Salmo 81:1-16
Tupana rü Iraéutanüxü̃maxã namecüma naétüwa i norü chixexü̃gü
81 ¡Rü taãxẽãcü Tupanaca̱x pewiyaegü! Erü nüma nixĩ i tüxü̃ naporaexẽẽxü̃. ¡Ẽcü tagaãcü nüxü̃ pecua̱xüxü̃gü ya yimá Yacúarü Tupana!
2 ¡Rü pãdérumaxã rü árpamaxã rü árpaxacümaxã pegü pepaxpe̱xegüãcüma pewiyaegü!
3 Rü ngẽxguma ngexwaca̱x nango̱xgux ya tauemacü ¡rü peyacue ya cornéta! Rü ngẽxgumarüxü̃ ta i ngẽxguma tüema yixĩxgu ¡rü peyacue! Rü ngẽma nixĩ i ngunexü̃ i nagu naxüchigaxü̃ nax Tupanaxü̃ icua̱xüü̃güxü̃.
4 Erü yema nixĩ ga mu ga Yacúarü Tupana Iraéutanüxü̃na ãxü̃.
5 Rü yema nixĩ ga mu ga Yúchetanüxü̃na naxãxü̃ ga yexguma Tupana Eyítuanecüã̱xarü ãẽ̱xgacüxü̃ naxãxũnegu. Rü chama rü nüxü̃ chaxĩnü ga wüxi ga naga ga tama nüxü̃ chacuáxü̃ ga nhaxü̃:
6 “Pa Iraéutanüxü̃güx, marü pexü̃ ichaxüxweta rü pexü̃ íchanguxü̃xẽxẽ nawa ga yema puracü ga nagu pexü̃ nadaixü̃.
7 Rü yexguma guxchaxü̃wa peyexmagügu ga Eyítuanewa rü choxna pecagüe, rü chama rü pexü̃ íchanguxü̃xẽxẽ. Rü yema caixanexü̃ ga duruanexü̃ nawa ínaxũxü̃wa pexü̃ changãxü̃. Rü yexguma Meribáwa pengugügu rü nataxu̱xgu ga dexá rü chama rü pexü̃ chaxümare yerü nüxü̃ chacuáxchaü̃ ga perü õ.
8 Pa Chorü Duü̃xü̃güx ¡naga pexĩnüe i nhaa chorü ucu̱xẽ i pemaxã nüxü̃ chixuxü̃! ¡Chierü chauga pexĩnüegux, Pa Iraéutanüxü̃güx!
9 Rü tama chanaxwa̱xe i namaxã petupanaã̱xgü i ngẽma tama aixcuma Tupana ixĩxü̃ rü tama chanaxwa̱xe i nüxü̃ pecua̱xüxü̃gü i naxchicüna̱xãgü.
10 Rü chama nixĩ i perü Cori ya Tupana chixĩxü̃ ga Eyítuanewa pexü̃ íchanguxü̃xẽẽ̱xü̃. Rü ngẽxguma ta̱xacü pexü̃́ taxu̱xgux ¡rü choxna peca! Rü chama rü tá pexna chanaxã.
11 Notürü i pema i chorü duü̃xü̃gü i Iraéutanüxü̃gü, rü tama choxü̃́ ipexĩnüe rü tama chauga pexĩnüechaü̃.
12 Rü yemaca̱x nixĩ ga pexü̃ chayexrüxü̃ nax penaxüamaxü̃ca̱x ga perü chixexü̃ rü pema penaxwa̱xexü̃ãcüma pemaxẽxü̃ca̱x.
13 81:13-14 Rü yexguma chi chauga pexĩnüegu, Pa Chorü Duü̃xü̃güx, rü chi nagu pexĩxgu ga yema pexü̃ chamuxü̃, Pa Iraéutanüxü̃güx, rü chi paxaxüchi chanaxãneexẽxẽ ga yema pemaxã rüxuanüã̱xgüxü̃ rü chi chanapoxcue”, nhanagürü ga Tupana.
14 Nüü̃ nadau 81:13
15 Rü ngẽma naxchi aiexü̃ ya Cori ya Tupana, rü norü muü̃maxã tá nape̱xegu nayayitanü erü ngẽma norü poxcu rü marü namaxã naxuegu.
16 Notürü ngẽxguma chi norü duü̃xü̃gü ya Tupana naga ĩnüegu rü chi mexü̃ i trígumaxã nanaxüwemü rü chi berurewa nayaxaxegüxẽxẽ.
