Salmo 85:1-13
¡Wenaxarü toxü̃ rüngü̃xẽxẽ, Pa Tupanax!
85 Pa Corix, toma nax curü duü̃xü̃gü i Yacútanüxü̃gü nax tixĩgüxü̃ rü cuma rü poraãcü tomaxã cumecüma rü wenaxarü toxü̃ cutaãxẽxẽxẽ.
2 Rü marü toxü̃́ nüxü̃ curüngüma i torü chixexü̃gü rü pecádugü ga cupe̱xewa taxüxü̃.
3 Rü yema nax tomaxã cunuxü̃ rü marü ícurüngüxmüxü̃chi.
4 Pa Tupana ya Torü Maxẽxẽẽruxü̃x, rü nhu̱xmax rü tanaxwa̱xe i wenaxarü toétüwa cuchogü. Rü tama name i tomaxã cunuecha.
5 ¿Ẽ̱xna cuyadaxẽxẽ nax guxü̃gutáma tomaxã cunuechaxü̃?
6 ¿Rü tama ẽ̱xna i wenaxarü toxü̃ ícurüdagüxẽẽxü̃ nax ngẽmaãcü cumaxã tataãxẽgüxü̃ca̱x i tomax i curü duü̃xü̃gü nax tixĩgüxü̃?
7 Pa Cori Pa Tupanax ¡toxü̃ nangechaxü̃ rü toxü̃ ínanguxü̃xẽxẽ!
8 Rü nhu̱xmax rü tá icharüxĩnü i ngẽma nüxü̃ yaxuxü̃ ya Cori ya Tupana erü norü duü̃xü̃gü i naga ĩnüexü̃maxã tá nüxü̃ nixu nax marü namaxã inangüxmüxü̃. Notürü tama nanaxwa̱xe nax wena norü chixexü̃ca̱x nawoeguxü̃.
9 Rü aixcuma nixĩ ya Tupana i tüxna nangaicamaxü̃ nax tüxü̃ nangü̃xẽẽxü̃ca̱x ya yíxema naga ĩnüexe. Rü ngẽmaãcü i ngẽma norü üüne rü torü naanewa tá nangexma.
10 Rü ngẽxguma Tupana norü duü̃xü̃gütanüwa ngẽxmagu, rü tá nügü nangechaü̃gü rü tá nügümaxã nixaixcumagü rü tá nügümaxã inarüngüxmüxe rü tá meama niwe̱xgü i norü maxü̃wa.
11 Rü duü̃xü̃gü rü tá nügümaxã nixaixcuma rü ngẽma rü guxü̃wama tá nango̱x nhama wüxi i nanetü i waixümüwa ngóxü̃rüxü̃. Rü ngẽma nax mea namaxẽxü̃ i duü̃xü̃gü rü tá ta meama nango̱x nhama üa̱xcü i caixanexü̃pechitawa ngóxü̃rüxü̃.
12 Rü nümatama ya Cori ya Tupana rü tá pucü ínananguxẽxẽ rü ngẽma tórü naanewa rü tá mea narüxügü i tanetügü.
13 Rü ngẽxguma tatanüwa nangexmagu ya Cori ya Tupana, rü tá aixcuma mea naxca̱x tamaxẽ. Rü nüma rü tá tüxü̃ narüngü̃xẽẽ nax nacümagu ixĩxü̃.
