Salmo 80:1-19
Tupanaarü ngechaü̃ca̱x ínacagüe
80 80:1-2 Pa Cori Pa Tupana Pa Iraéutanüxü̃arü Daruxü̃x, rü cuma nixĩ i carnérugürüü̃ãcü Yúchetanüxü̃maxã icucuáxü̃. Rü cuma nax ngẽma taxre i dauxü̃cüã̱xchicüna̱xãgü i ixãpe̱xátüxü̃arü ngãxü̃wa nax curütoxü̃ ¡rü nüxü̃ naxĩnü i torü yumüxẽ! ¡Rü toxü̃ nangechaxü̃ãcüma mea nüxü̃ nadawenü ya Efraĩ́tanüxü̃ rü Bẽyamítanüxü̃ rü Manachétanüxü̃! ¡Rü inachi, rü nua naxũ nax curü poramaxã toxü̃ ícunguxü̃xẽẽ̱xü̃ca̱x!
2 Nüü̃ nadau 80:1
3 Pa Torü Tupanax ¡toxü̃ rüngü̃xẽxẽ nax noxrirüü̃tama wüxi i nachixü̃ane i poraxü̃ tixĩgüxü̃ca̱x! Rü tanaxwa̱xe nax toxü̃ cungechaxü̃xü̃ nax ngẽmaãcü naxme̱xwa ítanguxü̃xü̃ca̱x i torü uanügü.
4 Pa Cori Pa Tupana ya Guxãétüwa Ngẽxmacüx ¿rü nhuxguxüratáta nüxü̃ curüchauxü̃ nax tomaxã cunuxü̃ rü ngẽmaca̱x tama toxü̃́ nüxü̃ cuxĩnüchaü̃xü̃ i torü yumüxẽgü?
5 Rü ngẽma namaxã toxü̃ cuxüwemüxü̃ rü axu nixĩ, rü ngẽma namaxã toxü̃ cuxaxexẽẽxü̃ rü toxgüxü̃xetü nixĩ.
6 Rü ngẽma nachixü̃anegü i torü ngaicamagüxü̃arü dauxcüraxü̃ruxü̃ toxü̃ quixĩxẽxẽ, rü ngẽma torü uanügü rü toxü̃ nacugüe.
7 Pa Torü Tupanax ¡toxü̃ rüngü̃xẽxẽ nax noxrirüü̃tama wüxi i nachixü̃ane i poraxü̃ tixĩgüxü̃ca̱x! Rü tanaxwa̱xe i toxü̃ cungechaü̃ nax ngẽmaãcü naxme̱xwa ítanguxü̃xü̃ca̱x i torü uanügü.
8 Rü Eyítuanewa toxü̃ ícugaxü̃ nhama wüxi i úwa i ngexwaca̱x rüxüxü̃ i to i naanewa ngexü̃ rü ngẽxma yatoxü̃rüxü̃. Rü toxca̱x ícunawoxü̃ ga yema duü̃xü̃gü ga tama cuxü̃́ yaxõgüxü̃ nax yema nachica ga nawa ícunawoxü̃xü̃gu toxü̃ cumugüxü̃ca̱x.
9 Rü cunamexẽxẽ ga yema naane naxca̱x ga yema úwa. Rü yema úwa rü mea narüxü rü naxãxchuma̱xã rü guxü̃wama ga yema nachixü̃anewa rü nimu.
10 Rü guma ma̱xpǘnegü rü nanaga̱u̱xpechitagüxẽxẽ rü yema nanetügü ga máchanegü rü ta nanaga̱u̱xpechitaanexẽẽgü.
11 Rü yema nachacüügü rü guxü̃wama nangugü rü nhu̱xmata márwa nangugü rü nhu̱xmata natü i Eufrátewa nangugü.
12 Rü nhu̱xmax, Pa Tupanax ¿rü tü̱xcüü̃ cuyawa̱xẽxẽ i ngẽma úwanecüarü poxeguxü̃ rü ngẽmaca̱x nüxü̃́ natauxcha i ngẽma duü̃xü̃gü i ngẽ́ma chopetüxü̃ nax nacauü̃ãxü̃ca̱x i norü o?
13 Rü ngẽma ngũü̃gü rü nanacauü̃maxü̃gü rü ngẽma togü i naexü̃gü rü nayawacutanügü.
14 Pa Tupana ya Guxãétüwa Ngẽxmacüx ¡rü toxca̱x natáegu rü dauxü̃guxü̃ i naanewa toxü̃ ínadawenü! ¡Rü wenaxarü toxü̃ nayaxu nhama úwa ga ítáxü̃ rü wena iyaxuxü̃rüxü̃!
15 Rü nhama úwa itoxü̃rüxü̃ rü cuma rü nhaa naanegu toxü̃ cumugü. Rü cumatama toxna cudau nhama úwa i ngexwaca̱x rüxüxü̃ rü igüpǘnexü̃rüxü̃.
16 ¡Ẽcü curü numaxã nadai i ngẽma torü uanügü i curü duü̃xü̃güxü̃ daixü̃ rü üxümaxã ínaguxchaü̃xü̃!
17 ¡Notürü toxü̃ rüngü̃xẽxẽ i toma i woetama toxü̃ cuxunetaxü̃ nax curü duü̃xü̃gü tixĩgüxü̃! ¡Rü toxna nadau i toma ítayaxügüxü̃ natanüwa ga yema duü̃xü̃gü ga cumatama nüxü̃ cuxunetaxü̃!
18 ¡Ẽcü toxü̃ rüngü̃xẽxẽ rü tagutáma cuxna tixĩgachi! ¡Rü toxü̃ namaxẽxẽxẽ rü cuxnaxica tátama nixĩ i ítaca̱xaxü̃ i torü yumüxẽwa!
19 Pa Torü Tupana ya Guxãétüwa Ngẽxmacüx ¡toxü̃ rüngü̃xẽxẽ nax noxrirüü̃tama wüxi i nachixü̃ane i poraxü̃ tixĩgüxü̃ca̱x! ¡Rü toxü̃ nangechaxü̃ nax ngẽmaãcü torü uanügüme̱xẽwa ítanguxü̃xü̃ca̱x!
