Salmo 77:1-20
Naxca̱x ínicua̱xgü nax nhuxãcü Tupana Eyítuanewa ínanguxü̃xẽẽ̱xü̃
77 Rü tagaãcü Tupanana chaca i chorü yumüxẽwa nax choxü̃ naxĩnüxü̃ca̱x.
2 Rü ngẽma ngunexü̃ i guxchaxü̃wa changexmagu rü Tupanaca̱x chadau. Rü taguma nüxü̃ charüchau nax chaxunagüme̱xẽãcüma chütacü chayumüxẽxü̃. Notürü woo ngẽmaãcü chayumüxẽ rü taguma chataãxẽ.
3 Rü nüxna chacua̱xãchi ya Tupana rü chaxaxu. Rü Tupanaarü ngü̃xẽẽca̱x chadau, notürü changechaü̃ erü tama paxa ínangu i norü ngü̃xẽẽ.
4 Rü cumax, Pa Tupanax, rü tama choxü̃ cuyaxtaxẽxẽ. Rü ngẽma nax poraãcü chanaxi̱xãchiãẽxü̃ rü taxucürüwa chidexa.
5 Rü nüxna chacua̱xãchi ga yema ngunexü̃gü rü taunecügü ga nagu mexü̃ choxü̃ ngupetüxü̃.
6 Rü nüxna chacua̱xãchi ga yexguma chütacü taãxẽãcüma chawiyaegu. Rü chauãxẽwa nagu charüxĩnü rü chaugüna chaca:
7 “¿Ẽ̱xna guxü̃gutáma i nanuxü̃ ya Cori ya Tupana? ¿Rü taxũtáma ẽ̱xna wena tamaxã nangüxmüxü̃?
8 ¿Rü ẽ̱xna marü nüxü̃ narüchau nax tüxü̃ nangechaxü̃xü̃? ¿Ẽ̱xna nüxü̃ narüngümaxüchi ga norü uneta ga nüxü̃ yaxuxü̃?
9 ¿Ẽ̱xna nüxü̃ narüxo ya Tupana nax namecümaxü̃? ¿Ẽ̱xna tamaxã nanuxũchi rü ngẽmaca̱x marü tama nüxü̃́ tangechaü̃tümüxü̃gü?” nhachagürü.
10 Rü ngẽma yexera choxü̃́ ngúxü̃ nixĩ i ngẽxguma nagu charüxĩnügu nax nüma ya Tupana ya guxãétüwa ngẽxmacü rü marü tama noxrirüü̃ãcü tamaxã yixĩxü̃.
11 Rü chama rü tá nüxna chacua̱xãchi ga yema mexü̃gü ga ü̃pa norü poramaxã naxüxü̃.
12 Rü nagu tá charüxĩnü ga guxü̃ma ga yema naxüxü̃.
13 Pa Tupanax, cuma rü cuxüüne rü ngẽmaca̱x cunaxü i ngẽma cuxüxü̃. Rü nataxuma i ta̱xacü i to i tupana i cumaxã wüxiguxü̃.
14 Erü cuma nixĩ ya Tupana ya guxü̃ma i ngẽma mexü̃ cuxüxü̃. Rü guxü̃ i nachixü̃anecüã̱x i duü̃xü̃güpe̱xewa cunawe̱x i curü pora.
15 Rü ngẽma curü poramaxã nixĩ i Eyítuanewa ícunanguxü̃xẽẽ̱xü̃ i curü duü̃xü̃gü i Yacútaagü rü Yúchetaagü.
16 Pa Tupanax, rü yexguma cuxü̃ nada̱xgux ga yema már rü cuxü̃ namuü̃. Rü nidu̱xru̱xchixü woo ínamatamaxü̃wa.
17 Rü yema caixanexü̃gü rü nanapuxẽxẽ. Rü dauxü̃wa rü niduruane rü guxü̃wama naxãẽmacüane.
18 Rü yema cuga ga duruanexü̃rüxü̃ ixĩxü̃ rü buanecü ga íxã̱ũ̱xẽmacüwa inanaxũ. Rü gumá ãẽmacü rü nhama ga naanexü̃ nangóonexẽxẽ. Rü naxĩã̱xãchi ga nhaa naane.
19 Rü cuma rü márwaama cuxũ rü yemaacü cunaxümaxü̃ ga dexá. Notürü taxúema nüxü̃ tadau ga cucutüchica.
20 Rü cunamu ga Moiché rü Aróũ nax yagagüaxü̃ca̱x ga curü duü̃xü̃gü nhama carnérugü igagüxü̃rüxü̃.
