Salmo 8:1-9
Tupana rü guxü̃arü yora nixĩ notürü yima duü̃xü̃me̱xẽwa nanangexmaxẽxẽ i nhama i naane
8 Pa Cori Pa Tupana ya Guxü̃étüwa Ngẽxmacüx, rü cuéga rü guxü̃ma i nhama i naanewa nüxü̃ nacua̱xgü. Rü ngẽma curü üüne rü dauxü̃guxü̃ i naanearü yexerawa nangu.
2 Rü ngẽma buxü̃gü rü woo ngẽma maiexü̃ rü nüxna cunanguxẽxẽ nax cuxü̃ yacua̱xüü̃güxü̃ca̱x nax ngẽmaãcü nangóxü̃ca̱x i curü pora, rü ngẽma curü uanügü rü cupe̱xewa naxãneexü̃ca̱x rü yanangea̱xgüxü̃ca̱x.
3 8:3-4 Rü ngẽxguma chütacü dauxü̃gu chadawenügu rü nüxü̃ chadau i ngẽma cumatama cuxüxü̃ ya tauemacü rü ẽxtagü i ngẽ́ma cungexmagüxẽẽxü̃. Rü chaugüna chaca rü nhachagürü: “¿Ta̱xacüwa cuxü̃́ name i duü̃xü̃gü rü ngẽmaca̱x nagu curüxĩnüxü̃? ¿Rü tü̱xcüü̃ nüxna cucua̱xãchixü̃ rü naxca̱x cuxoégaãẽxü̃?” nhachagürü.
4 Nüü̃ nadau 8:3
5 Rü wixgutaa̱x cugüraxü̃xü̃chiãcü cunaxü ya yimá yatü, rü cunataxẽxẽ, rü nagu cuyaxõ.
6 Rü guxü̃ma i ngẽma cuxüxü̃étüwa cunangexmaxẽxẽ ya yimá yatü, rü namaxã nüxü̃ icucua̱xẽxẽ.
7 Rü carnérugüétüwa rü wocagüétüwa rü naexü̃güétüwa cunangexmaxẽxẽ.
8 Rü werigü i dauxü̃anegu ixüüxü̃xü̃étüwa, rü choxnigü i natüwa maxẽxü̃étüwa rü guxü̃ma i márwa ngẽxmagüxü̃étüwa cunangexmaxẽxẽ ya yimá yatü.
9 Pa Cori ya Guxü̃étüwa Ngẽxmacüx, rü cuéga rü guxü̃ma i nhama i naanewa nüxü̃ nacua̱xgü.