Salmo 84:1-12
Choxü̃́ nangúchaü̃ nax Tupanapatawa changexmaxü̃
84 Pa Cori Pa Tupanax ya Guxãétüwa Ücüx, rü namexechi ya cupata ya üünene.
2 Rü poraãcü choxü̃́ nangúchaü̃ nax cupataa̱xtügu chaxücuxü̃. Rü guxü̃ma i chorü taãxẽmaxã cuxca̱x chawiyaechaü̃ Pa Tupana ya Guxü̃guma Maxü̃cüx.
3 Rü woo i chirugü rü togü i werigü rü naxãchica i ngẽ́ma cupatawa nax ngẽxma naxüxchiãxü̃güxü̃ca̱x, Pa Chorü Tupana Pa Chorü Ãẽ̱xgacü ya Guxãétüwa Ücüx.
4 Rü tataãxẽgü ya yíxema cupatawa ngẽxmagüxe rü guxü̃guma cuxü̃ icua̱xüxü̃güxe.
5 Rü tataãxẽgü ya yíxema cuxü̃tagu tümaarü ngü̃xẽẽxü̃ iyangauxe rü yíxema yáxü̃wa ne ĩxe nax yima curü ma̱xpǘnewa cuxü̃ tayarücua̱xüü̃güxü̃ca̱x.
6 Rü ngẽxguma ngẽma ngatexü̃ i pachitamaxü̃ i Naxgüxü̃etügu ãégaxü̃wa tangupetütanügu rü cuma rü ngẽ́ma tá cunamu ya pucü nax ngẽmaãcü nayimaxü̃ca̱x ya burawegü nax ngẽ́ma taxaxegüxü̃ca̱x.
7 Rü wüxichigü i ngunexü̃gu rü yexeraãcü tá tiporaetanü. Rü ngẽxguma curü ma̱xpǘne ya üünene ya Chiã́ũwa tangugügu, rü ngẽ́ma tá cuxü̃ tadaugü, Pa Tupanax.
8 Pa Cori Pa Tupana ya Guxãétüwa Ngẽxmacü ya Iraéutanüxü̃güarü Tupanax ¡rü nüxü̃ naxĩnü i chorü yumüxẽ!
9 Pa Tupana i Torü Poxü̃ruxü̃x ¡rü cuxü̃́ nangechaxü̃tümüxü̃ ya yimá cuma nüxü̃ cuxunetacü nax Iraéuanecüã̱xgüarü ãẽ̱xgacü yixĩxü̃ca̱x!
10 Rü ngẽma 1,000 i ngunexü̃ i nagu ngextámare changexmaxü̃arü yexera rü narümemae nixĩ nax wüxitama i ngunexü̃ cupataa̱xtüwa changexmaxü̃. Rü narümemae nax cua̱xpataarü daruü̃mare chixĩxü̃, Pa Tupanax, rü tama chixexü̃ ínaxügüxü̃wa nax changexmaxü̃.
11 Erü nüma ya Cori ya Tupana rü norü duü̃xü̃güxü̃ nibáixmaxü̃ rü ínanapoxü̃. Rü yíxema tama naxügüxe i ngẽma chixexü̃ rü nüma ya Tupana rü tüxü̃ nangechaü̃ rü tüxü̃ nicua̱xüxü̃ rü tama tüxna nanachu̱xu i norü mexü̃.
12 Pa Cori Pa Tupana ya Guxãétüwa Ngẽxmacüx, rü tataãxẽgü ya yíxema aixcuma cugu yaxõgüxe.
