Salmo 87:1-7
Tupanaarü ĩane ya Yerucharéü̃xü̃ nicua̱xüxü̃gü
87 Rü yima ma̱xpǘne ya Chiã́ũgu nixĩ i naxüxü̃ ya yima Tupanaarü ĩane ya Yerucharéü̃.
2 Rü nüma ya Cori ya Tupana rü poraãcü nüxü̃ nangechaü̃ ya yima ĩane guxü̃nema ya naigü ya Iraéuanearü ĩanearü yexera.
3 Pa Tupanaarü Ĩanex, rü mexechixü̃ i ore cuchiga nixugü.
4 Rü natanüwa i ngẽma duü̃xü̃gü i choxü̃ cua̱xgüxü̃ rü nangexma i duü̃xü̃gü i Eyítuanegu buexü̃, rüe̱xna Babiróniaanegu buexü̃, rüe̱xna Firitéugüanegu buexü̃, rüe̱xna Tíruarü ĩanegu buexü̃ rüe̱xna Echiopíaanegu buexü̃. Rü wüxichigü i ngẽmagü rü poraãcü ngẽma ĩane i nagu nabuxü̃maxã nataãxẽ.
5 Notürü guxü̃arü yexera nataãxẽgü i ngẽma Yerucharéü̃gu buexü̃. Erü nümatama ya Tupana ya guxãétüwa ngẽxmacü rü nüxü̃ naxuneta ya yima ĩane nax noxrü yixĩxü̃.
6 Rü ngẽma popera i nawa nango̱xégagüxü̃ i duü̃xü̃gü, rü Tupana rü tá nüxü̃ nawüneta i ngẽma duü̃xü̃égagü i Yerucharéü̃gu buexü̃.
7 Rü ngẽma Yerucharéü̃wa wiyaegüxü̃ rü ngẽma paxetagüxü̃ rü nhanagürügü tá: “Guxü̃ma i chorü taãxẽ rü cuwa nangexma, Pa Yerucharéü̃x”, nhanagürügü tá.