Salmo 94:1-23
94 ¡Rü cugü inawe̱x, Pa Cori Pa Tupanax! Erü cuxme̱xwa nixĩ i nangexmaxü̃ nax poxcu namaxã cuxueguxü̃ i ngẽma chixexü̃ ügüxü̃.
2 Rü cuma nixĩ i namaxã icucuáxü̃ i nhama i naanecüã̱x i duü̃xü̃gü. ¡Rü inachi rü napoxcue i ngẽma nügü icua̱xüxü̃güxü̃!
3 Pa Corix ¿rü nhuxguxüratáta icuyachaxãchixẽẽgüxü̃ nax nataãxẽgüxü̃ i ngẽma chixexü̃ ügüxü̃?
4 Rü guxü̃ma i ngẽma chixexü̃ ügüxü̃ rü nadauxcüraxü̃wa̱xegü rü togüétüwa nügü naxǘgüxẽxẽ rü norü poramaxã nügü nicua̱xüxü̃gü.
5 Pa Corix, nümagü rü curü duü̃xü̃güxü̃ nachixeãẽgü rü tüxü̃ nacugüe.
6 Rü tüxü̃ nadai ya yíxema yutegüxe, rü yíxema taxcutagü, rü yíxema to i nachixü̃anecüã̱x ixĩgüxe.
7 Rü nümagü rü nhanagürügü: “Yimá Cori ya Yacúarü Tupana rü tama nüxü̃ nadau i ngẽma ixüxü̃ rü taxũtáma nüxü̃ nacua̱x”, nhanagürügü.
8 Pa Duü̃xü̃gü i Ngeãxẽmaregüxü̃ rü Tama Peãxẽxü̃ Icuáxex ¿rü nhuxguxüratáta i peãxẽxü̃ pecuáxü̃?
9 ¿Rü pexca̱x rü tama nüxü̃ naxĩnü ya yimá Tupana ya naxücü i pexmachi̱xẽ? ¿Rü pexca̱x rü tama nüxü̃ nadau ya yimá pexetüarü üruxü̃?
10 ¿Rü pexca̱x rü yimá nachixü̃anegüarü poxcuruxü̃ rü taxũtáma pexü̃ napoxcu? ¿Rü pexca̱x rü taxũtáma nüxü̃ nacua̱x ya yimá duü̃xü̃güxü̃ ngúexẽẽcü nax naãxẽxü̃ yacuáxü̃ca̱x?
11 Dücax, rü nüma ya Cori ya Tupana rü nüxü̃ nacua̱x nax naechitamare namaxẽxü̃ i duü̃xü̃gü.
12 Pa Corix, rü tataãxẽ ya yíxema ucu̱xẽ tüxna cuxãxe rü yíxema tüxü̃ cungu̱xẽxẽ́xẽ.
13 Erü ngẽxguma aixcuma tanayaxu̱xgu i curü ucu̱xẽ rü tá tümaãẽxü̃ tacua̱x i ngẽxguma guxchaxü̃gü tümaca̱x ínguxgu. Notürü ngẽma chixexü̃arü üruxü̃ rü cuma rü naxca̱x cunamexẽxẽ i wüxi i ãxmaxü̃ nax ngẽmagu yangucuchixü̃ca̱x.
14 Rü nüma ya Cori ya Tupana rü tagutáma ínanawogü i norü duü̃xü̃gü rü tagutáma nüxna nixũ nax nüxica ngẽ́ma nawogüxü̃ca̱x.
15 Rü ngẽma aixcuma mexü̃ i nacüma rü tá wena duü̃xü̃güca̱x natáegu. Rü guxü̃ma i duü̃xü̃gü i mexü̃gu rüxĩnüexü̃ rü tá nagu naxĩ.
16 ¿Rü texé tá choxü̃ ítapoxü̃ nüxna i ngẽma chixri maxẽxü̃ rü ngẽma chixexü̃arü üruü̃gü?
17 Rü ngẽxguma chi Cori ya Tupana tama choxü̃ rüngü̃xẽẽgu rü chama rü chi marü chayu.
18 Rü ngẽxguma nhachagu: “Pa Corix, ngẽmatama chixexü̃gu changu”, nhachagu, rü cuma rü choxü̃ cungechaü̃ãcüma choxü̃ curüngü̃xẽẽ.
19 Rü ngẽxguma guxchaxü̃wa changexmagu rü chauãxẽ rü namaxã napaxgux, rü cuma rü choxü̃ ícurüdaxẽxẽ rü choxü̃ cutaãxẽxẽxẽ.
20 Rü cumax, Pa Tupanax, rü tama namaxã cuxãmücü i ngẽma ãẽ̱xgacügü i guxchaxü̃arü mexẽẽruü̃gü i chixri duü̃xü̃gümaxã icua̱xgüxü̃ rü tama mea mugü nüxü̃ ixugüãcüma nanamexẽxẽ i duü̃xü̃güarü guxchaxü̃gü.
21 Erü ngẽma duü̃xü̃gü rü nügümaxã nagu narüxĩnüe nax nhuxãcü tüxü̃ napoxcuexü̃ ya yíxema taxuxü̃ma i chixexü̃ ügüchiréxe. Rü tümamaxã nanaxuegugü nax tayuxü̃.
22 Notürü nüma ya Cori nixĩ i chorü cu̱xchicaxü̃ rü nhama nutapechita icúxü̃rüxü̃ choxü̃ ípoxü̃cü.
23 Rü nüma ya Cori rü tá nanadai i ngẽma chixri maxẽxü̃ i duü̃xü̃gü nagagu i ngẽma chixexü̃ i naxügüxü̃. Rü tórü Tupana rü aixcumaxü̃chi tá nanadai i ngẽma duü̃xü̃gü.
