Salmo 82:1-8
Ãẽ̱xgacügü i guxchaxü̃arü mexẽẽruü̃étüwa nangexma ya Tupana
82 Rü Tupana ãẽ̱xgacü íyixĩxü̃wa i dauxü̃guxü̃ i naanewa rü inachi nax poxcu namaxã naxueguxü̃ca̱x i ngẽma ãẽ̱xgacügü i guxchaxü̃arü mexẽẽruü̃gü i chixri norü duü̃xü̃gümaxã icua̱xgüxü̃. Rü nhanagürü:
2 “¿Nhuxguxüratáta i nüxü̃ perüchauxü̃ nax chixri duü̃xü̃gümaxã ipecuáxü̃ rü ngẽma chixri maxẽxü̃étüwaama nax pexügüxü̃?
3 Rü dücax, rü name nixĩ i nüxü̃ perüngü̃xẽẽgü i ngẽma duü̃xü̃gü i taxucürüwa nügü ípoxü̃güxü̃ rü ngẽma taxcutagü. Rü ẽcü nüxü̃ perüngü̃xẽxẽ i ngẽma ngearü diẽruã̱xgüxü̃ rü ngẽma nüxü̃́ nataxuxü̃ i norü ngẽmaxü̃gü.
4 ¡Rü ngẽma chixexü̃ i duü̃xü̃güme̱xẽwa ípenanguxü̃xẽxẽ i ngẽma taxucürüwama nügü ípoxü̃güxü̃ rü ngẽma ngearü diẽruã̱xgüxü̃!
5 Notürü i pemax, Pa Ãẽ̱xgacügüx, rü tama peãẽxü̃ pecua̱x rü peechitamare pemaxẽ. Rü ngẽmaca̱x nangexma i taxü̃ i chixexü̃ i petanüwa rü ngẽma duü̃xü̃gü i namaxã pecuáxü̃ rü pemaxã nanue.
6 Rü chama rü pexü̃ chaxuxgu rü tupanagü pexĩgü erü chauxacügü pexĩgü i chama nax guxãétüwa changexmaxü̃.
7 Notürü i pema rü guxü̃ i duü̃xü̃gürüxü̃ tá peyue. Rü ngexü̃rüüxü̃ i ãẽ̱xgacü i chixri norü duü̃xü̃gümaxã icuáxü̃rüü̃ãcü tá peyue”, nhanagürü ya Tupana.
8 Pa Tupanax ¡ẽcü inachi rü nüxna naca i norü chixexü̃chiga i nhama i naanecüã̱xgü i ãẽ̱xgacügü! Erü cuma nixĩ i norü yora quixĩxü̃ i guxü̃ma i nachixü̃anegü.