Salmo 88:1-18
Pa Corix ¿tü̱xcüü̃ tama choxü̃ cucuáxchaxü̃?
88 Pa Corix, Pa Chorü Tupanax, Pa Chorü Maxẽẽruxü̃x, ngunecü rü chütacü rü cuxna chaca nax choxü̃ curüngü̃xẽẽxü̃ca̱x.
2 ¡Rü choxü̃́ nüxü̃ naxĩnü i chorü yumüxẽ, rü choxna naxã i ngẽma cuxna naxca̱x chaca̱a̱xü̃!
3 Rü poraãcü taxü̃ i guxchaxü̃ chauétü nangu rü nagu charüxĩnü rü ngẽmamaxã tá chayu.
4 Rü duü̃xü̃güca̱x rü marü yuexü̃tanüwa changexma erü marü nataxuma i chorü pora.
5 Rü nua yuexü̃tanüwa choxü̃ nata̱xgü. Rü chama rü wüxi i duü̃xü̃ i daigu yuxü̃ rü itáxü̃rüxü̃ chixĩ. Rü nhama wüxi i duü̃xü̃ i nüxü̃ cuxoxü̃ rü nüxü̃ icurüngümaxü̃rüxü̃ chixĩ.
6 Rü ngẽma ãxmaxü̃ i ma̱xmaxü̃chixü̃wa choxü̃ cuta̱x i ngextá ínawaanexüchixü̃wa.
7 Rü chauétü cunanguxẽxẽ i ngẽma curü nu. Rü poraãcü ãũcümaxü̃wa choxü̃ cungexmaxẽxẽ nhama dexágu inguxgurüxü̃.
8 Rü ngẽma chamücügüãẽwa ícunanguxẽxẽ nax choxna naxĩgüxü̃ca̱x. Rü wüxi i norü guxchaxẽẽruxü̃ choxü̃ quixĩxẽxẽ. Rü nhama wüxi i poxcuxü̃ i taxucürüwama inhaxü̃rüxü̃ chixĩ.
9 Rü ngẽma nax poraãcü chaxauxechaxü̃gagu rü düxwa chixoxetü. Rü guxü̃ma i ngunexü̃gu rü cuxca̱x chaxunagüme̱xẽãcüma cuxna chaca, Pa Corix, rü auxãcüma cumaxã nüxü̃ chixu i chorü guxchaxü̃.
10 ¿Rü ta̱xacüwa i choxü̃́ namexü̃ i ngẽma taxü̃ i mexü̃gü i curü poramaxã cuxüxü̃ ega marü chayu̱xgux? ¿Rü nhuxãcü i wüxi i yuxü̃ rü moxẽ cuxna naxã?
11 Rü ngẽxguma chayu̱xgu rü axmaxü̃wa changexmagu ¿rü nhuxũcürüwa duü̃xü̃gümaxã nüxü̃ chixu nax nhuxãcü quixaixcumaxü̃ rü toxü̃ cungechaxü̃xü̃?
12 Rü ngẽma yuexü̃tanüwa i ngextá ínaxẽanexü̃wa ¿rü tayíxemaxü̃ ya texé ya nüxü̃ ixuxe nax quixaixcumaxü̃ rü taxü̃ i mexü̃gü cuxüxü̃?
13 Notürü i chamax, Pa Corix, rü cuxna nixĩ i chaca̱xü̃ rü guxü̃guma i pa̱xmama rü cumaxã nixĩ i chidexaxü̃.
14 ¿Rü tü̱xcüü̃ nixĩ i choxü̃ cuxoxü̃, Pa Corix, rü tü̱xcüü̃ nixĩ i cha̱u̱xcha̱xwa iquicúxü̃?
15 Rü changextü̱xügucürüwatama rü guxchaxü̃wa changexmaecha rü ngẽmamaxã wixguxuchi chayu. Rü poraãcü yaxna namaxã chaxĩnü ga yema guxchaxü̃gü ga cuma cha̱u̱xca̱x ícunguxẽẽxü̃. Rü nhu̱xmax rü düxwa marü tama namaxã chapora.
16 Rü ngẽma curü nu i ãũcümaxü̃ rü marü chauétüwa nangu rü choxü̃ narüporamae.
17 Rü guxü̃ i oragu rü ngẽma curü nu rü choxü̃ ínayáeguãchi nhama wüxi ya tacü ya mucürüxü̃.
18 Rü cuma rü marü choxna cuyaxĩgachixẽxẽ i guxü̃ma i ngẽma chamücügü rü yema ü̃pa namaxã chaxãmücügüxü̃. Rü nhu̱xmax rü ngẽma ẽanexü̃xicatama nixĩ i namaxã chaxãmücüxü̃.
