Salmo 75:1-10
Tupana rü ãẽ̱xgacü ya duü̃xü̃güarü maxü̃arü ngugüruxü̃ ya mecü nixĩ
75 Moxẽ cuxna taxã, Pa Tupanax, moxẽ cuxna taxã. Rü cuxna nixĩ i taca̱xü̃ i torü yumüxẽwa. Rü ngẽma mexü̃gü i curü poramaxã cuxüxü̃chiga nixĩ i tawiyaegüxü̃.
2 Rü nüma ya Cori ya Tupana rü nhanagürü: “Ngẽxguma nawa nanguxgu i ngẽma ngunexü̃ i chama nüxü̃ chaxunetaxü̃, rü aixcuma tá nüxna chaca i wüxichigü i duü̃xü̃ i norü maxü̃chiga.
3 Rü ngẽxguma naxĩã̱xãchigu i nhaa naane guxü̃ma i norü duü̃xü̃gümaxã, rü chamatama nixĩ i namaxã ichacuáxü̃ nax tama yaxũgachixü̃ca̱x i namaxü̃wa”, nhanagürü.
4 Rü chama ya Tupana rü nhachagürü nüxü̃ i ngẽma nügü icua̱xüxü̃güxü̃ rü ngẽma chixexü̃ ügüxü̃: “¡Tauxü̃́ i pegü íperütagüxü̃ rü pegü pecua̱xüü̃güxü̃!
5 ¡Rü tauxü̃́ i perü porachiga pidexagüxü̃! Rü ngẽxguma pidexagügu ¡rü tauxü̃́ i choxü̃ perüyexeragüchaxü̃xü̃ namaxã i perü cua̱x!” nhachagürü.
6 Rü ngẽma tórü ngü̃xẽẽ rü tama nachixü̃anegü i léstewa ngẽxmagüxü̃wa rüe̱xna ngẽma nachixü̃anegü i oéstewa ngẽxmagüxü̃wa, rü bai i ngẽma nachixü̃anegü i súwa ngẽxmagüxü̃wa ne naxũ.
7 Notürü nüma ya Tupana nixĩ ya aixcuma ãẽ̱xgacü ixĩcü rü nüma nixĩ i nangugüãxü̃ i wüxíechigüarü maxü̃. Rü tümáxe rü tüxü̃ naxãneexẽxẽ rü toguxe rü tüxü̃ nicua̱xüxü̃.
8 Rü nüma ya Cori ya Tupana rü naxme̱xwa nangexma i ngẽma cópu i norü nu nawa ngẽxmaxü̃ nhama wüxi ya wíũ ya ngúchia̱xüchicürüxü̃. Rü ngẽxguma inabaagu i ngẽma norü nu naétü i ngẽma duü̃xü̃gü i chixexü̃ ügüxü̃ rü guxü̃watáma nangu rü taxuxü̃táma ninha.
9 Notürü i chama rü guxü̃gutáma nüxü̃ chixuchiga ya yimá Yacúarü Tupana. Rü chorü wiyaemaxã tá nüxü̃ chicua̱xüxü̃.
10 Erü nüma rü tá inayanaxoxẽxẽ i norü chixexü̃gü i nügü namaxã yacua̱xüü̃güxü̃ i ngẽma duü̃xü̃gü i chixri maxẽxü̃. Notürü yíxema mexü̃ ügǘxe rü nüma rü tá tüxü̃ nicua̱xüxü̃.
