Salmo 78:1-72
Tupanaarü ngü̃xẽẽ ga nũxcüma norü duü̃xü̃güca̱x naxüxü̃
78 Pa Chorü Duü̃xü̃güx ¡naga pexĩnüe i nhaa ore i pexü̃ changúexẽẽxü̃! ¡Rü iperüxĩnüe i nhaa pemaxã nüxü̃ chixuxü̃!
2 Rü cua̱xruü̃gu ixuxü̃ i oreãcü tá pemaxã chidexa. Rü tá pemaxã nüxü̃ chixu i ore i ẽxü̃guxü̃ ga nũxcüma taguma texé nüxü̃ cuáxü̃.
3 78:3-4 Rü yema ore ga marü nüxü̃ ixĩnüexü̃ rü marü nüxü̃ icuáxü̃ ga tórü o̱xigü marü tamaxã nüxü̃ ixugügüxü̃ rü taxũtáma taxacügücha̱xwa itayacu̱x. Rü ngẽmaãcü i ngẽma taweama ügüxü̃ i duü̃xü̃gü tá tórü Corixü̃ nicua̱xüxü̃gü rü tá naxacügümaxã nüxü̃ nixugü nax nhuxãcü naporaxü̃ rü nhuxãcü yema norü poramaxã taxü̃ ga mexü̃ naxüxü̃.
4 Nüü̃ nadau 78:3
5 78:5-6 Rü nüma ga Tupana rü tórü o̱xi ga Yacútanüxü̃na nanaxã ga norü mugü rü namaxã nüxü̃ nixu nax nhuxãcü tá namaxẽxü̃. Rü tórü o̱xigüxü̃ namu nax naxacügüxü̃ nangúexẽẽxü̃ca̱x nax ngẽma naweama ügüxü̃ i nataagü rü ta nüxü̃ nacua̱xgüxü̃ca̱x rü nümagü rü ta naxacügüxü̃ nangúexẽẽxü̃ca̱x.
6 Nüü̃ nadau 78:5
7 Yerü nüma ga Tupana nanaxwa̱xe nax yema tórü o̱xigüweama ügüxü̃ ga duü̃xü̃gü rü ta nagu nax yaxõgüãxü̃ca̱x nax tama nüxü̃ iyanangümaexü̃ca̱x ga yema taxü̃ ga mexü̃ ga nũxcüma naxüxü̃ rü ngẽmaãcü naga naxĩnüexü̃ca̱x i ngẽma norü mugü.
8 Rü yemaacü nanamu ga Tupana yerü tama nanaxwa̱xe nax yema duü̃xü̃gü norü o̱xigürüxü̃ yixĩgüxü̃ca̱x. Yerü nümagü ga norü o̱xigü rü tama Tupanaga naxĩnüe rü tama naãxẽxü̃ nicua̱x rü tama aixcuma Tupanawe narüxĩ rü tama naxca̱x namaxẽ.
9 Rü yema Efraĩ́tanüxü̃gü rü woo ga nüma rü nixãxne namaxã ga norü würagü rü chuxchigü rü tama inaxãgüchaü̃ ga yexguma nügü nadaixgu, rü norü uanügücha̱xwa nibuxmümare.
10 Rü tama nayanguxẽẽgü ga yema norü uneta ga Tupanamaxã nüxü̃ yaxugüxü̃. Rü yema Tupanaarü mugü rü tama naga naxĩnüechaü̃.
11 Rü nüxü̃ inarüngümae ga yema mexü̃gü ga taxü̃ ga Tupana norü poramaxã nape̱xewa üxü̃.
12 Rü Eyítuanewa ga Choáü̃anewa rü Tupana rü aixcuma taxü̃ ga mexü̃ naxü nape̱xewa ga norü o̱xigü.
13 Rü yema már rü nayapoxyexü̃chixü. Rü nhama naxãtapǘxü̃rüxü̃ nayaxĩxẽxẽ ga yema dexá nax yemaacü paanexü̃wa yachoü̃xü̃ca̱x.
14 Rü ngunecü rü wüxi ga caixanexü̃ nixĩ ga norü cua̱xruxü̃ ga nape̱xegu ixũxü̃. Rü chütacü rü wüxi ga üxüema nixĩ ga norü cua̱xruxü̃.
15 Rü yema chianexü̃wa ga ngextá ínataxuxü̃wa ga dexá rü wüxi ga ma̱xpǘnetapü̱xgu naponeta. Rü yéma nayagoxü̃chixü ga dexá rü yemaacü meama naxaxegü ga guxü̃ma.
