Salmo 92:1-15
Wiyae i Tupanaxü̃ namaxã icua̱xüüxü̃
92 Pa Corix ya Guxãétüwa Ngẽxmacüx, rü name nixĩ nax moxẽ cuxna taxãgüxü̃ rü torü wiyaemaxã cuxü̃ ticua̱xüü̃güxü̃.
2 Rü wüxichigü i pa̱xmama rü chütaxü̃ tanaxunagü nax cuma rü cumecümaxü̃ rü quixaixcumaxü̃.
3 ¡Rü ngĩxã Tupanaca̱x tawiyaegü ãcúnüxü̃ i paxetaruü̃maxã tüxü̃ napaxpe̱xegüãcüma!
4 Pa Corix, cuma rü ngẽma cha̱u̱xca̱x cuxüxü̃maxã choxü̃ cutaãxẽxẽxẽ. Rü ngẽma mexü̃ i cuxüxü̃ rü taãxẽ choxna naxã.
5 Pa Corix, namexechi i ngẽma cuxüxü̃. Rü curü ĩnü rü taxumaama nawüxigu.
6 Rü ngẽma tama naãxẽxü̃ icuáxü̃xicatama nixĩ i tama nüxü̃ cua̱xgüchaü̃xü̃ nax nhuxãcü namexechixü̃ i curü puracü.
7 Rü ngẽma chixexü̃gu rüxĩnüexü̃ rü chixri maxẽxü̃ i duü̃xü̃gü rü nimu nhama maxẽ i bacaxü̃rüxü̃, notürü yixcüra rü tá narüxoxochi.
8 Notürü i cumax, Pa Cori Pa Tupanax, rü guxü̃guma guxãétüwa cungexmaecha.
9 Notürü i ngẽma curü uanügü, Pa Cori Pa Tupanax, rü tá inayarüxo. Rü guxü̃ma i ngẽma chixexü̃ ügüxü̃ rü tá nawoone.
10 Rü cuma rü yexeraãcü choxü̃ quiporaxẽẽchigü nhama wüxi i tuirurüxü̃. Rü pumáramaxã choxü̃ cubaeru.
11 Rü tá choxü̃ nüxü̃ cudauxẽxẽ nax nhuxãcü poxcu namaxã cuxueguxü̃ i chorü uanügü. Rü chama rü tá nüxü̃ chaxĩnü i norü axu i ngẽma chixri maxẽxü̃.
12 Rü ngẽma mea maxẽxü̃ i duü̃xü̃gü rü nhama tema ya bacacürüxü̃ tá nixĩgü. Rü tá nimexechi yima ocayiwa ya Líbanuwa ngẽxmagünerüxü̃.
13 Rü Cori ya Tupanapatawa tá nangexmagü rü ngẽ́ma tá nataãxẽgü.
14 Rü woo ngẽxguma nayaegu rü tá nixãxacüetanüama rü guxü̃gutáma naporae.
15 Rü tá nüxü̃ nixugügü rü nhanagürügü tá: “Nüma ya Cori ya yimá chorü poxü̃ruxü̃ rü nixaixcuma rü nawa rü nataxuma i ta̱xacürü chixexü̃”, nhanagürügü tá.
