
