16 Rü nümatama nixĩ ga Tupana ga yema ma̱xpǘnetapü̱xwa yagóxü̃chiüxẽẽãxü̃ ga taxü̃ ga dexá naxca̱x ga yema norü duü̃xü̃gü.
17 Notürü ga nümagü ga norü duü̃xü̃gü rü chixexü̃ naxügüama nape̱xewa ya yimá guxãétüwa ngẽxmacü rü tama naga naxĩnüechaü̃ ga ínachianexü̃wa.
18 Rü nüxü̃ naxügümarechaü̃, rü yemaca̱x naxca̱x ínacagü ga namachi ga nüxü̃́ chi̱xéga.
19 Rü chixri Tupanachiga nidexagü rü nhanagürügü: “¿Ẽ̱xna Tupanaaxü̃́ natauxchaxü̃ nax tüxna naxããxü̃ i õna i mexü̃ i nua chianexü̃wa?
20 Rü aixcuma nixĩ ga Tupana ga nangǘxtexẽẽãxü̃ ga gumá nuta ga taxüchicü. Rü aixcuma yéma nayagoxü̃chixü ga dexá nhama natürüxü̃ rü ga paanexü̃ rü nibaxichi. ¿Notürü nüxü̃́ natauxchaxü̃ nax poũ tüxna naxãxü̃ rü namachi tüxna naxãxü̃ i yixema nax norü duü̃xü̃gü ixĩgüxü̃?” nhanagürügü.
21 Rü yexguma Tupana nüxü̃ ĩnügu ga yemaacü nax yadexagüxü̃, rü poraãcü nanu namaxã ga yema Iraéutanüxü̃gü. Rü yema norü nu rü nhama wüxi ya üxüemarüxü̃ nixĩ.
22 Yerü ga nümagü rü tama aixcuma Tupanagu nayaxõgü rü nagu naxĩnüegu rü tama nüxü̃́ natauxcha nax nüma ya Tupana nüxü̃ rüngü̃xẽẽxü̃.
23 78:23-24 Notürü ga nüma ga Tupana rü caixanexü̃güxü̃ namu nax yema duü̃xü̃güca̱x nayixẽẽãxü̃ca̱x ga nawemüruxü̃ ga poũ ga dauxü̃cüã̱x ga maná.
24 Nüü̃ nadau 78:23
25 Rü yemaacü Tupanaarü orearü ngeruxü̃ i dauxü̃cüã̱xwemü nangõ̱xgü ga tórü o̱xigü. Rü nüma ga Tupana rü meama nanachibüexẽxẽ.
26 Rü Tupana rü norü poramaxã ínananguxẽxẽ ga buanecü ga léstewaama ne ũxcü rü buanecü ga súwaama ne ũxcü, rü poraãcü nibuane.
27 Rü Tupana rü gumá buanecügu ínanangugüxẽxẽ ga muxü̃ma ga ngugagü nhama naxnecüte̱xerüxü̃ ixĩxü̃ nax namuxũchixü̃.
28 Rü yema duü̃xü̃gü ínaxãchiü̃güxü̃gu Tupana nanayixẽxẽ ga yema muxũchixü̃ ga ngugagü.
29 Rü yema nangõ̱xgü rü nhu̱xmata mea nüxü̃́ yangu. Rü yemaacü nixĩ ga Tupana ga aixcuma nüxna naxããxü̃ ga yema naxca̱x ínacagüxü̃.
30 78:30-31 Notürü yexguma yexwaca̱x yangugügutama rü naã̱xwatama nayexmagüyane ga nawemü, rü Tupana norü numaxã nanapoxcue. Rü yema yatügü ga rüporamaegüxü̃xü̃ nadai. Rü yemaacü nanayuexẽxẽ ga yema rümemaegüxü̃ ga yatügü ga Iraéutanüxü̃.
31 Nüü̃ nadau 78:30
32 Rü woo nax yemaacü Tupana napoxcuexü̃ notürü wenaxarü chixexü̃ nixüetanüama rü tama aixcuma nagu narüxĩnüe ga yema taxü̃ ga mexü̃gü ga Tupana norü poramaxã nape̱xewa naxüxü̃.
33 Rü yemaca̱x nixĩ ga Tupana ga poxcu ga ãũcümaxü̃chixü̃ naxca̱x ínanguxẽẽxü̃, rü noxtacüma nanadai ga muxü̃ma naxü̃pa ga nawa nax nanguxü̃ ga yema ngunexü̃ ga woechitama nagu nayuexü̃.
