Salmo 79:1-13
Poraãcü ngúxü̃ ningegü yerü Yerucharéü̃gu napogüe ga norü uanügü
79 Pa Tupanax, ngẽma tama cuxü̃́ yaxõgüxü̃ rü naxca̱x ínayaxüãchi ya yima cupata ya üünene rü nanaxãũãchixẽxẽ. Rü nüma ya ĩane ya Yerucharéü̃ rü nagu napogüe.
2 Rü ngẽma naxü̃negü i ngẽma aixcuma curü duü̃xü̃gü ixĩgüxü̃ rü ngẽ́ma nanawogü nax ngẽmaãcü ẽchawemü rü aigüwemü yixĩgüxü̃ca̱x.
3 Rü nhama dexá íibaxü̃rüxü̃ nixĩ ga gumá nagü ga Yerucharéü̃arü namagüwa. Rü nataxuma nax texé inata̱xgüxü̃.
4 Rü ngẽma nachixü̃anegü i torü ngaicamána ngẽxmagüxü̃ rü togu nidauxcüraxü̃gü rü toxü̃ nacugüe.
5 Pa Cori Pa Tupanax ¿rü nhuxguxüratáta i nüxü̃ curüchauxü̃ nax tomaxã cunuxü̃? ¿Rü ẽ̱xna guxü̃gutáma nhama wüxi ya üxürüxü̃ niyauraecha i ngẽma curü nu?
6 ¡Rü ẽcü namaxã nanu i ngẽma nachixü̃anegü i tama cuxü̃́ yaxõgüxü̃ rü taguma yumüxẽwa cuxna cagüexü̃!
7 Yerü nümagü nixĩ ga totanüxü̃ ga Yacútanüxü̃xü̃ nadaixü̃ rü guxü̃wama nachixexẽẽãxü̃ ga tochixü̃ane.
8 ¡Rü tauxü̃́ i toguama cuyangutanüxẽẽxü̃ ga yema chixexü̃gü ga torü o̱xigü ügüxü̃! ¡Rü paxa cuxü̃́ tangechaxü̃tümüxü̃gü! Erü marü toxü̃ narüyexera i nhaa guxchaxü̃gü.
9 Pa Tupana ya Torü Maxẽxẽẽruxü̃x ¡rü curü üünegagu rü toxü̃ rüngü̃xẽxẽ, rü toxü̃ ínanguxü̃xẽxẽ, rü toxü̃́ nüxü̃ irüngüma i torü chixexü̃!
10 Rü ngẽma duü̃xü̃gü i tama cuxü̃́ yaxõgüxü̃ rü taxuca̱xma tü̱xcüü̃ nhanagürügü: “¿Ngecü nixĩ ya yimá norü Tupana?” nhanagürügü. Rü nhu̱xmax rü nüxü̃ tadauxchaü̃ nax nhuxãcü tá cunadaixü̃ i ngẽma torü uanügü ga curü duü̃xü̃güxü̃ daixü̃. Rü woo i ngẽma nachixü̃anecüã̱xgü i tama cuxü̃́ yaxõgüxü̃ rü nümagü rü ta nüxü̃ nadaugüxü̃ca̱x i ngẽma cuxüxü̃.
11 ¡Rü nüxü̃ naxĩnü i norü axu i ngẽma totanüxü̃gü ipoxcuexü̃! ¡Rü curü poramaxã ínanguxü̃xẽẽama i ngẽma totanüxü̃gü i dai namaxã naxuegugüxü̃!
12 Rü ngẽma nachixü̃anegü i cumaxã guxchigagüxü̃, Pa Cori Pa Tupanax ¡rü 7 e̱xpü̱xcüna napoxcue!
13 Rü nhu̱xũchi i toma nax curü duü̃xü̃gü tixĩgüxü̃ rü guxü̃gutáma moxẽ cuxna taxã. Rü torü wiyaemaxã guxü̃gutáma gucü ya taunecügügu cuxü̃ ticua̱xüxü̃gü.
