Salmo 96:1-13
96 ¡Rü ngexwaca̱xü̃xü̃ i wiyaegu Cori ya Tupanaca̱x pewiyaegü i guxãma i pemax i nhama i naanewa maxẽxü̃!
2 ¡Rü naxca̱x pewiyaegü rü nüxü̃ pecua̱xüxü̃gü! ¡Rü guxü̃ i ngunexü̃gügu penaxunagü nax nüma yixĩxü̃ i tüxü̃ namaxẽxẽẽxü̃!
3 ¡Rü guxü̃ma i nachixü̃anecüã̱xmaxã nüxü̃ pexuchiga nax nüma rü naxüünexü̃ rü naxüãxü̃ i muxü̃ma i mexü̃gü i norü poramaxã naxüxü̃!
4 Erü nüma ya Cori ya Tupana rü guxãétüwa nangexma, rü ngẽmaca̱x name nax nüxü̃icatama icua̱xüü̃güxü̃. Erü nüma rü naxãũcümaxü̃chi rü guxü̃ma i ngẽma duü̃xü̃gü namaxã tupanaã́xü̃étüwa nangexma.
5 Rü ngẽma togü i nachixü̃anegüarü tupanagü rü taxuxü̃ma nixĩgü. Notürü nüma ya Cori ya Tupana nixĩ ga naxüxü̃ i guxü̃ma i ngẽma dauxü̃wa nüxü̃ idauxü̃.
6 Rü nüma ínangexmaxü̃wa rü nangóone. Rü napatawa nangexma i pora rü guxü̃ma namexechi.
7 Pa Guxü̃ma i Nachixü̃anecüã̱x ¡rü nüxü̃ pexuchigagü nax nüma ya Tupana rü nüxicatama nixĩ i aixcuma naporaxü̃ rü naxüünexü̃!
8 ¡Rü nüxü̃ pengechaü̃güãcüma nüxü̃ pecua̱xüxü̃gü! Erü nüma rü guxãétüwa nangexma. ¡Rü napataa̱xtügu pechocuxü̃ namaxã i perü ãmaregü!
9 ¡Rü nüxü̃ pecua̱xüxü̃gü nawa ya yima napata ya mexechine! Rü name nixĩ nax guxü̃ma i duü̃xü̃gü i nhama i naanewa maxẽxü̃ rü nape̱xegu nacaxã́pü̱xügü.
10 ¡Rü guxü̃ma i nachixü̃anecüã̱xgümaxã nüxü̃ pexu rü nhapegügü: “Nüma ya Cori ya Tupana nixĩ i ãẽ̱xgacü ya guxãétüwa ngẽxmacü yixĩxü̃”, nhapegügü! Rü nüma rü wüxitama ga namaxü̃gu nayaxũxẽxẽ ga nhama ga naane nax tama ngẽma namaxü̃na yaxũgachixü̃ca̱x. Rü nüma nixĩ i meama guxü̃ma i nachixü̃anegümaxã inacuáxü̃.
11 Rü nataãxẽgü i dauxü̃guxü̃ i naane rü nhama i naane. Rü ngẽxgumarüxü̃ ta norü taãxẽmaxã naxãũga i ngẽma már, rü naxãũgatanü i guxü̃ma i ngẽma nawa ngẽxmagüxü̃.
12 96:12-13 Rü nataãxẽ ta i naane rü guxü̃ma i nanetügü i nagu togüxü̃. Rü ngẽma naigü i naixnecüwa ngẽxmagüxü̃ rü name nixĩ i taãxẽãcü nicuxcu nape̱xewa ya Cori ya Tupana ya núma ũcü. Erü nüma ya Cori ya Tupana rü nua tá naxũ nax nhama i naanemaxã inacuáxü̃ca̱x. Rü nüma rü aixcuma meama tá guxü̃ma i nachixü̃anegümaxã inacua̱x.
13 Nüü̃ nadau 96:12