34 78:34-35 Rü yexguma Tupana napoxcueguama ga yema duü̃xü̃gü rü yexgumama poraãcü naxca̱x nadaugü rü naxca̱x nawoegu. Rü nüxna nacua̱xãchie ya yimá Tupana ya guxü̃étüwa ngẽxmacü ga norü daruxü̃ rü norü poxü̃ruxü̃ ixĩcü.
35 Nüü̃ nadau 78:34
36 Notürü norü dexawaxicatama nixĩ i nüxü̃ yaxugüexü̃ nax nawe naxĩxü̃, notürü norü maxü̃wa rü tama aixcuma ngẽmagu narüxĩnüe.
37 Rü taguma aixcuma nawe narüxĩ rü taguma aixcuma nayanguxẽẽgü ga norü unetagü ga Tupanamaxã nüxü̃ yaxugüexü̃.
38 Notürü woo nax yemaacü nax yixĩgüxü̃, rü nüma ga Tupana rü nüxü̃́ nangechaü̃tümüxü̃güama. Rü nüxü̃́ nüxü̃ inarüngüma ga norü chixexü̃gü rü tama guxü̃xü̃ nadai. Rü mue̱xpü̱xcüna ga yexguma namaxã nanuxgu rü yaxna namaxã naxĩnü rü tama naga naxĩnü ga norü nu.
39 Rü nüma ga Tupana rü nüxna nacua̱xãchi nax duü̃xü̃gümare yixĩgüxü̃ rü nhama wüxi ya buanecü ya üpetücü rü taguma táegucürüxü̃ nixĩ i norü maxü̃.
40 Rü mue̱xpü̱xcüna tama Tupanaga naxĩnüe rü yema ínachianexü̃wa rü ngúxü̃ Tupanaxü̃ ningexẽẽgü.
41 Notürü wenaxarü nüxü̃ naxügüxü̃ rü yemaacü poraãcü nanangechaü̃xẽẽgü ya yimá Iraéutanüxü̃arü Tupana ya Üünecü.
42 Rü tama nüxna nacua̱xãchie ga yema ngunexü̃ ga nagu Tupana norü uanügüme̱xẽwa ínanguxü̃xẽẽgux.
43 Rü nüxü̃ narüngümae ga yema taxü̃ ga mexü̃gü ga Eyítuanewa naxca̱x naxüxü̃.
44 Rü tama nagu narüxĩnüe ga yexguma nagüxü̃ yanguxuchixẽẽãgu ga naxtügü, rü nüma ga Eyítuanecüã̱xgü rü taxucürüwa nawa naxaxegü.
45 Rü nüma ga Tupana rü yéma Eyítuanecüã̱xtanüwa nanamugü ga muxũchixü̃ ga murenügü rü cururugü ga guxü̃wama namaxã ãanemarexü̃.
46 Rü yema õxmigüxü̃ rü munügüxü̃ nanangõ̱xẽxẽ ga yema Eyítuanecüã̱xarü nanetügü ga nümatama nawa napuracüexü̃.
47 Rü gáuxü̃maxã nanadai ga norü nanetügü ga figugü rü úwagü.
48 Rü yexgumarüxü̃ ta ga norü wocagü rü norü carnérugü rü nayue ga yexguma gáuxü̃ rü ãẽmacü naétügu yixgu.
49 Rü yemaacü ga nüma ga Tupana rü norü numaxã nanapoxcue ga yema duü̃xü̃gü. Rü taxü̃ ga guxchaxü̃ rü ngechaxü̃ naxca̱x ínanguxẽxẽ. Rü nanamu ga norü orearü ngeruü̃gü ga dauxü̃cüã̱x nax nadaiaxü̃ca̱x ga yema duü̃xü̃gü.
50 Rü yemaacü ga nüma ga Tupana rü tama yaxna namaxã naxĩnü ga norü nu. Rü yemaca̱x tama nüxü̃́ nangechaü̃tümüxü̃gü ga yema Eyítuanecüã̱xgü rü noxtacüma nanayuexẽxẽ.
51 Rü yema naanewa rü guxü̃nema ga ĩpatawachigü rü nayama̱x ga yema Eyítuanecüã̱x nane ga nüxíraxü̃xü̃.
52 Rü Eyítuanewa Iraéutanüxü̃güxü̃ ínagaxü̃ nhama carnérugü naxpǘü̃wa ígaxü̃xü̃rüxü̃. Rü chianexü̃wa nanagagü ga yema norü duü̃xü̃gü ga Iraéutanüxü̃gü.
53 Rü yemaacü meama nüxna nadau nax tama yema Eyítuanecüã̱xü̃ namuü̃exü̃ca̱x. Notürü yema norü uanügü ga nawe ingẽxü̃tanüxü̃ rü yema már-arü dexá rü naétü nanagoxü̃chixüxẽxẽ ga yexguma nawe yachoü̃gu.
