Salmo 9:1-20
Tupanaxü̃ ticua̱xüxü̃ erü mexü̃ naxü
9 Pa Cori Pa Tupanax, cuxü̃ chicua̱xüxü̃chaü̃ guxü̃ne ya chorü maxü̃nemaxã. Rü nüxü̃ chixuchigachaü̃ i ngẽma muxü̃ma i mexü̃gü i cuxüxü̃.
2 Pa Tupana ya Guxãétüwa Ngẽxmacüx, rü chorü taãxẽmaxã poraãcü cuxü̃ chicua̱xüxü̃. Rü cuxca̱x chawiyaechaü̃.
3 Rü ngẽma chorü uanügü rü cuxcha̱xwa nibuxmü rü nayayi rü nayue.
4 Cuma rü ãẽ̱xgacü ya ixaixcumacü quixĩ. Rü curü tochicaxü̃wa curüto nax ngẽ́ma chauétüwa cuchogüxü̃ca̱x.
5 Rü cuyangagü i ngẽma tama cuxü̃́ yaxõgüxü̃, rü cunadai i ngẽma chixri maxẽxü̃. Rü noxtacüma ícunapi i naégagü i curü poperawa.
6 Rü ngẽma chorü uanü rü marü nayu, rü yima norü ĩanegü rü namaxãtama narüxogü. Rü cumax, Pa Tupanax, nixĩ ga cuyanaxoxẽẽxü̃. Rü taxuxü̃ma i ta̱xacü nawa inayaxügü rü bai i ta̱xacü i nawa nüxna nax icua̱xãchixü̃ca̱x.
7 Notürü nüma ya Cori ya Tupana rü guxü̃gutáma ãẽ̱xgacü nixĩ. Rü nüma rü norü tochicaxü̃wa narüto nax ngẽ́ma nangugüaxü̃ca̱x i wüxichigü i duü̃xü̃güarü maxü̃.
8 Rü nüma rü tá mea guxü̃ i duü̃xü̃güarü maxü̃ nangugü. Rü nhu̱xũchi tá nüxü̃ nixu i ta̱xacü tá nixĩ i namaxã naxueguxü̃.
9 Rü nüma ya Cori ya Tupana rü tüxna nadau ya yíxema chixri tümamaxã inacua̱xgüxe. Rü tüxü̃ narüngü̃xẽẽ ega ngúxü̃ tingegügu.
10 Pa Corix, yíxema cuxü̃ cua̱xgüxe rü cugu tayaxõgü. Rü taguma tüxü̃ icuyarüngüma ya yíxema cuxca̱x daugüxe.
11 ¡Rü naxca̱x pewiyaegü ya Cori ya Tupana ya Yerucharéü̃wa ãẽ̱xgacü ixĩcü! ¡Rü guxü̃ma i ĩanegüwa nüxü̃ pexu i ngẽma mexü̃gü i naxüxü̃!
12 Rü nüma ya Tupana rü tüxna nacua̱xãchi ya yíxema ngechaü̃güxe rü tama nüxü̃ inarüngüma i ngẽma tümaarü axu. Notürü nanapoxcue i ngẽma chixri tümamaxã icua̱xgüxü̃.
13 Pa Corix ¡cuxü̃́ changechaxü̃tümüxü̃! ¡Rü dücax, nüxü̃ nadawenü i nhuxãcü choxü̃ nachixeãxẽ i ngẽma chauxchi aiexü̃! ¡Rü nawa choxü̃ ínanguxuchixẽxẽ i ngẽma yu!
14 Rü ngẽxguma choxü̃ ícunguxuchixẽẽgu rü chama rü tá Yerucharéü̃arü ĩã̱xwa cuxü̃ chicua̱xüxü̃ nape̱xewa i guxü̃ma i duü̃xü̃gü. Rü namaxã tá nüxü̃ chixu nax chataãxẽxü̃ erü choxü̃ ícunguxuchixẽxẽ.
15 Rü ngẽma tama yaxõgüxü̃ i duü̃xü̃gü, rü nümatátama nagu nayi i ngẽma ãxmaxü̃ i toguxeca̱x namagu naxügüxü̃. Rü nümatátama nagu ínanue i ngẽma püxcha i toguxeca̱x bexma ngẽxma naxǘgüxü̃.
16 Rü nüma ya Cori ya Tupana rü nügü nango̱xẽxẽ i ngẽxguma napoxcuãxgu i ngẽma chixexü̃ ügüxü̃. Rü ngẽmaca̱x i ngẽma chixexü̃ ügüxü̃ rü tá napoxcue nagagu i ngẽma chixexü̃ i nümagütama bexma toguxeca̱x naxügüxü̃.
17 Rü ngẽma chixexü̃ ügüxü̃ rü ngẽma tama yaxõgüxü̃ rü ngẽma Tupanaxü̃ iyarüngümaexü̃ rü poxcu i taguma gúxü̃wa tá naxĩ.
18 Notürü yíxema yaxna ĩnüexe ega woo guxchaxü̃gü tümaca̱x ínguxgu rü tama notüca̱xma Tupanaarü ngü̃xẽẽ ítanangu̱xẽẽgü, erü nüma ya Tupana rü taxũtáma tüxü̃ inarüngüma rü tá tüxü̃ narüngü̃xẽẽ.
19 Pa Cori Pa Tupanax ¡tauxü̃́ i cunaxüchicaxü̃ i ngẽma duü̃xü̃gü i cuétüwa nügü ügüxẽẽchaü̃xü̃! ¡Ẽcü cugüpe̱xewa nagagü i ngẽma tama yaxõgüxü̃ nax nüxna cuca̱xaxü̃ca̱x nachiga i norü chixexü̃gü!
20 Pa Corix ¡namuü̃exẽxẽ i ngẽma chixexü̃ ügüxü̃! ¡Rü nüxü̃ nüxü̃ nacua̱xẽxẽ nax nümagü rü duü̃xü̃gümare yixĩgüxü̃!
