Salmo 86:1-17
Cuxicatama nixĩ i Tupana quixĩxü̃
86 Pa Corix ¡choxü̃́ nüxü̃ naxĩnü i chorü yumüxẽ! Erü poraãcü ngúxü̃ chinge rü guxchaxü̃wa changexma.
2 ¡Rü choxna nadau! Erü chama rü cumaxã chixaixcuma. ¡Rü choxü̃ ínanguxuchixẽxẽ! Erü cuma nixĩ i chorü Tupana quixĩxü̃ rü cugu nixĩ i chayaxõxü̃.
3 ¡Pa Cori Pa Tupanax, cuxü̃́ changechaxü̃tümüxü̃! Erü guxü̃ma i oragu rü chorü yumüxẽwa rü cuxna chacaecha.
4 Pa Corix, chama nax curü duü̃xü̃ chixĩxü̃ ¡rü ẽcü choxü̃ nataãxẽxẽxẽ! Erü cumaxã nixĩ i chidexaxü̃ i chorü yumüxẽwa.
5 Erü cumax, Pa Corix, rü cumecüma rü nüxü̃ icurüngüma i torü chixexü̃gü. Rü aixcuma tüxü̃ cungechaü̃ ya yíxema curü ngü̃xẽẽca̱x cuxna caxe.
6 Pa Corix ¡choxü̃́ nüxü̃ naxĩnü i chorü yumüxẽ! ¡Rü choxü̃ nangãxü̃ rü choxna naxã i ngẽma cuxna naxca̱x chaca̱xü̃!
7 Rü nhu̱xmax nax guxchaxü̃wa changexmaxü̃, rü cuxna chaca erü cuma rü guxü̃guma choxü̃ cungãxü̃ga.
8 Rü nataxuma i to i tupana i cumaxã wüxiguxü̃, Pa Corix. Rü taxúema tanaxü i ngẽma taxü̃ i mexü̃gü i cuma cuxüxü̃.
9 Pa Corix, cuma nixĩ ga cunangóexẽẽxü̃ i guxü̃ma i nachixü̃anegü. Rü ngẽma nachixü̃anegü rü tá cuxca̱x naxĩ nax cuxü̃ nataxẽẽgüxü̃ca̱x rü cuxü̃ yacua̱xüü̃güxü̃ca̱x.
10 Erü cuxicatama nixĩ nax Tupana quixĩxü̃. Rü cuma nixĩ i nüxü̃ cucua̱xüchixü̃ rü cunaxüxü̃ i ngẽma taxü̃ i mexü̃gü i curü poramaxã cuxüxü̃.
11 Pa Corix ¡choxü̃ nawe̱x i ngẽma cumaxü̃ nax aixcuma nagu chixũxü̃ca̱x! Rü chanaxwa̱xe i choxü̃́ cunangúchaü̃xẽxẽ nax cuxü̃ chicua̱xüüxü̃ca̱x.
12 Pa Cori Pa Chorü Tupanax, rü guxü̃ma i chorü maxü̃maxã tá cuxü̃ chicua̱xüxü̃. Rü guxü̃gutáma chanataxẽxẽ i cuéga.
13 Rü nataxüchi i curü ngechaü̃ i cha̱u̱xca̱x. Rü marü choxna cuyaxũgachixẽxẽ i ngẽma yu nax tama naxmaxü̃gu chixücuchixü̃ca̱x.
14 Pa Tupanax, rü nangexma i nhuxre i duü̃xü̃gü i tama cugu rüxĩnüexü̃ rü nügü icua̱xüxü̃güxü̃ rü máxwa̱xegüxü̃, rü chauxchi aiexü̃, rü ngẽma rü choxü̃ nima̱xgüchaü̃.
15 Notürü i cumax, Pa Corix, rü Tupana ya mecümacü rü ngechaü̃wa̱xecü quixĩ. Rü cuma rü yaxna tomaxã cuxĩnü, rü poraãcü toxü̃ cungechaü̃, rü guxü̃guma tomaxã quixaixcuma.
16 ¡Rü choxü̃ nadawenü nax curü duü̃xü̃ chixĩxü̃! ¡Rü cuxü̃́ changechaxü̃tümüxü̃! ¡Rü pora choxna naxã! ¡Rü choxü̃ ínanguxuchixẽxẽ naxme̱xwa i ngẽma duü̃xü̃gü i choxü̃ ima̱xgüchaxü̃xü̃!
17 ¡Rü choxü̃ rüngü̃xẽxẽ! ¡Rü choxna naxã i wüxi i cua̱xruxü̃ nax ngẽmawa nangóxü̃ca̱x nax chamaxã cumecümaxü̃ rü ngẽma chauxchi aiexü̃ naxãneexü̃ca̱x i ngẽxguma nüxü̃ nadaugügu! Erü cumax, Pa Corix, rü guxü̃guma choxü̃ curüngü̃xẽẽ rü choxü̃ cutaãxẽxẽxẽ.
