Salmo 90:1-17
Tupana rü guxü̃guma namaxecha notürü i duü̃xü̃gü rü nayuewa̱xe
90 Pa Cori Pa Tupanax, cuma rü woetama torü poxü̃ruxü̃ quixĩ rü guxü̃guma cuxme̱xwa tangexmagü.
2 Rü nũxcümaxü̃chima naxü̃pa nax cunaxüxü̃ ga nhama ga naane rü norü ma̱xpǘnegü rü woetama marü Tupana quixĩ. Rü cuma rü guxü̃gutáma cungexmaecha.
3 Rü cuma rü cuxü̃́ natauxcha nax wena waixümüxü̃ cuyaxĩxẽxẽ ya duü̃xü̃ i ngẽxguma tomaxã cunaxuegu̱xgu nax tayuexü̃ rü nhacu̱xgu: “¡Pa Duü̃xü̃güx, wena waixümüxü̃ pexĩgüx!” nhacu̱xgu.
4 Rü 1000 ya taunecü rü cuxca̱x rü nhama wüxitama i ngunexü̃ i ngupetüxü̃rüxü̃ nixĩ, rü nhuxre i ora i chütaxü̃rüxü̃ nixĩ.
5 Rü cuma rü wüxi i paxaãchica̱xmare toxna cunaxã i maxü̃ rü paxama tixüpetü nhama wüxi i pexãchi üpetürüxü̃.
6 Rü toma rü nhama maxẽ i pa̱xmama ya̱u̱xatüxü̃ notürü yáuanecü rünhẽ̱xẽxü̃ rü yuxü̃rüxü̃ tixĩgü.
7 Rü aixcuma i ngẽma curü nu rü toxü̃ nadai rü toxü̃ namuü̃exẽxẽ.
8 Rü torü pecádugü rü torü chixexü̃gü i cúãcü taxüxü̃ rü cupe̱xewa nango̱xoma.
9 Rü ngẽmagagu i curü nu rü toétü nangu rü torü maxü̃ rü paxama nagu̱x. Rü nhama wüxi i ngü̃ãcüürüxü̃ paxama naxüpetü ya torü taunecügü.
10 Rü 70 ya taunecü nixĩ ya woetama nagu imaxẽcü. Rü yíxema rüporamaegüxe rü 80 ya taunecüwa tangugü. Notürü yíxema máxarü maxü̃ã̱güxe rü tümaca̱x ínangu i ngúxü̃gü rü guxchaxü̃gü. Rü yimá torü taunecügü rü torüxü̃ paxama nangupetü.
11 Pa Tupanax ¿rü texé nüxü̃ tacua̱x nax nhuxãcü poraãcü naxãũcümaxü̃ i curü nu? ¿Rü texé nüxü̃ tacua̱x nax naxca̱x tamuü̃xü̃ i ngẽma curü nu?
12 Pa Tupanax ¡rü toxü̃ nüxü̃ nacua̱xẽxẽ nax nanoxrexü̃ i torü ngunexü̃gü! ¡Rü toxü̃ rüngü̃xẽxẽ nax mea cuxca̱x tamaxẽxü̃ nagu ya yimá taunecügü ya toxna cuxãcü!
13 Pa Corix ¡toxca̱x natáegu! ¡Rü tauxü̃́ i cuyamáchigüxẽxẽxü̃ nax toxca̱x cutáeguxü̃! Rü toma nax curü duü̃xü̃gü tixĩgüxü̃ rü ¡cuxü̃́ tangechaxü̃tümüxü̃gü!
14 ¡Rü guxü̃guma i noxri yangunegu rü toxna naxã i curü ngechaxü̃! Rü ngẽxguma i toma rü guxü̃gutáma taãxẽãcüma cuxca̱x tawiyaegü.
15 Rü gumá taunecügü ga ngúxü̃ nagu tingegücüe̱xpü̱x ¡rü toxna naxã ya taunecügü ya nagu tataãxẽgücü!
16 ¡Rü toxü̃ nüxü̃ nadauxẽxẽ i curü üüne rü wenaxarü toxca̱x naxü ga yema taxü̃gü ga mexü̃gü ga nũxcüma curü poramaxã cuxüxü̃ nax ngẽmaãcü i toma rü totaagü nüxü̃ daugüxü̃ca̱x!
17 Pa Cori Pa Torü Tupanax, rü tanaxwa̱xe i tomaxã cumecüma rü toxü̃ cungechaü̃. ¡Rü ẽcü toxü̃ rüngü̃xẽxẽ nax mea ínanguxuchixü̃ca̱x i ngẽma puracü i taxüxü̃! Rü tanaxwa̱xe i aixcuma ngẽmaãcü mea ínanguxuchi.