54 78:54-55 Rü nüma ga Tupana rü yema naane ga nüma nagu naxãchiü̃xü̃wa nanagagü ga yema norü duü̃xü̃gü ga Iraéutanüxü̃gü. Rü nawa nanagagü ga yema ma̱xpǘneane ga nümatama nawa ínawoxü̃ãxü̃ ga yema duü̃xü̃gü ga nüxíra yexma ãchiü̃güxü̃ ga tama nüxü̃́ yaxõgüxü̃. Rü wüxitücumüchigüxü̃ nayanu ga yema naane. Rü yemagu nixãchiü̃güchigü.
55 Nüü̃ nadau 78:54
56 Notürü ga nüma ga yema Iraéutanüxü̃gü rü nüxü̃ naxügümare ya yimá Tupana ya guxãétüwa ngẽxmacü rü namaxã nanue rü tama naga naxĩnüechaü̃ ga norü mugü.
57 Rü yema norü o̱xigürüü̃tama nüxna nixĩgachitanü rü tama aixcuma nüxü̃́ nayaxõgü. Rü nhama wüxi ya würa ya wüxünerüxü̃ nixĩgü.
58 Rü Tupanaxü̃ nanuxẽẽgü namaxã ga yema ãmaregü ga tupananetagüca̱x íguxü̃. Rü nüxü̃ nicua̱xüxü̃gü ga tupananetachicüna̱xãgü rü yemaacü Tupanaãẽwa nanangu̱xẽẽgü.
59 Rü yemaxü̃ nada̱xgux ga nüma ga Tupana rü poraãcü nanu rü yema Iraéutanüxü̃güna nixũgachi.
60 Rü nüxna nixũ ga guma napata ga naxchirunaxca̱x ga duü̃xü̃gütanüwa yexmane ga Chíruwa.
61 Rü nanayexrü nax yema Iraéuanecüã̱xgüarü uanügü yangegüxü̃ca̱x ga yema baú ga norü mugü nawa yexmaxü̃.
62 Rü nüma ga Tupana rü poraãcüxüchi namaxã nanu ga yema norü duü̃xü̃gü ga Iraéuanecüã̱xgü rü yemaca̱x norü uanügüaxü̃́ nanatauxchaxẽxẽ nax nadaiaxü̃ca̱x.
63 Rü norü ngextü̱xücügü rü norü uanügü rü ínanagu rü yemaca̱x taxucürüwa nixãtexacügü ga yema duü̃xü̃gü.
64 Rü yema norü chacherdótegü rü taramaxã nanadai. Rü naxma̱xgü rü ta tayue rü yemaca̱x tataxuma ga yutegüxe ga tümateca̱x axuxe.
65 Notürü yemawena ga nüma ga Cori ya Tupana rü nhama wüxi i pewa iba̱i̱xãchixü̃rüxü̃ nixĩ. Rü wüxi i churara i wíũmaxã poraãxẽxü̃rüxü̃ nixĩ.
66 Rü yema namaxã rüxuanügüxü̃ narüporamae rü nayabuxmüxẽxẽ. Rü yemaacü guxü̃guma nanaxãneexẽxẽ.
67 Rü tama nanaxwa̱xe nax Yúche nane ga Efraĩ́tanüxü̃wa ne naxĩxü̃ ga Iraéuanecüã̱xgüarü ãẽ̱xgacügü.
68 Rü yemaca̱x nüxü̃ naxuneta nax Yudátanüxü̃wa ne naxĩxü̃ ga norü duü̃xü̃güarü ãẽ̱xgacügü. Rü nüxü̃ naxuneta ga ma̱xpǘne ga Chiã́ũ nax gumawa nayexmaxü̃ca̱x ga napata.
69 Rü yexma nanaxü ga napata ga máchanene ga dauxü̃wa nguxü̃ne nax guxü̃guma ngẽ́ma nangexmaechaxü̃ca̱x nhama i naane ngẽxmaechaxü̃rüxü̃.
70 Rü nüxü̃ naxuneta ga gumá norü duü̃ ga Dawí ga carnérugüarü daruxü̃ ixĩcü.
71 Rü yemaacü yema carnérugüwe nax ínaxũũxü̃wa nanayaxu nax norü duü̃xü̃gü ga Iraéutanüxü̃güna nadauxü̃ca̱x.
72 Rü nüma ga Dawí rü meama nüxna nadau ga yema Tupanaarü duü̃xü̃gü rü meama Tupana naxwa̱xexü̃ãcüma namaxã inacua̱x.
