Salmo 76:1-12
Tupana rü narüporamae
76 Rü Yudáanewa rü duü̃xü̃gü rü meama Tupanaxü̃ nacua̱xgü. Rü nüma rü natachigaxüchi i guxü̃wama i Iraéuanewa.
2 Rü yima napata rü Chiã́ũarü ma̱xpǘnewa nangexma i Yerucharéü̃arü ĩanewa.
3 Rü yéma nixĩ ga nagu nabügüxü̃ ga tórü uanügüarü naxnegü ga poxü̃ruü̃gü rü taragü rü würagü rü chuxchigü.
4 ¡Rü cumax, Pa Corix, rü guxü̃arü yexera cuxãũcümaxü̃chi! Rü yima ma̱xpǘnegü i guxü̃guma ngẽxmaechanearü yexera quixĩ.
5 Rü yema tama cuxü̃ muü̃echaü̃xü̃ rü cuma rü ícunawoxü̃. Rü yema nügü írüporagüxü̃ rü taxucürüwama ta̱xacü cumaxã naxüe, rü nayuemare.
6 Rü yema churaragü ga cowaruétügu ĩxü̃ rü wüxigu norü cowarugümaxã ínayachaxgütanüãchi rü taxuxü̃ma naxüe ga yexguma nüxna cuchogügux, Pa Yacúarü Tupanax.
7 Erü cuma rü cuxãũcümaxü̃chi. ¿Rü texé tapora nax cupe̱xewa itachiamaxü̃ i ngẽxguma cuma tümamaxã cunuxgu?
8 76:8-9 Rü dauxü̃guxü̃ i naanewatama marü cunaxuegu i curü poxcu namaxã i ngẽma chixexü̃ ügüxü̃. Rü ngẽmaca̱x i nhama i naane rü nidu̱xru̱x rü nachianemare i ngẽxguma cunaxuegu̱xgu i curü poxcu naxca̱x i ngẽma chixexü̃ ügüxü̃ rü ícunanguxü̃xẽẽgu i ngẽma curü duü̃xü̃gü i togü chixri namaxã icua̱xgüxü̃.
9 Nüü̃ nadau 76:8
10 Rü ngẽma norü nu i ngẽma cumaxã rüxuanügüxü̃ rü curü cua̱xüxü̃ruxü̃ tá nayanguxuchi. Rü woo ngẽxguma íxrarüwa nanuegu rü curü nga̱xãẽruxü̃ nayanguxuchi i ngẽma.
11 ¡Rü Tupanamaxã ipexunetagü, notürü aixcuma peyanguxẽxẽ i ngẽma perü uneta! Rü guxãma i pema ya yimá ãũcümacüarü duü̃xü̃gü pexĩgüxü̃ rü ¡ẽcü nüxna penana i perü ãmaregü!
12 Rü ngẽma ãẽ̱xgacügü i duü̃xü̃gümaxã icua̱xgüxü̃ rü nüma ya Tupana rü nanadai. Rü ngẽmaãcü nanamuü̃exẽxẽ i ngẽma nachixü̃anegüarü ãẽ̱xgacügü.